ޝާހްރުކާއި ނަޔަންތަރާގެ ފިލްމު ފަށާނީ ޕޫނޭ އިން

ޝާހްރުކް ޚާނާއި އިންޑިއާގެ ދެކުނު ފިލްމު އިންޑަސްޓްރީގެ މަޝްހޫރު ބަތަލާ ނަޔަންތަރާ ލީޑް ރޯލު ކުޅޭ، ތަމަޅަ ޑައިރެކްޓަރު އެޓްލީގެ ފިލްމުގެ ޝޫޓިން މި މަހުގެ 10 ގައި ޕޫނޭގައި ފަށާނެ ކަމަށް ރިޕޯޓްތައް ބުނެފި އެވެ.

ފިލްމީ ޚަބަރުތައް ގެނެސްދޭ ނޫސްތަކުން ބުނި ގޮތުގައި އަންނަ މަހުގެ ތެރޭގައި ޝާހްރުކް ޚާން "ޕަތާން" ގެ މަންޒަރުތަކެއް ނަގަން ސްޕެއިނަށް ބަަތަލާ ދީޕިކާ ޕަދްކޯންއާ އެކު ދިއުމުގެ ކުރިން އެޓްލީގެ ފިލްމުގެ ފުރަތަމަ ޝެޑިއުލް ނިންމާނެ އެވެ.

ހަންގާމާ އިން ބުނި ގޮތުގައި ޕޫނޭގެ 10 ދުވަހުގެ ޝޫޓިން ޝެޑިއުލް ނިންމައިލުމަށް ފަހު، ދެން ޝޫޓްކުރާނީ މުމްބާއީގަ އެވެ. ވަރަށް ބޮޑު ބަޖެޓަކުން، ގްރޭންޑްކޮށް ހަދަން ހަމަޖެހިފައިވާ މި ފިލްމަކީ ޝާހްރުކްގެ ފިލްމު ކުންފުނި ރެޑް ޗިލީޒް އެންޓަޓައިންމަންޓުން ޕްރޮޑިއުސްކުރާ އެއްޗެކެވެ. މީގައި އޭނާ ކުޅޭނީ ވަރަށް ތަފާތު ދެ ކެރެކްޓާއެއްގެ ޑަބަލް ރޯލެވެ.

ފިލްމުގެ ކާސްޓްގައި ސާނިއާ މަލްއުތުރާ އާއި ސުނިލް ގްރޯވާގެ އިތުރުން ޝާހްރުކްގެ 2013 ގެ ފިލްމު "ޗެންނައި އެކްސްޕްރެސް" ގެ ލަވައެއް ކުޅުނު ދެކުނުގެ ބަތަލާ ޕްރިޔަމަނީ ވެސް ހިމެނެ އެވެ. ބައެއް ރިޕޯޓްތައް ބުނާ ގޮތުން މި ފިލްމުގެ ނެގަޓިވް ރޯލަކުން "ބާހްބަލީ" ގައި ބައްލަވާދޭވްގެ ރޯލު ކުޅުނު ރާނާ ދަގޫބަތީ ވެސް ފެންނާނެ އެވެ.

ހަންގާމާ އިން ބުނި ގޮތުގައި ޝާހްރުކާއި އެޓްލީ އެއްބަސްވެފައިތީ ގާތްގަނޑަކަށް 6-7 މަސް ދުވަހުގެ ތެރޭގައި ފިލްމުގެ ހުރިހާ މަސައްކަތެއް އެއްކޮށް ނިންމުމަށެވެ.

މި ފިލްމަށް ފަހު ޝާހްރުކް ކުޅެން އޮތީ ޑައިރެކްޓަރު ރާޖްކުމާރު ހިރާނީގެ ސޯޝަލް ކޮމެޑީއެކެވެ. ޝާހްރުކްގެ އެންމެ ފަހުގެ ފިލްމަކީ 2018 ގެ "ޒީރޯ" އެވެ.

އޭނާ މިހާރު ކުޅެމުން އަންނަ އެކްޝަން ފިލްމު "ޕަތާން" އަކީ 2019 ގެ "ވޯ" ގެނެސްދިން ސިދާތު އާނަންދު ޑައިރެކްޓްކުރާ ފިލްމެކެވެ.