ފަލަ މީހުންގެ ރޯލުތަކަށް ސޮނާކްޝީ އާއި ހުމާ

ސޮނާކްޝީ ސިންހާ އާއި އަކްޝޭ ކުމާރާ އެކު ޑައިރެކްޓަރު މުދައްސަރު އަޒީޒު ހަދަން ނިންމާފައިވާ ކަމަށް ދާފި ފަހުން މީޑިއާތަކުން ރިޕޯޓްކުރި ފިލްމު "ޑަބަލް އެކްސްއެލް" ގެ ވާހަކަ މުޅިން ތަފާތު ގޮތަކަށް އެނބުރިިއްޖެ އެވެ.

ރިޕޯޓްތައް މިހާރު ބުނާ ގޮތުން ފިލްމުގެ ކާސްޓްގައި އަކްޝޭއެއް ނުހިމެނެ އެވެ. އަދި މީގެ ޑައިރެކްޓަރަކީ މުދައްސަރެއް ވެސް ނޫނެވެ. ބޮލީވުޑް ހަންގާމާ އިން ބުނި ގޮތުގައި "ޑަބަލް އެކްސްއެލް" އަކީ މުދައްސަރާއި ޕްރޮޑިއުސަރު އަޝްވިން ވަރްދޭ ގުޅިގެން ޕްރޮޑިއުސްކޮށް، ސަތުރަމް ރަމާނީ ޑައިރެކްޓްކުރާ ފިލްމެކެވެ. ސަތުރަމް އަކީ ދާދި ފަހުން ޒީ5 އިން ޕްރީމިއާކުރި "ހެލްމެޓް" ގެ ޑައިރެކްޓަރެވެ.

ހަންގާމާ އިން ބުނީ "ޑަބަލް އެކްސްއެލް" އަކީ އާދަޔާހިލާފަށް ފަލަ ދެ އަންހެނުންގެ ވާހަކަ ކިޔައިދޭ ފިލްމެއް ކަމަށާއި މީގެ ކާސްޓުންނަކީ ސޮނާކްޝީ އާއި ހުމާ ގްރޭޝީ ކަމަށެވެ. މުދައްސަރާ ލޯބީގެ ގޮތުން ގުޅިގެން އުޅޭ ކަމަށް އަޑުއަރާފައިވާ ހުމާ އަކީ މިދިޔަ މަހު ރިލީޒްކުރި އަކްޝޭގެ "ބެލް ބޮޓަމް" ގެ ކާސްޓްގައި ވެސް ހިމެނުނު ބަތަލާއެކެވެ.

ސޮނާކްޝީ އަކީ މުދައްސަރު އެންމެ ފަހުން ޑައިރެކްޓްކުރި 2018 ގެ ފިލްމު "ހެޕީ ޕިރު ބާގް ޖާއޭގީ" ގެ ބަތަލާ އެވެ.

ހުމާ އާއި ސޮނާކްޝީ އަށް އާދަޔާހިލާފަށް ފަލަ ދެ މީހުންގެ ރޯލު ކުޅެން ލިބުނު އިރު، މި ދެ ތަރިންނަކީ ފަލަ ކަމަށް ބުނެ ކުރިން އާންމުންގެ މަލާމާތް އަމާޒުވި ދެ ތަރިންނެވެ.

މި ދެ ބަތަލާއިންނަށް "ޑަބަލް އެކްސްއެލް" ގައި މަސައްކަތްކުރަން ފުރުސަތު ލިބުނު އިރު، ސަންޖޭ ލީލާ ބަންސާލީ ގެނެސްދޭން ހަމަޖެހިފައިވާ ވެބް ސީރީޒް "ހީރާ މަންޑީ" ގެ މައިގަނޑު ކާސްޓުންގެ ތެރޭގައި ވެސް ހިމެނެނީ ސޮނާކްޝީ އާއި ހުމާ ކަމަށް މީޑިއާތަކުން ބުނެ އެވެ.

ހަންގާމާ ބުނީ "ޑަބަލް އެކްސްއެލް" ގެ ތައްޔާރީތައް މިހާރު ވަމުން އަންނަ އިރު، ފިލްމުގެ ޝޫޓިން ވަރަށް އަވަހަށް އިނގިރޭސިވިލާތުގައ ފަށާނެ ކަމަށެވެ.