ހަ އަހަރު ފަހުން ސޫރަޖް ޑައިރެކްޓަރުގެ ގޮނޑި އަށް

އާއިލީ ފިލްމުތައް ގެނެސްދޭން މަޝްހޫރު ބޮލީވުޑްގެ ޑައިރެކްޓަރު ސޫރަޖް ބަރަޖްތިއާ ހަ އަހަރު ފަހުން ޑައިރެކްޓްކުރާ ފުރަތަމަ ފިލްމުގެ މަސައްކަތް ފަށައިފި އެވެ.

"އޫޗާއީ" ގެ ނަން ދީފައިވާ މި ފިލްމުގެ ޝޫޓިން މިހާރު ނޭޕާލްގައި ކުރިއަށްދާ އިރު، ސޫރަޖްގެ އާއިލީ ފިލްމު ކުންފުނި ރާޖްޝްރީ ޕްރޮޑަކްޝަންގެ ސޯޝަލް މީޑިއާ އެކައުންޓްތަކުގައި ފިލްމުގެ ކްލެޕްބޯޑާ އެކު ސޫރަޖް ނަގާފައިވާ ފޮޓޯއެއް ވެސް ޕޯސްޓް ކޮށްފައިވެ އެވެ. އެކަމަކު ފިލްމާ ބެހޭ އެއްވެސް ތަފުސީލެއް އަދި ރަސްމީކޮށް ހާމައެއް ނުކުރެ އެވެ.

މީޑިއާތަކުން ކުރިން ވެސް ރިޕޯޓްކޮށްފައިވާ ގޮތަށް މީގެ މައިގަނޑު ކާސްޓުންނަކީ އަމީތާބް ބައްޗަނާއި ބޮމަން އިރާނީ އާއި އަނޫޕަމް ކޭރާއި ޕަރިނީތީ ޗޯޕްޅާ އާއި ނީނާ ގުޕްތާގެ އިތުރުން ސާރިކާ އަދި ޑެނީ ޑެންޒޯންގްޕާ އެވެ. ބޮމަން ވަނީ އެ ތަރިން ޓެގްކޮށް، ސޫރަޖްގެ ފޮޓޯ އޭނާގެ ސޯޝަލް މީޑިއާ އެކައުންޓްތަކުގައި ވެސް ޕޯސްޓްކޮށްފަ އެވެ.

އަނޫޕަމް ފިޔަވައި "އޫޗާއީ" ގެ ކާސްޓްގައި މުޅިން ވެސް ހިމެނެނީ ސޫރަޖާ އެކު އަލަށް މަސައްކަތްކުރާ ތަރިންނެވެ. މި ފިލްމުން ފުރުސަތު ލިބުމުން ބޮމަން ބުނީ މިއީ ސޫރަޖާ އެކު މަސައްކަތްކުރަން ދެކެމުން އައި ހުވަފަން ހަގީގަތަކަށްވުން ކަމަށާއި މި ފިލްމަކީ އޭނާގެ ކެރިއަރުގެ ހަނދާނުން ނުފިލާނެ ދަތުރެއް ކަމަށެވެ،

ސޫރަޖް އެންމެ ފަހުން ގެނެސްދިނީ ސަލްމާން ޚާނާއި ސޯނަމް ކަޕޫރާ އެކު 2015 ގެ "ޕްރޭމް ރަތަން ދަން ޕާޔޯ" އެވެ.

ސޫރަޖަކީ މޭނޭ ޕިޔާރު ކިޔާ (1989) އާއި ހަމް އާޕް ކޭ ހޭ ކޯން (1994) އާއި ހަމް ސާތު ސާތު ހޭ (1999) އަދި ވިވާ (2006) ގެނެސްދިން ޑައިރެކްޓަރެވެ. އޭނާ އަކީ ޑައިރެކްޓަރު ސަންލޭ ލީލާ ބަންސާލީ އާއި ކަރަން ޖޯހަރާއި އަދިތިޔާ ޗޯޕްޅާ ފަދަ ޑައިރެކްޓަރުން ގޮތަށް ބެލުންތެރިން އަބަދު ވެސް އެންމެ ބޮޑަށް އިތުބާރުކުރާ ބޮލީވުޑްގެ އެންމެ ކާމިޔާބު އެއް ޑައިރެކްޓަރެވެ.

ސޫރަޖް މަޝްހޫރީ އާއިލާގެ އެންމެން އެކީގައި ތިބެގެން ބަލައިލެވޭ ކަހަލަ އާއިލީ ލޯބީގެ ފިލްމުތައް ހަދަން ކުޅަދާނަ ޑައިރެކްޓަރެއްގެ ގޮތުގަ އެވެ. އޭނާ 2003 ގައި ގެނެސްދިން "މޭ ޕްރޭމް ކީ ދީވާނީ ހޫ" ފިޔަވައި އެހެން ހުރިހާ ފިލްމުތައް ވަރަށް ކާމިޔާބެވެ.

"އޫޗާއީ" ގެ މަސައްކަތް ފެށި ނަމަވެސް ފިލްމު ބެލުންތެރިންނަށް ގެނެސްދޭނެ އިރެއް ނޭނގެ އެވެ. މިއީ ދުވަސްވީ އެކުވެރިންތަކަކާއި އެ މީހުންގެ އާއިލީ ގުޅުންތަކުގެ ވާހަކަ ކިޔައިދޭނެ ވަރަށް އަސަރު ގަދަ ފިލްމަކަށް ވާނެ އެވެ.