ރަޔަން އެކްޓިން އިން ބްރޭކެއް ނަގައިފާނެ

"ޑެޑްޕޫލް" ފަދަ ކާމިޔާބު އެތައް ފިލްމެއް ކުޅެފައިވާ ހޮލީވުޑްގެ އެކްޓަރު ރަޔަން ރެނޮލޮޑްސް އެކްޓިން ބްރޭކެއް ނަގައިފާނެ ކަމުގެ އިޝާރާތެއް ދީފި އެވެ.

އޭނާ ސޮއިކޮށްފައި ހުރި ފިލްމުތަކުގެ ތެރެއިން ނެޓްފްލިކްސްގެ "ސްޕިރިޓެޑް" ގެ ޝޫޓިން ނިންމައިލި ވާހަކަ އިންސްޓަގްރާމްގައި ޕޯސްޓްކޮށް އާދީއްތަ ދުވަހު ބުނީ މީގެ ތިން އަހަރު ކުރިން ނަމަ އެކަހަލަ ޗެލެންޖިން ފިލްމަކަށް އޭނާ އެއްބަސްވުމާ މެދު ވެސް ޝައްކު ކަމަށެވެ.

އެ ޕޯސްޓްގައި ފިލްމަށް ކުރެވުނު މަސައްކަތްތަކާ ދޭތެރޭ ހިތްހަމަޖެހޭކަން ވެސް ފާހަގަކޮށް ބަތަލާ ބްލޭކް ލައިވްލީގެ ފިރިމީހާ ބުނީ މިއީ ފިލްމީ މަސައްކަތްތަކާ ދުރުވެލަން ރަނގަޅު ވަގުތަކަށް ވެދާނެ ކަމަށެވެ. ރަޔަންގެ މި ވާހަކަ ގިނަ މީޑިއާތަކުން ވެސް މާނަކުރީ އޭނާ ދުވަސްކޮޅަކަށް އެކްޓިން އިން ދުރުވާން ނިންމައިގެން ހުރުމާ އެވެ.

ކެނެޑާ އަށް އުފަން 44 އަހަރުގެ ރަޔަންގެ އެންމެ ފަހުގެ ފިލްމަކީ މިދިޔަ އޮގަސްޓް މަހު ގެނެސްދިން ސައިންސް ފިކްޝަން އެކްޝަން ކޮމެޑީ "ފްރީ ގާއި" އެވެ. "ޑެޑްޕޫލް" ފްރެންޗައިޒްގެ އިތުރުން "ދަ ޕްރޮޕޯސަލް" އާއި "6 އަންޑަ ގްރައުންޑް" ފަދަ ފިލްމުތައް ކުޅުނު ހުނަރުވެރި އެކްޓަރުގެ ކުރިއަށް ހުރި ފިލްމުތަކުގެ ތެރޭގައި "ރެޑް ނޯޓިސް" އާއި "ދި އެޑަމް ޕްރޮޖެކްޓް" ހިމެނެ އެވެ. އަދި "ޑެޑްޕޫލް 3" އަކީ ވެސް ޕްލޭން ކޮށްފައި އޮތް ފިލްމެކެވެ.

މި ހަފުތާގައި އޭނާ ޝޫޓިން ނިންމައިލި "ސްޕިރިޓެޑް" އަކީ ޝޯން އެންޑާޒް ޑައިރެކްޓްކޮށް ގެނެސްދޭ މިއުޒިކަލްއެކެވެ. މީގެ ކާސްޓްގައި ވިލް ފެރެލް އާއި އޮކްޓޭވިއާ ސްޕެންސާ ވެސް ހިމެނެ އެވެ.