ކްރިތީ މިހާރު ދިރިއުޅެނީ އަމީތާބްގެ އެޕާޓްމަންޓެއްގައި ކުއްޔަށް

ބޮލީވުޑްގެ ބަތަލާ ކްރިތީ ސެނަން މިހާރު މުމްބާއީގައި ދިރިއުޅެނީ އަމީތާބް ބައްޗަންގެ އެޕާޓްމަންޓެއްގައި ކަމަށް ރިޕޯޓްތައް ބުނެފި އެވެ.

ފިލްމީ ޚަބަރުތައް ގެނެސްދޭ ނޫސްތަކުން ބުނި ގޮތުގައި ދިރިއުޅެން އާ އެޕާޓްމަންޓެއް ހޯދަން ކްރިތީ މަސައްކަތް ކުރާތާ ދުވަސްތަކެއް ވެފައިވާކަން އެނގިގެން އިންޑަސްޓްރީގެ ގާތް ބައެއްގެ ފަރާތުން ލިބުނު މައުލޫމާތަކާ ގުޅިގެން އޭނާ ކުއްޔަށް ހިފީ މުމްބާއީގެ އަނދޭރީގައި ހުންނަ އަމީތާބްގެ ހިތްގައިމު ލަގްޒަރީ އެޕާޓްމަންޓް އިމާރާތެއްގެ ތަނެކެވެ.

އަދި އެތަނަށް ކްރިތީ މިހާރު ބަދަލު ވެސް ވެފައިވާ އިރު ލޮކޭޝަނާއި ތަނުގެ އިންޓީރިއާއާ މެދު ވެސް ކްރިތީ ވަރަށް ހިތްހަމަޖެހިފައި ހުރި ކަމަށްވެ އެވެ. އަމީތާބްގެ އެޕާޓްމަންޓަކަށް އޭނާ ބަދަލުވި އިރު އެންމެ ފަހުން ރިލީޒްވި ކްރިތީގެ ފިލްމު "މިމީ" ގައި އޭނާ ދެއްކި އެކްޓިން މޮޅުކަމުން އަމީތާބް ތައުރީފު ކޮށްފައިވެ އެވެ.

ބޮލީވުޑްގައި މިހާރު ޑިމާންޑް ބޮޑު ބަތަލާއެއްގެ ގޮތުގައި ފާހަގަކުރެވޭ 31 އަހަރުގެ ބަތަލާގެ އާ ފިލްމަކީ މި މަހު 29 ގައި ޑިޒްނީ ޕްލަސް ހޮޓްސްޓާ އިން ޕްރީމިއާ ކުރަން ހަމަޖެހިފައިވާ ކޮމެޑީ ޑްރާމާ "ހަމް ދޯ ހަމާރޭ ދޯ" އެވެ.

ކްރިތީގެ އަތުގައި ހުރި އިތުރު ފިލްމުތަކުގެ ތެރޭގައި އަކްޝޭ ކުމާރުގެ "ބައްޗަން ޕާންޑޭ" އާއި ޕްރަބާސްގެ "އާދިޕުރުޝް" އާއި ވަރުން ދަވަންގެ "ބޭޅިޔާ" އާއި ކާތިކް އާރިޔަންގެ "ޝެހެޒާދާ" ގެ އިތުރުން ޓައިގާ ޝްރޮފްގެ "ގަނަޕަތު" ހިމެނެ އެވެ.

ކްރިތީ އަކީ ޓައިގާގެ އަލަތު ފިލްމު 2014 ގެ "ހީރޯޕަންތީ" އިން ބޮލީވުޑަށް ނުކުތް ބަތަލާއެކެވެ.