އަލީ ހޯދިއްޖެ، އެކަމަކު ގެނެވޭނެތަ؟

ރާއްޖެ އިން ބޭރުގެ ޖަލެއްގައި ނުވަތަ އެ ގައުމެއްގެ އިމިގްރޭޝަންގެ ގާނޫނާއި ގަވައިދުތަކާ ހިލާފު ވެގެން ދިވެއްސަކު އެހެން ގައުމެއްގައި ހައްޔަރު ކޮށްފި ނަމަ މީގެ ކުރިން އެކަން ވަރަށް ފަސޭހައިން ދިވެހި ސަރުކާރަށް ހޯދެ އެވެ. އާއިލާ އިން ނުވަތަ އެހެން ފަރާތަކުން ދޭ ރިޕޯޓުތަކަށް ބަލައި ދިވެހި ސަރުކާރުން އެދުމުން އެ ގައުމުތަކުން އެ ކަންތައް ސާފުކޮށްދިން ނަމަވެސް ކުރީގެ ޓޫރިޒަމް މިނިސްޓަރު އަލީ ވަހީދު ޔޫކޭގައި ހައްޔަރުކޮށްފައި ހުރިކަން ކަށަވަރު ނުކުރެވި ގިނަ ދުވަސްތަކެއްވި އެވެ.

އިނގިރޭސި ވިލާތުގައި އަލީ ހައްޔަރުކުރި ކަމުގެ މައުލޫމާތު އޭނާގެ ގާތް މީހަކު ދިނަސް، އެ ވާހަކައިގެ ހަގީގަތް ދިވެހި ސަރުކާރަށާއި ފުލުހުންނަކަށް ނުހޯދި ގިނަ ދުވަސްތަކެއް ވުމުން އަލީ "ގެއްލުނީ" ނުވަތަ "ފިލީ" ކަމަށް ވެސް ބެލެވުނެވެ.

ހައްޔަރު ކުރިތާ ދެ ހަފުތާވާން އުޅެނިކޮށް، އޭނާ ހަމަ ހަގީގަތުގައި ވެސް ހައްޔަރު ކުރިކަން ފުލުހުންނަށް ކަށަވަރު ކުރެވުނީ އިއްޔެ އެވެ. މިކަން ސާފުވުމުން އަލީ ޝަރީއަތަށް ހާޒިރު ކުރަން އަދި އޭނާގެ މައްޗަށް ކޮށްފައިވާ ދެ މަހާއި 12 ދުވަހުގެ ޖަލު ހުކުމް ތަންފީޒުކުރަން އޭނާ ރާއްޖެ ގެންނައުމަށް ކުރަން ޖެހޭ ކަންކަން ބެލުމަށް ފުލުހުންނަށް ފަސޭހަވާނެ އެވެ.

އަލީގެ ހުކުމް ތަންފީޒު ކުރަން އޭނާ ގެނައުމުގެ ޒިންމާ ނަގައިގެން ތިބީ ފުލުހުންނެވެ. އޭނާ ރާއްޖެ ގެނެސް ކަރެކްޝަންސްއާ ހަވާލުކުރާނީ އެ މުއައްސަސާއިންނެވެ. ފުލުހުން މަސައްކަތްކުރީ ރެޑް ނޯޓިސް ނެރެގެން އަދި ޔޫކޭގެ ފުލުހުންނާ ގުޅިގެން އޭނާ ރާއްޖެ ގެނެވޭނެ ގޮތެއް ހޯދުމަށެވެ. ވިސާ މައްސަލައިގައި އޭނާ ހައްޔަރުކުރީ ވެސް ފުލުހުން އެ މަސައްކަތް ކުރަނިކޮށެވެ.

ފުލުހުން މިއަދު ބުނީ އަލީގެ މައްސަލާގައި، ޔޫކޭގެ ކަމާބެހޭ ފަރާތްތަކުން މައުލޫމާތު ސާފުކޮށް މަޝްވަރާ ކުރަމުން އަންނަ ކަމަށެވެ. ފުލުހުން ބުނި ގޮތުގައި އަލީ ގެނައުމަށް ދެން އަޅާނެ ފިޔަވަޅެއް އެނގޭނީ ވެސް ބައެއް ކަންކަން ސާފުވުމުންނެވެ.

ފުލުލުހުން ފިޔަވަޅެއް ނާޅައި އޮތަސް އަލީ ރާއްޖެ އަށް ގެނެވުމުގެ ފުރުސަތު މިހާރު އޮތީ ހުޅުވިފަ އެވެ. އެއީ އަލީގެ ވިސާގެ މައްސަލަ ޖެހިފައި އޮތުމުންނެވެ.

އިނިގިރޭސިވިލާތުގެ އިމިގްރޭޝަން ގާނޫނުތައް އޮންނަ ގޮތުން ވިސާ ހަމަވާތާ 30 ދުވަހުގެ ތެރޭގައި އަމިއްލަ އަށް ގައުމުން ފުރައިގެން ދިއުމުގެ ފުރުސަތު އެ މީހަކަށް އޮވެ އެވެ. ނަމަވެސް، ވިސާ ހަމަވާތާ 14 ދުވަހުގެ ތެރޭގައި ގަބޫލުކުރެވޭ ސަބަބުތަކާ އެކު ވިސާ އާކުރަން ވެސް ހުށަހެޅިދާނެ އެވެ. އެ ހުށަހެޅުމާ މެދު ގޮތެއް ނިންމަންދެން އެ ގައުމުގައި މަޑުކުރެވިދާނެ އެވެ.

ވިސާ އިތުރުކޮށްދިނުމުގެ ހުށަހެޅުމާ މެދު ގޮތެއް ނިންމުމުގެ ކުރިން އެއްވެސް ފިޔަވަޅެއް ނާޅާނެ އެވެ. ފިޔަވަޅު އަޅާނީ 30 ދުވަހުގެ މުއްދަތު ވެސް ފަހަނަޅައި ދާ ފަހުން މަޑުކޮށްފި ނަމަ އެވެ. ނަމަވެސް، އަލީ އެ ގައުމުގައި ހައްޔަރުކުރީ 30 ދުވަހަށް ވުރެ ގިނަ ދުވަހު އޯވާ ސްޓޭވެގެން ކަމެއް ނުވަތަ ނޫން ކަމެއް ސާފެއް ނުވެ އެވެ.

އަލީގެ ވަކީލުން ވިދާޅުވާ ގޮތުގައި އޭނާގެ ފަރާތުން ވަނީ ވިސާ އޯވާސްޓޭވުމުގެ މަގުބޫލު ސަބަބެއް ދައްކައި ވިސާ އިތުރުކުރަން އެދިފަ އެވެ. އެ މަގުބޫލު ސަބަބަކީ އޭނާ އޮޕަރޭޝަނެއް ކުރަން އިނގިރޭސިވިލާތުގައި ހުންނަން ޖެހުމެވެ.

އެކަމަކު އިތުބާރު ހުރި ފަރާތަކުން ކިޔައިދިން ގޮތުގައި އަލީގެ ވިސާ އިތުރު ކުރުމުގެ ފުރުސަތު މިހާރު ކުޑަ އެވެ. އެއީ އޮޕަރޭޝަނެއް ކުރަން ރާއްޖެއިން ބޭރުގައި ހުންނަންޖެހޭ ކަމަށް އޭނާ ބުނާ ނަމަވެސް، އެހާ ސީރިއަސް މައްސަލައެއް އުޅޭ ކަމަށް ޑޮކްޓަރުން ލަފާ ދީފައި ނުވާތީ ކަމަށް އެނގިފައިވެ އެވެ. ކޯޓަށް ހާޒިރުނުވެގެން ޖަލު ހުކުމެއް ވެސް އިއްވާފައިވުމާއި ޖިންސީ ގޯނާގެ ސީރިއަސް ދައުވާތަކެއް އުފުލާފައި ވުމާއި، ދިވެހި ފުލުހުން އޭނާ ހޯދަމުން ދިޔުމަކީ ވެސް ވިސާ އިތުރު ކުރަން އޭނާ އަށް ދަތިވާނެ ސަބަބުތަކެވެ.

އެހެންވެ އޭނާގެ ވިސާ އިނގިރޭސިވިިލާތުން އާނުކޮށްދީފި ނަމަ އެ ގައުމުން ޑިޕޯޓުކޮށް ރާއްޖެ ފޮނުވާލާނީ އެވެ. އަދި ރާއްޖެ އަންނަ ހިސާބުން ޕާސްޕޯޓު އަތުލައި ކަރެކްޝަންސްގެ ބެލުމުގެ ދަށަށް އޭނާ ގެންދެވޭނެ އެވެ. ހުކުމެއްގައި ހުރުމުން ޝަރީއަތަށް ހާޒިރު ކުރަން ވެސް ދައްޗެއް ނުވާނެ އެވެ.

އަލީ ހަތަރު މަހުގެ މުއްދަތަކަށް ޔޫކޭ އަށް ވަޑައިގަތީ ކޯޓުން ހުއްދަ ދީގެންނެވެ. އޭނާގެ މައްޗަށް ހަތް ދައުވާއެއް އުފުލާފައި ވިޔަސް ރާއްޖޭގެ ބޯޑަރުން ނުކުމެވަޑައިގެންނެވުނީ ސައްހަ ޕާސްޕޯޓާއެކު ދިވެހި ދައުލަތުގެ ހުއްދަ ލިބިގެންނެވެ. ޕީޖީ އޮފީހުން ފުރަތަމަ ވެސް ބެލީ އޭގެ ސައްހަ ކަމާއި ބާރު ކަނޑުވާލަން ޕާސްޕޯޓު ހިފަހައްޓާށެވެ.

އަލީގެ ޕާސްޕޯޓު ހަތަރު މަހަށް ދޫކުރަން ކްރިމިނަލް ކޯޓުން ނިންމި ނިންމުން ޕީޖީ އޮފީހުން މަތީ ކޯޓުތަކަށް ގެންދިޔަ ނަމަވެސް، އެ މައްސަލަ ހުއްޓުނީ އަލީ ހާޒިރުނުވެގެންނެވެ. އެ ފަހުން އަލުން ޕާސްޕޯޓު ހިފަހައްޓަން ފުލުހުން ކޯޓުގައި އެދުމުން ވެސް ކޯޓުން ނިންމީ އެފަދަ އަމުރެއް ނެރެނުދޭށެވެ. އެ ނިންމުން ހައި ކޯޓުގައި އިސްތިއުނާފު ކުރުމުން އެ މައްސަލަ ނުބެލޭނެ ކަމަށް އެ ކޯޓުން ނިންމިޔަސް، މައްސަލަ ބެލޭނެ ކަމަށް ފަހުން ސުޕްރީމް ކޯޓުން އެންގުމުން ހައި ކޯޓުން ދަނީ ބަލަމުންނެވެ.

ޕާސްޕޯޓު ހިފަހައްޓަން ހައި ކޯޓުން ނިންމައިފި ނަމަ އެއީ އޭނާ ރާއްޖެ އަށް ގެނައުމަށް އިދާރާތަކަށް ފަސޭހަވެގެންދާނެ ކަމެކެވެ. ޕާސްޕޯޓު ހިފަހައްޓައިފި ނަމަ އޭނާ އަށް ވިސާ އާ ނުކުރެވި އެންމެ ފަހުން އިމިގްރޭޝަންގެ ގާނޫނުތަކާ ހިލާފުވެ، ޑިޕޯޓު ކުރާ ހިސާބަށް ދާނެ އެވެ. އަލީގެ ވިސާ ޔުކޭއިން އާ ކޮށްދީފި ނަމަ ދެން އޮންނާނެ މަގަކީ އެއީ އެވެ.

ނަމަވެސް، އޭނާ އިނގިރޭސިވިލާތުގެ ހިމާޔަތަށް އެދިފައިވާ ނަމަ ގެންނަން އިތުރަށް އުނދަގޫވާނެ އެވެ. ހިމާޔަތަށް އެދިފައި އޮއްވާ އެކަމަށް ގޮތެއް ނިންމަންދެން އޭނާ އެ ގައުމުން ފޮނުވައެއް ނުލާނެ އެވެ. އަދި ހިމާޔަތް ދީފި ނަމަ އޭނާ އަމިއްލަ އަށް ނާންނަނީސް ރާއްޖެ ނުގެނެވޭނެ އެވެ.

އަލީ ޔޫކޭގެ ހިމާޔަތަށް އެދިފައިވާކަން ކަށަވަރެއް ނުކުރެވެ އެވެ. ހިމާޔަތަށް އެދިފައިވާ ކަމަށް އޭނާގެ ގާތް ބައެއް ފަރާތްތަކުން ބުނާ ނަމަވެސް ވަކީލުން ވަނީ އެކަން ދޮގުކޮށްފަ އެވެ. ވަކީލުން ވިދާޅުވާ ގޮތުގައި ރާއްޖެ ނައުމުގެ ވިސްނުމެއް އޭނާ ނުގެންގުޅުއްވަ އެވެ. ހިމާޔަތަށް އެދުމަކީ ވެސް އޭނާ ޝަރީއަތަށް "ފިލަން" އުޅޭ ކަމަށް ގަބޫލު ކުރެވިދާނެ ސަބަބެކެވެ.