ހޮލީވުޑްގެ މަގުބޫލު އަދި ކާމިޔާބު އެކްޝަން ފްރެންޗައިޒް "ފާސްޓް އެންޑް ފިއުރިއަސް"ގެ ލައިވް-އެކްޝަން ޓީވީ ސީރީޒެއް އުފެއްދުމުގެ ރަސްމީ ހުއްދަ ޕީކޮކް ސްޓްރީމިން ހިދުމަތުން ދީފި އެވެ.
މިއީ މި ފްރެންޗައިޒްގެ ތާރީޚުގައި އުފައްދާ ފުރަތަމަ ލައިވް-އެކްޝަން ޓީވީ ސީރީޒެވެ.
މި ސީރީޒް ބެލުންތެރިންނާ ހަމައަށް ގެނެސްދިނުމަށް ތާވަލުކޮށްފައި ވަނީ 2028 ވަނަ އަހަރު އެވެ. އެއީ މި ފްރެންޗައިޒްގެ އެންމެ ފަހު ފިލްމު އަދި 11 ވަނަ ފިލްމު ކަމަށްވާ "ފާސްޓް ފޮރެވާ" ސިނަމާތަކަށް ނެރުމަށް ހަމަޖެހިފައިވާ ތާރީޚު ކަމަށްވާ މާޗު 17، 2028 އާ ދިމާކޮށެވެ.
މި ސީރީޒްގެ އެގްޒެކެޓިވް ޕްރޮޑިއުސަރެއްގެ ގޮތުގައި ފްރެންޗައިޒްގެ މައިގަނޑު ތަރި ވިން ޑީސެލް (ޑޮމިނިކް ޓޮރެޓޯ) ބައިވެރިވާނެ އެވެ.
ވިން ޑީސެލް ހާމަކުރި ގޮތުގައި، ފިލްމުތަކުގެ ކެރެކްޓާތަކުގެ ވާހަކަތައް އިތުރަށް ބަލަން ސަޕޯޓަރުން އެދެމުން އަންނަތާ ގިނަ ދުވަސްތަކެއް ވަނީ ވެފަ އެވެ. އަދި ޔުނިވާސަލް ސްޓޫޑިއޯސްއާ އެކު މަޝްވަރާކުރުމަށް ފަހު، ސީރީޒްގެ ތެރެއިން އެ ކެރެކްޓާތަކުގެ ދުނިޔެ އިތުރަށް ފުޅާކުރުމަށް ނިންމީ އެވެ.
ޔުނިވާސަލް ޓެލެވިޜަން އިން އުފައްދާ މި ސީރީޒްގެ ކޯ-ޝޯރަނާސް އަދި ލިޔުންތެރިންގެ ގޮތުގައި މަސައްކަތްކުރާނީ މައިކް ޑެނިއެލްސް އާއި ވުލްފް ކޯލްމަން އެވެ.
މި ސީރީޒްގެ މައިގަނޑު ވާހަކަ އާއި ބައިވެރިވާނެ އެކްޓަރުންގެ ތަފްސީލުތައް އަދި ހާމަކޮށްފައެއް ނުވެ އެވެ. ނަމަވެސް، މިއީ ޕީކޮކް އިން އުފައްދަން ރާވާފައިވާ "ފާސްޓް އެންޑް ފިއުރިއަސް"ގެ ތިން ސްޕިން-އޮފް ސީރީޒެއްގެ ތެރެއިން ފުރަތަމަ ސީރީޒެވެ.