ހޮލީވުޑްގެ ބޮޑު ދެ ކުންފުނި ކަމަށްވާ ޕެރަމައުންޓް އާއި ވޯނާ ބްރޯސް ޑިސްކަވަރީ އެއްކޮށްލައިގެން އުފައްދާ މީޑިއާ ކޮންގްލޯމަރޭޓަށް "ސްކައިޑާންސް"ގެ ނަން ދިނުމަށް ނިންމައިފި އެވެ.
އެކަން ރަސްމީކޮށް އިއްޔެ އިއުލާންކުރެއްވީ އެ ކުންފުނީގެ ޗެއާމަން އަދި ސީއީއޯ ޑޭވިޑް އެލިސަން އެވެ.
ރިޕޯޓްތައް ބުނި ގޮތުގައި، 110 ބިލިއަން އެމެރިކާ ޑޮލަރުގެ އަގުހުރި މި ދެ ކުންފުނި އެއްކޮށްލުމުގެ މުއާމަލާތް އަންނަ އަންގާރަ ދުވަހު ފުރިހަމަވާނެ އެވެ.
ޑޭވިޑް އެލިސަން ހާމަކުރެއްވި ގޮތުގައި، ކުންފުނީގެ މައި ނަމަކަށް "ސްކައިޑާންސް" ހަމަޖެއްސި ނަމަވެސް، ޕެރަމައުންޓް އާއި ވޯނާ ބްރޯސްގެ ވަކިވަކި ބްރޭންޑްތަކާއި ސްޓޫޑިއޯތަކުގެ އަމިއްލަ އައިޑެންޓިޓީ އާއި ތާރީޚަށް އެއްވެސް ބަދަލެއް ނާންނާނެ އެވެ.
ދެ ކުންފުނި އެއްކޮށްލުމާ އެކު، ހޮލީވުޑްގެ އެންމެ މަޝްހޫރު ފްރެންޗައިޒްތައް ކަމަށްވާ "ހެރީ ޕޮޓާ"، "ލޯޑް އޮފް ދަ ރިންގްސް"، "ޓޮޕް ގަން"، "މިޝަން އިމްޕޮސިބަލް" އަދި "ޑީސީ ޔުނިވާސް"ގެ ފިލްމުތަކާއި ސީރީޒްތައް އަންނާނީ އެއް ކުންފުންޏެއްގެ ދަށަށެވެ.
މީގެ އިތުރުން، އެޗްބީއޯ މެކްސް އާއި ޕެރަމައުންޓް ޕްލަސް ސްޓްރީމިން ހިދުމަތްތަކާއި ސީބީއެސް އަދި ސީއެންއެން ކަހަލަ ބޮޑެތި ޓީވީ ނެޓްވޯކްތައް ވެސް ހިންގާނީ އެ ކުންފުނީގެ ދަށުންނެވެ.
ކުންފުނިތައް އެއްކޮށްލުމަށް ފަހު، އަންނަ އަންގާރަ ދުވަހުން ފެށިގެން ނިއުޔޯކް ސްޓޮކް އެކްސްޗޭންޖްގައި އެ ކުންފުނީގެ ހިއްސާ ވިޔަފާރިކުރާނީ "SKYD" ޓިކާގެ ދަށުންނެވެ. މިއީ ހޮލީވުޑްގެ ތާރީޚުގައި ވެސް ފިލްމު އުފައްދާ ކުންފުނިތަކެއް އެއްކޮށްލުމަށް ހިންގޭ އެންމެ ބޮޑު މާލީ މުއާމަލާތެވެ.