ކޮންމެ ހިއްސާއަކަށް 54.20 ޑޮލަރުގެ ރޭޓުން ޓުވިޓާ އެއްކޮށް ގަންނަން މަޝްހޫރު މަހުޖަނު އީލޮން މަސްކް މިއަދު ހުށަހަޅުއްވައިފި އެވެ. އެއީ ގާތްގަނޑަކަށް 48 ބިލިއަން ޑޮލަރެވެ.
މީޑިއާ ރިޕޯޓްތައް ބުނާގޮތުން، 9.2 ޕަސެންޓާއެކު މިހާރު ވެސް ޓުވިޓާގެ އެންމެ ބޮޑު ހިއްސާއެއް އޮންނަ އީލޮން، އެ ސޯޝަލް މީޑިއާ ކުންފުނި އޭނާ އަށް ވިއްކާލަން އެދިވަޑައިގަތީ އެއީ ހިޔާލުފާޅުކުރުމުގެ ފުރިހަމަ މިނިވަންކަން އޮންނަ ޖެހޭ ޕްލެޓްފޯމެއް ކަމަށް ވިދާޅުވެ އެވެ.
އީލޮން އަށް އެ ކުންފުނި ވިއްކާލައިފި ނަމަ، ޓުވިޓާ ވާނީ ޕްރައިވެޓް ކުންފުންޏަކަށެވެ. މިހާރު އެއީ އާންމުންނަށް ހިއްސާ ވިއްކާފައި އޮންނަ ޕަބްލިކް ކުންފުންޏެކެވެ.
"އަހަރެން ޓުވިޓާގައި އިންވެސްޓްކުރީ، އެއީ އެންމެންނަށް ވެސް ހިޔާލުފާޅުކުރުމުގެ މިނިވަންކަން ލިބޭނެ ތަނެއް ކަމަށް ދެކޭތީ. ޑިމޮކްރެސީއެއް އެންމެ ރަނގަޅަށް ހިނގާނީ ހިޔާލުފާޅުކުރުމުގެ މިނިވަންކަން އޮވެގެން،" ޓުވިޓާގެ ޗެއާމަން ބްރެޓް ޓެއިލާ އަށް ފޮނުއްވި ސިޓީއެއްގައި އީލޮން ވިދާޅުވި އެވެ.
އޭނާ ގަބޫލުކުރައްވާ ގޮތުގައި މިހާރު ޓުވިޓާއަކީ ހިޔާލުފާޅުކުރުމުގެ މިނިވަންކަން ނެތް ތަނެކެވެ. އެހެން އެކަން އޮވެއްޖެ ނަމަ، އެ ކުންފުނި ކުރިއަރައިގެން ނުދާނެ ކަމަށް ވެސް ވިދާޅުވި އެވެ.
"އެހެންވެ އަހަރެން މި ހުށަހެޅީ 54.20 ޑޮލަރުގެ ރޭޓުން، ނަގުދު ފައިސާ އިން ޓުވިޓާގެ 100 ޕަސެންޓް ހިއްސާ ގަތުމަށް. އެއީ އަހަރެން ޓުވިޓާގެ ހިއްސާ ގަތުމުގެ އެއް ދުވަސްކުރިން 54 ޕަސެންޓްގެ އަރަނި. އަދި ޓުވިޓާގެ ހިއްސާ ގަތްކަން ރަސްމީކޮށް އިއުލާންކުރާ ދުވަހު 34 ޕަސެންޓްގެ އަރަންޏަކަށް ވާނެ،" އީލޮން ވިދާޅުވި އެވެ.
"މިއީ އަހަންނަށް ދެވޭނެ އެންމެ ރަނގަޅު އަދި އެންމެފަހުގެ އޮފާ. އަދި މި އޮފާ ގަބޫލުނުކޮށްފި ނަމަ، ޓުވިޓާގައި އަހަރެންގެ ހިއްސާ އޮތުމާއި މެދުގައި ދެވަނަ ވިސްނުމަކަށް ދާނަން."
ހިޔާލުފާޅުކުރުމުގެ މިނިވަންކަން ނެތް ކަމަށް ވިދާޅުވެ، މީގެ ކުރިން ޓުވިޓާގައި ޓުވިޓާ އަށް ވަރަށް ބޮޑަށް ފާޑުވިދާޅުވެފައިވާ އީލޮން، އެ އެޕްގެ ހިއްސާ ގަތްކަން އިއުލާން ކުރެއްވީ މި މަހުގެ ހަތަރެއްގަ އެވެ. އޭނާ ކުންފުނީގެ ހިއްސާ ގަތަސް، ޓުވިޓާގެ ބޯޑުގައި ހިމެނިވަޑައިނުގަންނަވާނެ ކަމަށް އަމިއްލަ އަށް ވިދާޅުވި އެވެ.
މިދިޔަ ބުދަ ދުވަހާ ހަމަ އަށް ޓުވިޓާގެ ހިއްސާއެއްގެ އަގުހުރީ 45.85 ޑޮލަރުގަ އެވެ. އެއީ 12 ޕަސެންޓްގެ ބޮޑުވުމެކެވެ.
