އިރާއި ހަނދުގެ ދައުރުވުންތަކާ އެކު 2039 ވަނަ އަހަރަކީ މުޅި އިސްލާމީ އުންމަތަށް ވަރަށް ހާއްސަ އަދި ދިރިއުޅުމުގައި ވަރަށް މަދުން ނޫނީ ތަޖުރިބާ ނުކުރެވޭނެ އަހަރަކަށް ވާނެ އެވެ. ފަލަކީ ހިސާބުތަކުން ދައްކާގޮތުގައި، 2039 ވަނަ އަހަރު ތިން އީދާއި ދެ ހައްޖު މޫސުން ބައްދަލުކުރާނެ އެވެ. މިއީ ކިހިނެއް ވާނެ ކަމެއް ހެއްޔެވެ؟ މީގެ ސިއްރަކީ ކޮބައި ހެއްޔެވެ؟
މި އާދަޔާ ހިލާފު ހާލަތު މެދުވެރިވަނީ އަހަރެމެން ބޭނުންކުރާ ގްރެގޯރިއަން ކަލަންޑަރާއި (މީލާދީ ސަނަތު) އިސްލާމީ ހިޖުރީ ކަލަންޑަރުގެ ދުވަސްތައް ދައުރުވާ ގޮތުންނެވެ.
މީލާދީ ކަލަންޑަރަކީ އިރުގެ ދައުރުވުންތަކުގެ މައްޗަށް ބަލައިގެން ހަދާފައިވާ ކަލަންޑަރެކެވެ. މިއީ އަހަރަކު 365 ދުވަހެވެ. ހިޖުރީ ކަލަންޑަރަކީ ހަނދުގެ ދައުރުވުމަށް އޮންނަ ކަލަންޑަރެކެވެ. މިއީ އަހަރަކު ގާތްގަނޑަކަށް 354 ދުވަހެވެ.
މި ދެ ކަލަންޑަރުގެ ދެމެދުގައި 10 ނުވަތަ 11 ދުވަހުގެ ތަފާތެއް ހުރެ އެވެ. މިހެންވުމުން ކޮންމެ މީލާދީ އަހަރަކު، ހިޖުރީ މަސްތައް 10 ނުވަތަ 11 ދުވަސް ކުރިއަށް ޖެހެ އެވެ. މިގޮތަށް ބަދަލުވަމުން ގޮސް، ގާތްގަނޑަކަށް ކޮންމެ 33 އަހަރަކުން އެއްފަހަރު، އެއް މީލާދީ އަހަރެއްގެ ތެރެއަށް ދެ ހިޖުރީ އަހަރެއްގެ ދުވަސްތައް ވަދެ އެވެ.
2039 ވަނަ އަހަރުގެ މުހިންމު ތާރީހުތައް
- ޖެނުއަރީ 5 – 6، 2039: ހައްޖު މޫސުމާއި އަޟްހާ އީދު — މިއީ ހިޖުރީ ސަނަތުން 1460 ވަނަ އަހަރުގެ ޒުލްހިއްޖާ މަހެވެ.
- އޮކްޓޫބަރު 19، 2039: ފިތުރު އީދު — މިއީ ހިޖުރީ ސަނަތުން 1461 ވަނަ އަހަރުގެ ޝައްވާލް މަހެވެ.
- ޑިސެމްބަރު 25 – 26، 2039: އަނެއްކާވެސް ހައްޖު މޫސުމާއި ބޮޑު އީދު — މިއީ ހިޖުރީ ސަނަތުން 1461 ވަނަ އަހަރުގެ ޒުލްހިއްޖާ މަހެވެ.
އެހެންވެ މިއީ ދިރިއުޅުމުގެ އާދަކާދަތަކަށް ބޮޑު ބަދަލެއް އަންނާނެ އަހަރެކެވެ. މީލާދީ އަހަރެއް ފެށޭއިރު ވެސް އީދެކެވެ. އަދި އަހަރު ނިމޭނީ ވެސް އީދުގެ އުފާވެރިކަމާއި އާއިލީ ބައްދަލުވުންތަކުގެ ތެރެއިންނެވެ.
މީގެ ކުރިން އެއް މީލާދީ އަހަރެއްގެ ތެރޭގައި ތިން އީދާއި ދެ ހައްޖު މޫސުން ބައްދަލުކުރި ތާރީހީ އަހަރުތަކަކީ:
- 2006 ވަނަ އަހަރު: އެންމެ ފަހުން މިފަދަ އާދަޔާޚިލާފު ދިމާވުމެއް އިސްލާމީ އުންމަތް ތަޖުރިބާކުރީ 2006 ގަ އެވެ. އެ އަހަރުގެ ފުރަތަމަ ބޮޑު އީދު އަދި ހައްޖު މޫސުން ދިމާވީ ޖެނުއަރީ 10 އަަށެވެ. އަދި އޭގެ ފަހުން އޮކްޓޯބަރު މަހު ކުޑަ އީދު ބައްދަލުކޮށް، އަހަރު ނިމެނިކޮށް ޑިސެމްބަރު 31 ގައި ދެވަނަ ފަހަރަށް ބޮޑު އީދާއި ހައްޖު މޫސުން ކުރިމަތިވި އެވެ.
- 1974 ވަނަ އަހަރު: 2006 ގެ ކުރިން މިފަދަ ކަމެއް ހިނގާފައިވަނީ 1974 ގަ އެވެ. އެ އަހަރުގެ ޖެނުއަރީ 3–4 ގައި ފުރަތަމަ ހައްޖާއި ބޮޑު އީދު އައި އިރު، ދެވަނަ ހައްޖާއި ބޮޑު އީދު އައީ އެ އަހަރުގެ ޑިސެމްބަރު 23–24 ގަ އެވެ.