ދަރިއަކު ހޯދާ ނަމަ ބައްޕަ ވެސް ކެއުމަށް ބަލަންޖެހޭ

ބައްޕަގެ ކެއުން ބަހައްޓާ ގޮތުން ދަރިފުޅުގެ ސިއްހަތަށް ވަރަށް ބޮޑެތި އަސަރުތައް ކުރާ ކަމަށް ސައިންސްވެރިން ބުނެފި އެވެ. މި ހޯދުން ބުނާ ގޮތުން ދަރިއަކު ހޯދަން ގަސްތުކުރާ ނަމަ، ކުއްޖާ ގަރުބަގަތުމުގެ ކުރިން، ބައްޕަ ވެސް ކާނާއަށް ފަރުވާތެރިވާން ޖެހޭނެ އެވެ. ސަބަބަކީ އެކަމުގެ ސީދާ އަސަރު ދަރިފުޅަށް ކުރާތީ އެވެ.

މި ދިރާސާގައި ލަފާ ދީފައިވަނީ ދަރިން ހޯދަން މަސައްކަތްކުރާ ފިރިހެނުން ކޮންމެ ދުވަހެއްގެ ކެއުމުގައި ކަނޑުމަހާއި އެއްގަމު މަސް އަދި ތަރުކާރީ އާއި މޭވާ ގިނައިން ބޭނުން ކުރުމަށެވެ.

މި ހޯދުމުގައި ބުނެފައި ވަނީ ކާބޯހައިޑްރޭޓް މަދު، ޕްރޮޓީން ގިނަ ކާނާ ކައިގެން ހޯދާ ދަރިން އުފަންވުމަށް ފަހު އެ ކުދިންގެ ސިއްހަތު މާ ރަނގަޅުކަން ފާހަގަ ކުރެވިފައިވާ ކަމަށެވެ.

ސައިންސްވެރިން ދެނެގެންފައި ވަނީ ފިރިހެން މެހިތަކެއްގެ ކާނާއިން އޭގެ ދަރިންނަށް ކޮށްފައިވާ އަސަރުތަކެވެ. މެއްސާއި އިންސާނުންގެ 60 ޕަސެންޓް ޖީން އެއްގޮތެވެ. މި ހޯދުމުގެ ނަތީޖާ ދެއްކި ގޮތުގައި ދަރިފުޅު ގަރުބަގަތުމުގެ ކުރިން ބައްޕައިން ކާބޯހައިޑްރޭޓް ގިނައިން ހުންނަ، ޕްރޮޓީން މަދު ކާނާ ކައިފައި ހުރި ނަމަ ދަރިފުޅު ސަލާމަތްވުމުގެ އުންމީދު ކުޑަ އެވެ.

މި ދިރާސާކުރި ޓީމުން ވަނީ ފިރިހެން މެހިތަކެއްގެ ކެއުމަށް ބަދަލު ގެނެސް ދުވަސްކޮޅަކު ބެހެއްޓުމަށް ފަހު އަންހެން މެހިތަކުގެ ކައިރިއަށް ފޮނުވައިގެން އޭގެ ފަހުން އެ އެއްޗިއްސަށް ލިބުނު ދަރިންގެ ސިއްހަތު ހުރި ގޮތެއް ދެނެގެންފަ އެވެ.

ސައިންސްވެރިން ބުނަނީ ދަރިން ހޯދަން ބޭނުން ފިރިހެނުން ތަރުކާރީ އާއި މޭވާ އަދި އެއްގަމު މަހާއި ކަނޑުމަހުގެ ބާވަތްތައް ކޮންމެ ދުވަހަކު ވެސް ކެއުމުގައި ހިމެނުމަށާއި ގޮދަންފުށުން ތައްޔާރުކޮށްފައި ހުރި ރޮއްޓާއި ޕާން، ހަނޑޫ އަދި ޕާސްޓާ ފަދަ ތަކެތި ކެއުމާ ދުރުވުމަށެވެ.

ހަކުރު ގިނައިން އެކުލެވޭ އެއްޗިއްސާއި ކޭކު އަދި ބިސްކޯދު ފަދަ ތަކެތި ވެސް އެއްގޮތަކަށް ވެސް ބޭނުން ނުކުރުމަށެވެ.

ރިސާޗަރެއް ކަމަށްވާ މައިކަލް ޕޮލަކް ވިދާޅުވީ އިންސާނުންނާއި ޖަނަވާރުން އަދި ދޫނި ސޫފާސޫފީގެ މެދުގައި ވެސް ގުދުރަތީ ގޮތުން އޮންނަނީ މަންމައިން އެބައިމީހުންގެ ދަރިންނަށް ލޯބިދީ އަޅާލާ އުސޫލު ކަމަށެވެ. އެހެންވެ މަންމައިން ކެއުމުގައި ގެންގުޅޭ އާދަތަކުން ދަރިންނަށް ކުރާ އަސަރުތަކާ ވަރަށް ވަރުގަދަ ގުޅުމެއް ވާކަމަށް ގަބޫލު ކުރެވުނެވެ. ނަމަވެސް ބައްޕައިންގެ ކެއުމުގެ އާދަތަކުން އެމީހުންގެ ދަރިންނަށް ކުރާ އަސަރު ފެނުމަކީ ލިބުނު ވަރަށް ބޮޑު ހައިރާން ކަމެކެވެ.

ޖާނަލް ޕްރޮސީޑިންގްސް އޮފް ދަ ރޯޔަލް ސޮސައިޓީ ބީ ގައި ޝާއިއުކޮށްފައިވާ މި ދިރާސާއަށް އެކްސްޕެރިމެންޓެއް ހެދިއިރު އަންހެން މެހިތަކަށް ކާން ދިނީ ހަމަ ކުރިން ވެސް ކާންދޭ އެއްޗިއްސެވެ. ނަމަވެސް ފިރިހެން މެހިތަކަށް ކާން ދިނީ ޔީސްޓާއި ހަކުރު ގިނައިން ބޭނުންކޮށްގެން ތައްޔާރުކޮށްފައިވާ ކެއުމެކެވެ. މި ކެއުން 17 ދުވަސް ވަންދެން ދިނުމަށް ފަހު ދެ އަންހެން މެހި ކައިރިއަށް ފިރިހެން މެހިތައް ދޫކޮށްލި އެވެ. ނަތީޖާ ދެއްކި ގޮތުން ގަރުބަގަތް ދަރިފަނިތަކުގެ ތެރެއިން ސަލާމަތްވުމުގެ ފުރުސަތު އެންމެ ބޮޑުވެފައި ވަނީ ކާބޯހައިޑްރޭޓް މަދުން، ޕްރޮޓީން ގިނައިން ދިން ދަރިފަނިތަކެވެ.