އިނގިރޭސިވިލާތުގެ ސްކޫލްތަކުން ސްކާޓް ޔުނިފޯމް މަނާކުރަނީ

އިނގިރޭސިވިލާތުގެ ސްކޫލްތަކުގައި ބޭނުންކުރާ ޔުނިފޯމަށް ގެންނަން ނިންމާފައިވާ އިސްލާހުތަކާ އެކު، އެ ގައުމުގެ 40 އަށް ވުރެ ގިނަ ސްކޫލްގައި އަންހެން ދަރިވަރުންނަށް ސްކާޓް ޔުނިފޯމް މަނާކޮށްފި އެވެ.

މި ބަދަލާ އެކު ސްކާޓްގެ ބަދަލުގައި އަންހެން ދަރިވަރުން ވެސް ބޭނުން ކުރާނީ ފިރިހެން ދަރިވަރުން ލާ ފަޓުލޫން ކަހަލަ ހަރުވާޅެކެވެ. ސަންޑޭ ޓައިމްސް އިން ރިޕޯޓްކޮށްފައިވާ ގޮތުގައި އިނގިރޭސިވިލާތުގެ އެހެން ބައެއް ސްކޫލްތަކުން ވަނީ މި ބަދަލަށް ތަބާވާން ނިންމައިފަ އެވެ.

އަންހެން ދަރިވަރުންނަށް ސްކާޓް ޔުނިފޯމް މިދިޔަ އަހަރު އެންމެ ފުރަތަމަ މަނާކުރި އެއް ސްކޫލަކީ ޕްރިއޮރީ ސްކޫލެވެ. މިފަދަ ބަދަލެއް ގެންނަ ނިންމި އެއް ސަބަބަކީ އަންހެން ދަރިވަރުންނާއި ފިރިހެން ދަރިވަރުން ތަފާތު ނުކުރަން ކަމަށް އެ ތަނުން ބުނެފައިވެ އެވެ.

ކޮޕްލެސްޓަން ހައި ސްކޫލުން ބުނި ގޮތުގައި ދަރިވަރުން ސްކޫލް ޔުނިފޯމާ އެކު ސްކިނީ ޖީންސް ލުމާއި މޫނުގެ ތަންތަން ތޮރުފުން ފަދަ ކަންކަން މަނާކޮށްފައި އޮންނަ ގޮތަށް ސްކާޓަކީ މިހާރު އެ ސްކޫލްގައި މަނާ އެއްޗެކެވެ.

އެހެން ބައެއް ސްކޫލްތަކުން ބުނެފައިވާ ގޮތުގައި ސްކާޓް މަނާކުރަން ނިންމީ ދިމާވާ ލަދުވެތި ހާދިސާތަކުން ވެސް ރައްކާތެރިވުމުގެ ގޮތުންނެވެ.

އެކަމަކު މި ބަދަލާ މެދު ބައެއް މީހުން ވަނީ ހިތްހަމަނުޖެހުން ފާޅުކޮށް، ސޯޝަލް މީޑިއާގައި އެ މީހުންގެ ޝުއޫރުތައް ބަންޑުންކޮށްލައިފަ އެވެ.

ބައެއް ދަރިވަރުން ވެސް ވަނީ ސްކާޓް މަނާކުރާތީ އެއީ އެހާ ރަނގަޅު ކަމެއް ނޫން ކަމަށް ބުނެފަ އެވެ. އަދި އެކަމާ ދެކޮޅަށް ބައެއް ސްކޫލްތަކުގެ ދަރިވަރުން މިހާރު އަންނަނީ ޕެޓިޝަންތަކުގައި ސޮއި ވެސް ކުރަމުންނެވެ.

ބައެއް މީހުން ބުނި ގޮތުގައި ހެދުން އަޅާ ގޮތަކުން ދެ ޖިންސްގެ މެދުގައި ތަފާތު ކުރުން އޮންނަ ކަމަށް ގަބޫލު ކުރުމަކީ ބޯދާ ހިޔާލެކެވެ. އަދި ޖިސްމާނީ ގޮތުން ވެސް އަންހެނުންނާއި ފިރިހެނުން ތަފާތު އިރު، ދެ ޖިންސް އެއްގޮތަކަށް ހެދުން އަޅުވައިގެން ތަފާތު ކުރުންތައް ނައްތައިލަން އުޅޭ ކަމަށް ބުނުމަކީ ވަރަށް ކޮށި ވިސްނުމެއްގެ ތެރެއިން ނިންމާފައިވާ ނިންމުމެއް ކަމަށް ބުނެފައިވެ އެވެ.

އެހެންވެ މި ނިންމުމަކީ ދެވަނަ ވިސްނުމަކަށް ދާން ޖެހޭ ކަމެއް ކަމަށާއި މިކަމާ ބެހޭ ގޮތުން އަންހެން ދަރިވަރުންގެ ހިޔާލު ވެސް ސްކޫލްތަކުން ހޯދަން ޖެހޭނެ ކަމަށް އެއް ބަޔަކު ގަބޫލުކުރެ އެވެ.