ފިރިހެނުންނަށް މުހިންމު ކާނާއެއް

ފިރިހެނުންގެ ދަރިފަނީގެ ކޮލިޓީ ދަށްވެ ދަރިން ނުލިބުމަކީ ގިނަ ބަޔަކަށް މިހާރު ވެސް ދިމާވާ މައްސަލައެކެވެ. މިކަމަށް ތަފާތު އެކި ކަހަލަ ހައްލުތައް ވެސް ހޯދައިދޭން ކުރެވޭ މަސައްކަތްތައް ގިނަ އެވެ. އެގޮތުން ޔޯގާ ކަހަލަ ކަސްރަތު ގަވައިދުން ކުރުމަކީ ވެސް ފިރިހެނުންނަށް ދޭ އިރުޝާދެކެވެ. މީގެ އިތުރުން ތާޒާ މޭވާ އާއި ތަރުކާރީ ކެއުން ވެސް މުހިންމެވެ.

މި ފަހަރު ވެސް ހަމަ މިކަމަށް އެހީވެދޭނެ އެހެން ކަމެއްގެ ވާހަކަ އެވެ. ދިރާސާއެއްގައި މިހާރު ބުނަނީ ފިރިހެނުން ކޮންމެ ދުވަހަކު ވެސް ނަޓްސްގެ ބާވަތްތައް ކާ ނަމަ، ދަރިފަނި އާލާވުމަށް މަގުފަހިވާ ކަމަށެވެ. އެގޮތުން ގަވައިދުން ކޮންމެ ދުވަހަކު ވެސް ނަޓްސް ކާ ނަމަ، ދަރިފަނީގެ ކޮލިޓީ ރަނގަޅުވާ ކަމަށް ބުންޏެވެ.

ނަޓްސްއަކީ އޮމެގާ-3 ފެޓީ އެސިޑްސް އާއި އެންޓިއޮކްސިޑަންޓްތަކުން މުއްސަދިވެފައިވާ އެއްޗަކަށްވާތީ، މިއީ ދަރިފަނި އާލާވުމަށް ބާރު އަޅައިދޭ އެއްޗެކެވެ.

ސްޕެއިންގެ ރިސާޗް ޓީމަކުން 119 ޒުވާން ފިރިހެނުންނަށް 14 ހަފުތާ ވަންދެން އެކި ކަހަލަ ނަޓްސްގެ ބާވަތްތައް ކޮންމެ ދުވަހަކު ކާންދީގެން، ހެދި ޓެސްޓްތަކުން ދެއްކި ގޮތުގައި ގަވައިދުން ކޮންމެ ދުވަހަކު ވެސް ނަޓްސް ކެއި ފިރިހެނުންގެ ދަރިފަނީގެ ކޮލިޓީ އެ ނޫން މީހުންނާ އަޅާބެލި އިރު މާ ބޮޑަށް ވެސް ރަނގަޅެވެ.

އެހެންވެ ދުވާލަކު، މަދުވެގެން 60 ގްރާމް ނަޓްސްއަކީ ފުދޭނެ މިންވަރެކެވެ. އެގޮތުން އާމަންޑާއި ވޮލްނަޓާއި ހެޒެލްނަޓްސް ފަދަ ބާވަތްތައް މީގެ ތެރޭގައި ހިމެނުން ރަނގަޅު ކަމަށް ދިރާސާ ޓީމުން ބުންޏެވެ.