ފަތްޖަހައިލެވޭ ފޯނުގެ ވާހަކަ މިހާރު އެއްވެސް ބަޔަކަށް އަލެއް ނުވާނެ އެވެ. އެ ޒާތުގެ ފޯނު އެންމެ ފުރަތަމަ ނެރުމުގެ ޝަރަފު ދެކުނު ކޮރެއާގެ ސެމްސަންގުން ހޯދާފައިވާ އިރު، ޗައިނާގެ ވާވޭ އާއި ޝޯމީގެ އިތުރުން މަޝްހޫރު އެޕަލް ވެސް މިހާރު އޮތީ މި ރޭހުގެ ތެރޭގަ އެވެ،
މިހާރު އަންދާޒާ ކުރެވޭ ގޮތުން ޗައިނާގެ އޮޕޯ ވެސް މާ ލަހެއް ނުވެ، ފަތްޖަހައިލެވޭ ފޯނު ބާޒާރަށް ނެރެފާނެ އެވެ. އެ ކުންފުނިން ވަނީ ފަތްޖަހައިލެވޭ ފޯނުގެ ޕްރޮޓޯޓައިޕެއް ދައްކާލައިފަ އެވެ.
ޓެކް ހަބަރުތައް ގެނެސްދޭ ނޫސްތަކުން ބުނާ ގޮތުގައި އޮޕޯ އިން ދައްކައިލި ފަތްޖަހައިލެވޭ ފޯނު މިދިޔަ ހަފުތާގައި ބާސެލޯނާގައި ބޭއްވި މޮބައިލް ވޯލްޑް ކޮންގްރެސް (އެމްޑަބްލިއުސީ) ގައި ދައްކައިލި ވާވޭގެ މޭޓް އެކްސްގެ ފީޗާތަކާ އެއްގޮތް ކަންތައްތަކެއް ހުރިކަން ފާހަގަކުރެެވެ އެވެ.
ނަމަވެސް އޮޕޯގެ ފަތްޖަހައިލެވޭ ފޯނުގެ މަސައްކަތް ވަރަށް ބާރަށް މިހާރު ކުރިއަށްދާކަން އެ ކުންފުނީގެ ނައިބު ރައީސް ބްރަޔަން ޝެން ހޯމަ ދުވަހު ވިދާޅުވި ނަމަވެސް ފޯނާ ބެހޭ އެއްވެސް ތަފުސީލެއް ނުދެ އެވެ. އަދި ފޯނު ބާޒާރަށް ނެރޭނެ ދުވަހެއް ވެސް އިއުލާނެއް ނުކުރެ އެވެ.
ނަމަވެސް އޮޕޯ އިން ދައްކައިލި ނަމޫނާ އަށް ބަލާ އިރު، މިއީ ފަތްނުޖައި އޮންނަ އިރު، ދެ ސްކްރީން އިންނަ އަދި ފަށްޖަހައިލުމުން އެކައްޗަށް ބަދަލުކޮށްލާ ކަހަލަ ފޯނެކެވެ. އެގޮތުން ފަތްޖަހައިލުމުން ޑިސްޕްލޭގައި 8 އިންޗި ހުންނާނެ ކަމަށް ބެލެވެ އެވެ.