ޔުނިވަސިޓީ ޓިއުޝަން ފީ އާއި ކުއްޔަށް ހުންނަ ތަނުގެ ކުލި ދައްކަން ދަތިވި ކެނެޑާގެ ފޭނަކަށް އެމެރިކާގެ މަޝްހޫރު ލަވަކިޔުންތެރިޔާ ޓޭލާ ސްވިފްޓް އެހީއެއް ދީފި އެވެ.
ކެނެޑާގެ ވޯޓަލޫ ޔުނިވަސިޓީގައި ކިޔަވަމުން އަންނަ އައިޝާ ޚުއްރަމް ނަމަކަށް ކިޔާ ފޭނަށް ޓޭލާ ހަދިޔާކޮށްފައި ވަނީ 6,386.47 ކެނެޑާ ޑޮލަރު (4,828.52 ޑޮލަރު) އެވެ. މިކަން އައިޝާ އިންސްޓަގްރާމްގައި ހިއްސާކުރަމުން ބުނީ ޓޭލާ ދިން އެހީގެ ސަބަބުން އުފަލުން ގޮސް އޭނާ އަށް ކުރެވުނުހާ ކަމަކީ ވެސް ރުއިން ކަމަށެވެ. އަދި ޓޭލާ ދެކެ ވަރަށް ލޯބިވާ ކަމަށް ބުންޏެވެ.
ޓޭލާ އާއި އައިޝާ އެންމެ ފުރަތަމަ ދިމާވީ މިދިޔަ އަހަރު ޓޭލާ ކުރިއަށް ގެންދިޔަ "ރެޕިއުޓޭޝަން" ޓުއާގެ ތެރެއިން މިދިޔަ އަހަރުގެ އޮގަސްޓް މަހުގެ ތެރޭގަ އެވެ.
އޭގެ ފަހުން ދެ މީހުންގެ މެދުގައި އެކުވެރިކަން އުފެދި ބައެއް ސޯޝަލް އެޕްތައް މެދުވެރިކޮށް އަބަދު ވެސް މުއާމަލާތް ކުރެވޭ ކަމަށް އައިޝާ ބުންޏެވެ. އަދި އޭނާގެ ޕޯސްޓްތަކަށް ޓޭލާ އާންމުކޮށް ލައިކް ވެސް ދޭ ކަމަށް އައިޝާ ބުންޏެވެ.
ފާއިތުވި އަހަރު އެންމެ ބޮޑު އާމްދަނީއެއް ލިބުނު ސެލެބްރިޓީގެ މަގާމު ވެސް ލިބުނު ޓޭލާއަކީ އަބަދު ވެސް އެކި ކަންކަމަށް އެހީވަމުން އަންނަ ފަންނާނެކެވެ.