ހިނގައިގެން އެއްކުރި ފައިސާ އިން ދުނިޔޭގެ ރެކޯޑް ފޮތަށް

ފައިސާ އެއްކުރަން އެކަނިމާއެކަނި ކުރިއަށް ގެންދިޔަ ޗެރިޓީ ވޯކާ އެކު އިނގިރޭސިވިލާތުގެ ކުރީގެ ކެޕްޓަން ޓޮމް މޯ އަށް ދުނިޔޭގެ ރެކޯޑް ފޮތުން ޖާގަ ލިބިއްޖެ އެވެ.

ބުރާސްފަތި ދުވަހު 100 ވަނަ އުފަން ދުވަސް ފާހަގަކުރި މޯ ވަނީ ކޮރޯނާވައިރަހާ އެކު ކުރިމަތިވި ބޮޑު ބަލިމަޑުކަމާ އެކު އިނގިރޭސިވިލާތުގެ ސިއްހީ ދާއިރާގައި މަސައްކަތްކުރާ ފަރާތްތަކަށް އެހީވުމުގެ ގޮތުން ގޭގެ ބަގީޗާތެރޭގައި ހިނގައިގެން 28 މިލިއަން ޕައުންޑް (36 މިލިއަން ޑޮލަރު) އެއްކޮށްފަ އެވެ.

އޭނާ މިދިޔަ މާޗް މަހުގެ ތެރޭގައި ފެށި ޗެރިޓީ ވޯކް ވެގެން ދިޔައީ ވަރަށް ގިނަ ބައެއްގެ ތަރުހީބާއި ސަމާލުކަން ލިބުނު ކަމަކަށެވެ. އެއާ އެކު ގިނަ އަދަދެއްގެ ބަޔަކު ދިޔައީ ފައިސާ ހަދިޔާކުރަމުންނެވެ. މޯގެ އަމާޒަކަށްވީ އިނގިރޭސިވިލާތުގެ ނެޝަނަލް ހެލްތު ސާވިސް (އެންއެޗްއެސް) 1،000 ޕައުންޑް ހަދިޔާކުރަން ބަގީޗާ ތެރޭގައި 100 ބުރު ޖަހާށެވެ. އެ އަދަދު އޭނާ ހަމަކުރީ މި މަހުގެ 16 ވަނަ ދުވަހު އެވެ.

ނަމަވެސް އޭނާ ފެށި ހިނގުމުގެ ހަރަކާތަށް އުންމީދު ވެސް ނުކުރާ ވަރުގެ ތަރުހީބެއް ލިބެން ފެށުމުން ހިނގުމުގެ ހަރަކާތް އުފަން ދުވަހާ ހަމައަށް ކުރިއަށް ގެންދިޔަ އެވެ.

މީގެ ކުރިން ޗެރިޓީ ވޯކަކުން އެންމެ ގިނަ އަދަދަކަށް ފައިސާ އެއްކުރި މީހަކީ ޕްރޮސްތެޓިކް ފަޔަކާ އެކު ހިތްވަރު ދެއްކީ 1980 ގައި ކެނެޑާގެ ޓެރީ ފޮކްސް އެވެ. އޭނާ ވަނީ 1981 ގައި މަރުވެފަ އެވެ. ފޮކްސްގެ ޗެރިޓީން 5.4 މިލިއަން ޕައުންޑް (7 މިލިއަން ޑޮލަރު) އެއްކޮށްފައިވެ އެވެ.