އެޕަލް ކުންފުނީގެ އަގު ދެ ޓްރިލިއަން ޑޮލަރަށް އަރައިފި

ދުނިޔޭގެ އެންމެ ވަރުގަދަ ޓެކް ކުންފުނިތަކުގެ ތެރޭގައި ހިމެނޭ އެމެރިކާ އެޕަލް ކުންފުނީގެ އަގު ދެ ޓްރިލިއަން ޑޮލަރަށް އަރައިފި އެވެ.

މިއާ އެކު އެޕަލް ވެފައި ވަނީ ދެ ޓްރިލިއަނަށް އަގު އެރި އެމެރިކާގެ ފުރަތަމަ ކުންފުންޏަށެވެ. އެޕަލް އަކީ އެންމެ ފުރަތަމަ ޓްރިލިއަން ޑޮލަރުގެ މަގާމު ވެސް ލިބުނު ކުންފުންޏެވެ. އެއީ 2018 ގެ އޮގަސްޓްގަ އެވެ.

ދެ ޓްރިލިއަން ޑޮލަރުގެ ކުންފުނީގެ މަގާމު އެންމެ ފުރަތަމަ ލިބުނު ކުންފުންޏަކީ ސައުދި އަރަބިއްޔާގެ ތެޔޮ ކުންފުނި ސައުދީ އަރަމްކޯ އެވެ. އެއީ މިދިޔަ އަހަރުގެ ޑިސެމްބަރުގަ އެވެ.

މީޑިއާތަކުން ބުނި ގޮތުގައި ގޮތުގައި އެޕަލްގެ އަގު ދެ ޓްރިލިއަން ޑޮލަރަށް އެރުމާ އެކު ހިއްސާގެ ބާޒާރުގައި ވެސް ކުންފުނީގެ އަގު މިހާރު ވަނީ ވަރަށް ބޮޑުތަނުން އުފުލިފަ އެވެ. އެގޮތުން ހިއްސާގެ އަގު 60 ޕަސެންޓާ ހަމަ އަށް އުފުލުނެވެ.

އެޕަލް ކުންފުނީގެ އަގު ދެ ޓްރިލިއަން ޑޮލަރަށް އެރި އިރު އެ ކުންފުނިން މިހާރު ތައްޔާރުވަމުން އަންނަނީ އައިފޯން 12 ނެރުމަށެވެ. ބެލެވޭ ގޮތުން އޮކްޓޯބަރު މަހުގެ ތެރޭގައި ފޯނު ނެރޭނެ އެވެ. ދުނިޔޭގެ އިގުތިސާދުގައި އެޕަލް އެއް ދުވަހުން އަނެއް ދުވަހަށް ވަރުގަދަވަމުން އަންނަ އިރު އެ ކުންފުނީގެ ސީއީއޯގެ ޓިމް ކުކްގެ މިލްކިއްޔާތު ވެސް މި މަހުގެ ތެރޭގައި ވަނީ ބިލިއަން ޑޮލަރަށް އަރައިފަ އެވެ.

ކޮވިޑް-19 ގެ ބަލިމަޑުކަމުގެ ތެރޭގައި އެޕަލް ކުންފުނީގެ ވިޔަފާރި ކުރިން އަންދާޒާކުރި ވަރަށް ދަށްވި ނަމަވެސް އަހަރުގެ ތިން ވަނަ ކުއާޓަރުގައި އެ ކުންފުޏަށް އާމްދަނީގެ ގޮތުގައި 59.7 ބިލިއަން ޑޮލަރު ލިބިފައިވެ އެވެ.