ސައުދީ އަރާމްކޯ: ހިއްސާ ވިއްކައިގެން ދުނިޔޭގެ ރެކޯޑެއް

ރިޔާޒް (ޑިސެމްބަރު 6) - ސައުދީ އަރަބިއާގެ ގައުމީ ތެޔޮ ކުންފުނި އަރާމްކޯގެ އިނީޝަލް ޕަބްލިކް އޮފާރިން (އައިޕީއޯ) އަކީ ދުނިޔޭގެ އެންމެ ބޮޑު އައިޕީއޯ އަށް ވެ ރެކޯޑެއް ހަދައިފި އެވެ.

އަރާމްކޯ އިން ނެރުނު ބަޔާނެއްގައި ބުނެފައި ވަނީ އައިޕީއޯގައި 32 ރިޔާލް (8.53 ޑޮލަރު) އަށް ހިއްސާއެއް އަގުކޮށްގެން 25.6 ބިލިއަން ޑޮލަރު ހޯދާފައިވާ ކަމަށެވެ. މިއީ 2014 ވަނަ އަހަރު ޗައިނާގެ އަލީބާބާ ނިއު ޔޯކް ސްޓޮކް އެކްސްޗޭންޖުގައި ލިސްޓްކޮށްގެން ހޯދި 25 ބިލިއަން ޑޮލަރުގެ ރެކޯޑް މުގުރާލި އަދަދެކެވެ. އެ ލެވެލް އަށް ބަލާނަމަ އަރާމްކޯގެ އަގު 1.7 ޓްރިލިއަން ޑޮލަރަށް އަރާނެ އެވެ. އެއީ ވެސް ރެކޯޑެކެވެ. ލިސްޓްކޮށްފައިވާ އެންމެ އަގު ބޮޑު ކުންފުނި ކަމަށްވާ އެޕަލް އަށް ވުރެ އަރާމްކޯގެ އަގު އެރީ އެވެ.

އަރާމްކޯގެ 1.5 ޕަސެންޓް ހިއްސާ ވިއްކީ ސައުދީގެ ފަރާތްތަކާއި ސަރަހައްދީ އިންވެސްޓަރުންނަށެވެ. އަރާމްކޯ އިން ބުނީ މި ވަގުތު ލިސްޓް ކުރާނީ ތަދައްވުލް (ސައުދީ ސްޓޮކް އެކްސްޗޭންޖް) ގައި އެކަނި ކަމަށެވެ. އަދި އިންޓަނޭޝަނަލް ލިސްޓިންއާ ބެހޭ މައުލޫމާތު ފަހުން ހާމަކުރާނެ ކަމަށް ކުންފުނިން ވަނީ ބުނެފަ އެވެ.

އަރާމްކޯ- ދުނިޔޭގެ އެންމެ ބޮޑު ކުންފުނި

ދުނިޔޭގެ ކުންފުނިތަކުގެ ތެރޭން މިދިޔަ އަހަރު އެންމެ ބޮޑު ފައިދާއެއް ހޯދާފައި ވަނީ އަރާމްކޯ އެވެ. ކުންފުނީގެ އެކައުންޓްތަކާ ބެހޭ މައުލޫމާތު ފުރަތަމަ ފަހަރަށް ހާމަކުރިއިރު އަރާމްކޯ އަަށް މިދިޔަ އަހަރު ސާފު ފައިދާގެ ގޮތުގައި 111.1 ބިލިއަން ޑޮލަރު ލިބިފައިވާ ކަމަށް ހިސާބުތަކުން ދައްކަ އެވެ.

ޓެކްސް އަށް ނުކަނޑާ އަރާމްކޯގެ އާމްދަނީ އަކީ 224 ބިލިއަން ޑޮލަރެވެ. މިއީ ދުނިޔޭގެ އެންމެ ބޮޑު ފަސް ތެޔޮ ކުންފުނީގެ ފައިދާއާ ނުބައްދަލު އަދަދެކެވެ. އެމެރިކާގެ ތެޔޮ ކުންފުނި ޝެވްރޮން އާއި އެގްޒޮން މޯބިލް، އިނގިރޭސި ވިލާތުގެ ބީޕީ، އިނގިރޭސި ވިލާތާއި ހޮލެންޑުގެ ރޯޔަލް ޑަޗް ޝެލް އަދި ފްރާންސްގެ ޓޯޓަލް ކުންފުނީގެ ސާފު ފައިދާ އަކީ 80 ބިލިއަން ޑޮލަރެވެ. ފަސް ކުންފުނީގެ މިދިޔަ އަހަރުގެ އާމްދަނީ އަކީ 359.9 ބިލިއަން ޑޮލަރެވެ. އެމެރިކާގެ ޓެކް ކުންފުނި އެޕަލްގެ މިދިޔަ އަހަރުގެ ސާފު ފައިދާ އަކީ 50 ބިލިއަން ޑޮލަރެވެ.

އަރާމްކޯ އިން މިދިޔަ އަހަރު އެވްރެޖްކޮށް ވަނީ 10.3 މިލިއަން ފީފާ ތެޔޮ އުފައްދައިފަ އެވެ.