ޖަޕާނުގައި އާބާދީ އިތުރުވާ ރޭޓް ވަރަށް ބޮޑަށް ދަށްވެފައިވާތީ ކައިވެނިކޮށް، ދަރިން ހޯދަން ހިތްވަރު ދިނުމުގެ ގޮތުން އެ ގައުމުގައި އަލަށް ކައިވެނިކުރާ މީހުންނަށް ސަރުކާރުން 600،000 ޔެން (5,700 ޑޮލަރު) ގެ އެލަވަންސެއް ދޭން ނިންމައިފި އެވެ.
އޭޝިއާގެ އެންމެ ތަރައްގީ އެއް ގައުމު ކަމަށްވާ ޖަޕާނުގެ މީޑިއާތަކުން ބުނީ އެލަވަންސް ދޭން ފަށާނީ އަންނަ އަހަރުގެ އޭޕްރީލް މަހުން ފެށިގެން ކައިވެނިކުރާ މީހުންނަށް ކަމަށެވެ. ބޭނުމަކީ އުޅޭނެ ތަނަކާއި ދިރިއުޅުމުގެ އެހެން ހަރަދުތައް ހަމަޖައްސަން މަގުފަހިކޮށް ދިނުމެވެ.
މީޑިއާތަކުން ބުނި ގޮތުގައި ޖަޕާނުގައި ކައިވެނިކުރާ ޒުވާނުންގެ އަދަދު އިތުރުކޮށް، އާބާދީ ޒުވާން ކުރުމަށް ފަށާ މި ޕްރޮގްރާމްގެ އެންމެ ބޮޑު އެއް އަމާޒަކަށް ވާނީ ޒުވާން އުމުރުގައި ކައިވެނިކުރާ މީހުން އިތުރު ކުރުމެވެ. އަދި ސަރުކާރުން ބޭނުންވާ ވަރަށް މިކަމަށް ތަރުހީބު ލިބޭ ނަމަ އެލަންވަންސްގެ އަދަދު އިތުރުކުރަން ވެސް ކެބިނެޓިން ފާސްކޮށްފައިވާ ކަމަށް ބުންޏެވެ.
އެލަންވަންސްދޭ ޕްރޮގްރާމަށް ކުރިމަލެވޭނީ ވަކި ޝަރުތުތަކަކާ ވެސް އެކީގަ އެވެ. އެގޮތުން ކައިވެނިކުރާ ދެ މީހުންނަކީ އުމުރުން 40 އިން މަތީގެ މީހުންނަށް ވެގެން ނުވާނެ އެވެ. އަދި ދެ މީހުންނަށް ލިބޭ އާމްދަނީ އެއްކޮށްލުމުން 5.4 މިލިއަން ޔުއާނަށް ވުރެ އިތުރުވެގެން ނުވާނެ އެވެ. އަދި ކައިވެނިކުރާ ދެ މީހުންނަކީ އުމުރުން 35 އަހަރުން މަތީގެ ދެ މީހުން ނަމަ އެ މީހުންގެ އާމްދަނީ 4.8 މިލިއަން ޔުއާނަށް ވުރެ އިތުރުވެގެން ނުވާނެ އެވެ.
އަލަށް ކައިވެނިކުރާ މީހުންނަށް އެލަވަންސް ދޭ ޕްރޮގްރާމް މިދިޔަ ޖުލައި މަހުގެ ތެރޭގައި އިއުލާންކުރި ނަމަވެސް އެ ޕްރޮގްރާމަށް ތާއީދުކޮށްފައި ވަނީ ޖަޕާނުގެ 281 މުނިސިޕަލްޓީއަކުންނެވެ. އޭގެ މާނަ އަކީ އެކަމަށް ތާއީދުކުރަނީ ސިޓީގެ ނިސްބަތިން އެންމެ 15 ޕަސެންޓެވެ.
ޖަޕާން ފާހަގަކުރެވިފައި ވަނީ ޒުވާނުންގެ ނިސްބަތް މަދު އަދި ދުވަސްވީ މީހުންގެ އާބާދީ ބޮޑު ގައުމެއްގެ ގޮތުގަ އެވެ. މިހާރު ވެސް އެ ގައުމުގެ އާބާދީގެ 33.0 ޕަސަންޓަކީ 65 އަހަރުން މަތީގެ މީހުންނެވެ.
ނެޝަނަލް އިންސްޓިޓިއުޓް އޮފް ޕޮޕިއުލޭޝަން އެންޑް ސޯޝަލް ސެކިއުރިޓީން 2015 ގައި ޖަޕާނުގައި ހަދާފައިވާ ސާވޭއަކުން ދައްކާ ގޮތުގައި އެ ގައުމުގެ 25-34 އަހަރާ މެދުގެ 29.1 ޕަސަންޓް ފިރިހެނުންނާއި 17.8 ޕަސަންޓް އަންހެނުން ހުސްހަށި ބަޔަށް ތިބެނީ މާލީ ފުދުންތެރިކަން ކުޑަވެގެންނެވެ.
އެހެންވެ ސަރުކާރުން އަލަށް ފަށާ ޕްރޮގްރާމްވެގެން ދާނީ ކައިވެނިކުރަން ލިބޭ ވަރަށް ތްވަރަކަށް ކަމަށް ދިރާސާކުރާ ފަރާތްތަކުން ބުނެ އެވެ. ޖަޕާންގެ ސަރުކާރުން އަންނަނީ އެންމެ މަދުވެގެން ދެ ކުދިން ހޯދަން ވެސް ހިތްވަރު ދެމުންނެވެ.