ޓްރަމްޕުގެ ސަކަރާތާ ހެދި "ޕާލާ" އެއްކޮށް ބަންދުވެއްޖެ

މީގެ ދެ އަހަރެއްހާ ދުވަސްކުރިން ވުޖޫދަށް އައި ސޯޝަލް ޕްލެޓްފޯމް "ޕާލާ" އަށް މި ދިމާވީ ވަރަށް ވެސް ދެރަ ގޮތެކެވެ. އެމެރިކާގެ ރިޔާސީ އިންތިހާބުން ނާކާމިޔާބުވި ޑޮނަލްޑް ޓްރަމްޕް ހަމަނުޖެހުމަށް މަގު ފަހިކުރަން ޓްވިޓާ ބޭނުންކުރައްވާތީ އެއިން ބޭރުކޮށްލުމާ އެކު އޭނާ އާއި ސަޕޯޓަރުން ދުއްވައިގަތީ ޓްވިޓާގެ ބަދަލުގައި ބޭނުންކުރުމަށް މަޝްހޫރު "ޕާލާ" އާ ދިމާލަށެވެ.

ނަތީޖާއަކަށްވީ އެ މީހުން ހަމަނުޖެހުންތަކާއި އަނިޔާވެރި އަމަލުތަކަށް "ޕާލާ" މެދުވެރިކޮށް ގޮވަން ފެށުމާ އެކު، އެޕް ސްޓޯރުންނާއި ގޫގުލް ޕްލޭ ސްޓޯރުން އެޕް ޑައުންލޯޑް ނުކުރެވޭ ގޮތަށް ބޭރުކޮށްލުމެވެ. ހަމައާ އެކު އެމެޒޯންގެ ކްލައުޑް ހޯސްޓިން ސާވިސް، އެމޯޒަން ވެބް ސާވިސް އިން ވެސް މިހާރު "ޕާލާ" އަށް އޮތީ ފިޔަވަޅު އަޅައިފަ އެވެ.

އެހެންވެ "ޕާލާ" އޮޕަރޭޓްކުރެވޭނެ ހުރިހާ ދޮރެއް ބަންދުވެ، އޮފްލައިނަށް ގޮސް "ބަންދު ބޯޑު" އަޅުވަން ޖެހުނީ އެވެ. މިއީ ކުރިން "ޕާލާ" އަށް ވެދާނެ ކަމަށް ހީކުރި ގޮތެއް ނޫނެވެ. އޭގެ ބާނީންގެ ތެރޭގައި ހިމެނޭ ޗީފް އެގްޒެކެޓިވް ޖޯން މޭޓްޒްގެ ވާހަތަކުން އެކަން އެނގެ އެވެ.

އޭނާ ވިދާޅުވީ އެޕް ސްޓޯރާއި ޕްލޭ ސްޓޯރުން "ޕާލާ" ސަސްޕެންޑްކޮށްފައި މާ ގިނަ ދުވަހަކު ނުބާއްވާނެ ކަމަށެވެ. އަދި އެ ބޭނުން ކުރާ މީހުންނަށް އުންމީދެއްގެ ގޮތުގައި އޭނާ ވިދާޅުވީ ހަފުތާއަކަށް މަޑުކޮށްލައިގެން ތިބުމަށެވެ. އެކަމަކު ޓްރަމްޕް ޖެއްސެވި ސަކަރާތްގަނޑު ގޯހުން ގޯހަށް ގޮސް އެކަން ވަރަށް ސީރިއަސް މައްސަލައެއްގެ ގޮތުގައި ބަލަން ފަށައި އޭނާ މަގާމުން ދުރުކުރުމުގެ މަސައްކަތް ވެސް މިހާރު އޮތީ ފަށައިފަ އެވެ. އެހެންވެ މިހާރު ފެންނަ މަންޒަރާ ހެދި ޖޯން އަށް ޖެހިވަޑައިގަތީ އޭނާ ކުރިން ދެއްކެވި ވާހަކަ ބަދަލުކުރައްވާށެވެ. އެއީ ދެން "ޕާލާ" އަށް އާދެވޭނެ ދުވަހެއް ވެސް ނޭނގުމެވެ.

އޭނާ ވިދާޅުވި ގޮތުގައި "ޕާލާ" އާ އެކު ތިބި އެންމެން މިހާރު ވަނީ އެ އެޕާ ފެއަށް ޖެހިފަ އެވެ. އޭގެ ތެރޭގައި އޭގެ ގާނޫނީ ޓީމު ވެސް ހިމެނެ އެވެ.

"އަހަރެމެންނަށް ޓެކްސްޓް މެސެޖާއި އީމެއިލް ފޯރުކޮށް ދެމުން ދިޔަ ފަރާތްތަކާއި އަހަރެމެންގެ ގާނޫނީ ޓީމް ވެސް ވަނީ އަހަރެމެންނާ ދުރަށް ގޮސްފައި،" ޕާލާ އަށް ދެން އެނބުރި އާދެވޭނެކަމުގެ އުންމީދެއް ނެތް މޭރުމަކުން ފޮކްސް ނިއުސް އަށް ޖޯން ވިދާޅުވި އެވެ.

ދެހާސް އަށާރާގައި ވުޖޫދަށް އައި "ޕާލާ" އަށް ހުރިހާ ދޮރެއް ބަންދުވެ، އޮފްލައިންވާން މަޖުބޫރުވި އިރު އެ ބޭނުންކުރަމުން ދިޔަ މީހުންގެ އަދަދު 10 މިލިއަނަށް އަރަ އެވެ. އޭގެ ތެރޭގައި ޓްރަމްޕްގެ ހަރުކަށި ސަޕޯޓަރުން ވަރަށް ގިނަ އެވެ. ހާއްސަކޮށް ކަނާތު ފިޔައިގެ ހަރުކަށި ކޮންޒަވޭޓިވުންނެވެ.