"އުރީ" ގެ ޑައިރެކްޓަރާ ޔާމީ ކައިވެނިކޮށްފި

ބަތަލާ ޔާމީ ގޯތަމް ކުޅުނު ފިލްމު "އުރީ: ދަ ސާޖިކަލް ސްޓްރައިކް" ގެ ޑައިރެކްޓަރު އަދިތިޔާ ދާރްއާ ހުކުރު ދުވަހު ކައިވެނިކޮށްފި އެވެ.

ދެ މީހުންގެ ކައިވެނީގެ ހަފުލާގެ ތެރެއިން ނަގާފައިވާ ފޮޓޯ އިންސްޓަގްރާމްގައި ވެސް ޕޯސްޓްކޮށްފައިވެ އެވެ.

ޔާމީ އާއި އަދިތިޔާ ލޯބީގެ ގޮތުން ގުޅިގެން އުޅޭކަން ކުރިން އެއްވެސް ވަރަކަށް ނޭނގި ކައިވެނިކުރުމަކީ ވަރަށް ގިނަ ބަޔަކަށް ލިބުނު ހައިރާން ކަމެއްގެ ގޮތުގައި އިންޑިއާގެ ބައެެއް މީޑިއާތަކުން ސިފަކުރި އެވެ.

މި ދެ މީހުން ވެސް މީޑިއާއާ ރައްޓެއްސެއް ނޫނެވެ.

އުމުރުން 38 އަހަރުގެ އަދިތިޔާ 2019 ގައި ވަތަނީ ފިލްމު "އުރީ: ދަ ސާޖިކަލް ސްޓްރައިކް" އަކީ ވިކީ ކޯޝަލް އާއި ޔާމީއާ އެކު ގެނެސްދިން އެ އަހަރުގެ އެންމެ ކާމިޔާބު އެއް ފިލްމެވެ. އެ ފިލްމުން ވިކީ އަށް މޮޅު ބަތަލުގެ ނެޝަނަލް އެވޯޑް ވެސް ލިބިފައިވާ އިރު، އަދިތިޔާ މިހާރު އަންނަނީ ވިކީއާ އެކު "ދި އިމޯޓަލް އަޝްވަތައްމާ" ކިޔާ ވަރުގަދަ ސުޕަހީރޯ ފިލްމެއް ހެދުމަށް ތައްޔާރުވަމުންނެވެ.

ޔާމީ އާއި އަދިތިޔާ ކައިވެނިކުރިކަން އެނގުމާ އެކު ބޮލީވުޑްގެ ވަރަށް ގިނަ ބަޔަކު މިހާރު އަންނަނީ ދެ މީހުންނަށް މަރުހަބާ ވެސް ކިޔަމުންނެވެ.

ޔާމީ، 32، ބޮލީވުޑަށް ނުކުތީ އަޔޫޝްމަން ކްރާނާއާ އެކު 2018 ގެ "ވިކީ ޑޯނާ" އިންނެވެ. އޭގެ ފަހުން އޭނާ ކުޅުނު ފިލްމުތަކުގެ ތެރޭގައި "ގާބިލް"، "ސަނަމް ރޭ"، "ސަރުކާރު 3" އަދި "ބަދުލާޕޫރް" ފަދަ ފިލްމުތައް ހިމެނެ އެވެ.

މިދިޔަ އަހަރު ނެޓްފްލިކްސް ޕްރީމިއާކުރި "ގިނީ ވެޑްސް ސަނީ" ގެ ބަތަލާގެ ކުރިއަށް އޮތް ފިލްމަކީ ޑިޒްނީ ޕްލަސް ހޮޓްސްޓާ އިން ޕްރީމިއާކުރަން ނިންމާފައިވާ "ބޫތު ޕޮލިސް" އެވެ. އޭގެ ކާސްޓްގައި ސައިފް އަލީ ޚާނާއި އަރުޖުން ކަޕޫރާއި ޖެކްލިން ފެނަންޑޭޒް ހިމެނެ އެވެ.

ޔާމީ ހިންދީ ފިިލްމުގެ އިތުރުން އިންޑިއާގެ އެހެން ބަހުރުވަތަކުން ހަދާ ދެކުނުގެ ފިލްމުތަކެއް ވެސް ކުޅެފައިވެ އެވެ.