ޓިކްޓޮކް ވީޑިއޯ ތިން މިނެޓަށް ދިގުކޮށްލަނީ

ކްރިއޭޓަރުންގެ އެދުމުގެ މަތިންނާއި އެ މީހުންގެ ކޮންޓެންޓްތައް އިތުރަށް މުއްސަނދިކުރަން މަގުފަހިކޮށްދޭން، ޓިކްޓިކޮށް އަޕްލޯޑްކުރާ ވީޑިއޯގެ ދިގުމިން މިނެޓަކުން ތިން މިނެޓަށް ހަދަން ނިންމައިފި އެވެ.

ޗައިނާގެ ބައިޓްޑާންސުން ހިންގާ ޓިކްޓޮކްގެ ޕްރޮޑަކްޓް މެނޭޖަރު ޑްރޫ ކާޗޮފް ޓިކްޓޮކްގެ ވެބްސައިޓްގައި ވިދާޅުވީ ވީޑިއޯތަކުގެ ދިގުމިން މިނެޓަށް އިތުރުކުރުމުން ކްރިއޭޓަރުން ގެނެސްދޭ ކޮންޓެންޓްތަކުގެ ޝައުގުވެރިކަން ކުރިއަށް ވުރެ ބޮޑަށް އިތުރުވާނެ ކަމަށެވެ. މިކަން ޓެސްޓްކުރަމުން އަންނަނީ މިދިޔަ އަހަރުގެ ފަހުކޮޅުން ފެށިގެންނެވެ.

"މި ބަދަލު ކުރިއަށް އޮތް މަދު ހަފުތާތަކެއްގެ ތެރޭގައި ޓިކްޓޮކް ބޭނުންކުރާ އެންމެންނަށް ލިބޭނެ،" ޑްރޫ ވިދާޅުވި އެވެ.

އޭނާ ވިދާޅުވި ގޮތުގައި މިހާތަނަށް ދެމުން އައި 60 ސިކުންތުގެ ވީޑިއޯ ގިނަ ބަޔަކަށް ހެޔޮވަރު ކަމަށެވެ. އެކަމަކު މި ފަހުން ވީޑިއޯގެ ވަގުތު އިތުރުކޮށްދޭން ވަރަށް ގިނަ ކްރިއޭޓަރުން އެދޭ ކަމަށް ބުންޏެވެ.

"މިނިޓެއްހާ ދިގުމިނަށް ވީޑިއޯ ލެވޭތީ ބައެއް ކޮންޓެންޓް މިހާރު އެބަ ލާ ބައިބައިކޮށްފައި ވެސް. އެހެންވީމާ މި ގެންނަ ބަދަލާ އެކު، އެކަމަށް ވެސް އިތުރު ފަސޭހަތަކެއް ލިބި ކޮންޓެންޓްތައް އިތުރަށް މުއްސަނދިވާނެ ކަމަށް ދެކެނީ،" އޭނާ ވިދާޅުވި އެވެ.

ޓިކްޓޮކް އާންމުންގެ ތެރޭގައި ވައިގައި ހިފި އެއް ސަބަބަކަށް ކުރު ވީޑިއޯކޮޅަކުން ޝައުގުވެރި އެއްޗެހި ގެނެސްދެވޭތީ އެވެ.

އެހެންވެ އަލަށް ގެންނަން އުޅޭ ބަދަލަކީ ބައެއް ކްރިއޭޓަރުން އެހާ ރުހޭ ކަމެއް ވެސް ނޫނެވެ.

ޓިކްޓޮކްގައި މަޝްހޫރު އަންހެން ޑްރަމަރު ކީރާ ސްޓިއުވާޓް ބުނި ގޮތުގައި އުފެއްދުންތެރި ކަމަކީ ހަގީގަތުގައި ވީހާ ވެސް ކުޑަ ވަގުތުކޮޅަކަށް ފައްތައިގެން ޝައުގުވެރި އެއްޗެއް ގެނެސްދިނެމެވެ.

"އެހެންވީމަ އަހަރެން މާ ގަޔާވާ ވާހަކައެއް ނޫން ވީޑިއޯގެ ޑިއުރޭޝަން އިތުރުކުރާ ވާހަކަ އަކީ. ހަގީގަތުގައި ޓިކްޓޮކްގެ ކާމިޔާބީގެ މައިގަނޑު އެެއް ސިއްރަކަށްވާނެ ކުރު ވީޑިއޯ ލެވޭ ޕްލެޓްފޯމަކަށްވުން." އޭނާ ބުންޏެވެ.