އޭއެފްސީ ކަޕްގެ މެޗެއް ގަމުގައި ކުޅެވޭތޯ މަސައްކަތްކުރަނީ

މި ފަހަރުގެ އޭއެފްސީ ކަޕްގެ މެޗުތައް ސެންޓްރަލައިޒްކޮށް ކުޅެން ނިންމާފައިވާއިރު، ދެކުނު އޭޝިއާ އަށް ހާއްސަ ގްރޫޕްގެ މެޗުތަކުގެ ތެރެއިން އެއް މެޗު ލ. ގަމު ޒޯން ސްޓޭޑިއަމްގައި ކުޅެވޭތޯ މަސައްކަތްކުރަމުން އަންނަ ކަމަށް އެފްއޭއެމުން ބުނެފި އެވެ.

އިންޑިއާއާ ވާދަކޮށް އޭއެފްސީ ކަޕްގެ ދެކުނު އޭޝިއާ ގްރޫޕްގެ މެޗުތައް ބޭއްވުމުގެ ބިޑް ރާއްޖޭން ކާމިޔާބުކުރިއިރު، ޕްރޮޕޯސަލްގައި ހިމަނާފައިވަނީ ފަހު ދެ މެޗު އެއް ވަގުތެއްގައި ކުޅޭއިރު އެހެން ދަނޑެއްގައި އެއް މެޗު ކުޅޭގޮތަށެވެ. މީގެ ކުރިން މި ގޮތަށް ބައިނަލްއަގުވާމީ މުބާރާތެއްގެ މެޗު މާލެ ނޫން ސަރަހައްދެއްގައި ކުޅެފައިވަނީ ހިތަދޫ ޒޯން ސްޓޭޑިއަމްގަ އެވެ. އެކަމަކު މި ފަހަރު އެފްއޭއެމުން އޭއެފްސީ ކަޕްގެ މެޗު ހޯސްޓް ކުރަން މަސައްކަތްކުރަނީ ގަމުގަ އެވެ.

އެފްއޭއެމްގެ ޖެނެރަލް ސެކްރެޓަރީ ހުސެއިން ޖަވާޒް (ޖަވާ) "މިހާރު" އަށް ވިދާޅުވީ ފަހު ދެ މެޗު އެއްވަގުތެއްގައި ކުޅެން ޖެހޭގޮތަށް ޝެޑިއުލް އޮންނައިރު، މި ވަގުތަށް އެފްއޭއެމްގެ ވިސްނުމަކީ ޔޫތު މިނިސްޓްރީއާ ގުޅިގެން ކުރަން ޖެހޭ މަސައްކަތްތައް ކޮށް ގަމު ސްޓޭޑިއަމްގައި މެޗު ކުޅުމަށް ކަމަށެވެ.

"މީގެ އަޅުގަނޑުމެންގެ (އެފްއޭއެމް) އާއި މިނިސްޓްރީގެ ޓީމެއް ގޮސް އެ ދަނޑުގެ ހާލަތު އިންސްޕެކްޓް ކޮށްފިން. އެބަހުރިި ދަނޑުގައި ކުރަން ޖެހޭ ކަންތައްތައް. ދެން މިނިސްޓްރީ އާއި ކައުންސިލް (ގަމު ކައުންސިލް) ގުޅިގެން ކުރަން މިހުރި މަސައްކަތްތައް ނިންމާލުން އޮތީ،" ޖަވާ ވިދާޅުވި އެވެ.

ގަމު ޒޯން ސްޓޭޑިއަމް ހުޅުވީ މިދިޔަ ޑިސެމްބަރު މަހު ރައީސް އިބްރާހިމް މުހައްމަދު ސޯލިހު ބައިވެރިވެވަޑައިގެންނެވި ހާއްސަ ރަސްމިއްޔާތެއްގަ އެވެ. އެ ރަސްމިއްޔާތުގައި ސްޕޯޓްސް މިނިސްޓަރު އަހުމަދު މަހުލޫފް ވަނީ އޭއެފްސީ ކަޕް މެޗުތައް ގަމު ސްޓޭޑިއަމްގައި ކުޅެވޭ ވަރަށް އެ ދަނޑު ތަރައްގީ ކުރުމަކީ އަމާޒެއް ކަމަށް ވިދާޅުވެފަ އެވެ.

އޭއެފްސީ ކަޕްގެ ގްރޫޕް ސްޓޭޖުގެ މެޗުތައް ތާވަލުކޮށްފައިވަނީ މެއި މަހު 14 އިން 20 ވަނަ ދުވަހަށެވެ.

އޭއެފްސީ ކަޕްގެ ދެކުނު އޭޝިއާ އަށް ހާއްސަ ގްރޫޕްގައި މި ވަގުތު އޮތީ ތިން ޓީމެކެވެ. އެއީ ރާއްޖޭގެ ޗެމްޕިއަން މާޒިޔާ އާއި ބަންގްލަދޭޝްގެ ބަޝުންދުރާ ކިންގްސް އަދި އިންޑިއާގެ އޭޓީކޭ މޯހަން ބަގާން އެވެ. ދެން މި ގްރޫޕްގެ ފަހު ޖާގަ ލިބޭނީ ކޮލިފައިން ކާމިޔާބުކުރާ ޓީމަކަށެވެ. ކޮލިފައިންގައި ރާއްޖޭގެ އީގަލްސް އާއި އިންޑިއާގެ ބެންގަލޫރު އެފްސީ އަދި ބަންގްލަދޭޝްގެ ޑާކާ އަބަހާނީ ވާދަކުރެ އެވެ.

އޭއެފްސީ ކަޕްގައި ދެކުނު އޭޝިއާ ޓީމުތައް ކުޅޭ ކޮލިފައިން ބުރު އޮންނާނީ އަންނަ މަހު ހަތް ވަނަ ދުވަހުން ފެށިގެން 21 ވަނަ ދުވަހުގެ ނިޔަލަށެވެ. ކޮލިފައިންގައި އީގަލްސް ކުޅޭ މެޗުގައި އަންނަ މަހު ހަތް ވަނަ ދުވަހު ބޫޓާންގެ ތިމްޕޫއާ ދެކޮޅަށް ކުޅޭ މެޗު އޮންނާނީ މާލޭގަ އެވެ.