ހުސެން: ބަދަލުވާން ޖެހެނީ އެއް ދަރިފުޅާ އަލްވަދާއު ކިޔާފައި!

މާލޭގެ ރަށްވެއްސަކަށް ވިޔަސް ތިން ކުދިންނާއި އަނބިމީހާއާ އެކު ހުސެއިން ރަޝީދު، މާލޭގައި ކުއްޔަށް ދިރިއުޅެމުން އަންނަތާ ވިއްސަކަށް އަހަރުވެއްޖެ އެވެ. ހުސެއިންގެ ބައްޕަ ގޯއްޗެއް މާލޭގައި އޮތަސް، 13 ބަޔަކަށް ބަހާލީމަ ލިބޭ ތަންކޮޅު އެހާ ކުޑަ އެވެ.

"ހުރިހާ ކުދިންނަށް ގޯތި ބަހައިފި ނަމަ އެތަނުގައި ރަނގަޅު މިނެއްގެ ފާހާނާއެއް ހަދާލާނެ ޖާގަ ވެސް ނެތް،" ތިން ކުދިންގެ ބައްޕަ ކިޔައިދިނެވެ.

ހުސެއިން ވެސް އެތަައް ފަހަރަކު ފްލެޓަށް ފޯމް ހުށަހެޅި އެވެ. ހިޔާ ފްލެޓްގެ ކުރިން ހިންގި ބޯހިޔާވަހިކަމުގެ މަޝްރޫއުއަކަށް ކުރިމަތިލައިގެން 92 ޕޮއިންޓް ލިބުނަސް އެފަހަރު ވެސް ފްލެޓު ލިބޭ ގޮތެއް ނުވި އެވެ.

އެންމެ ފަހުން ކުރީގެ ރައީސް އަބްދުﷲ ޔާމީންގެ ވެރިކަމުގައި ހުޅުމާލޭގެ ދެވަނަ ފޭސްގައި ތަރައްގީކުރި ހިޔާ ފްލެޓަށް އެދި އޭނާ ހުށަހެޅި އެވެ. ނަސީބު ކަން ދިމާކުރި ގޮތުން 60 ޕޮއިންޓުން މަތިން މާކްސް ލިބި، ފްލެޓް ލިބުނު މާލޭގެ ރަށްވެހިންގެ ދާއިމީ ލިސްޓުގައި ހުސެއިންގެ ނަން އޮތެވެ.

ފްލެޓް ލިބުނު މީހުންނަށް އެތަން ދައްކާލުމުގެ ފުރުސަތު ދިން ދުވަހު ހުސެއިން އާއި އޭނާގެ އަންހެނުން ވެސް އެތަނަށް ދިޔަ އެވެ. އެއީ އެތަން ބަލާލުމުގެ ފުރުސަތު އޭނާ އަށް ލިބުނު ފުރަތަމަ ފަހަރެވެ.

"ފްލެޓް ކުޑަވާނެ ކަމަށް ބުނީމަ ވެސް އެހާ ދެން ގަބޫލެއް ނުކުރެވުނު. އެކަމަކު މިއަދު އައިސް އެތެރެ އަށް ވަދެލީމަ އަސްލު މި އިނގުނީ. ހަމަ ޝޮކެއް ލިބުނީ،" އޭނާ ނޫސްވެރިންނާ ވާހަކަ ދައްކަން ފެށި އެވެ.

އެކަމަކު ލިބުނު ތަންކޮޅު ކިތަންމެ ކުޑަޔަސް އޭނާ ހުރީ އެތަނަށް ބަދަލުވާން ތައްޔާރަށެވެ! ސަބަބުތައް ބައިވަރެވެ.

ހުސެއިން ބުނި ގޮތުގައި ކޮވިޑާ ގުޅިގެން އަތްމަތި ވަރަށް ބޮޑަށް ދަތިވެފައިވާ މި ދުވަސްވަރު އާއިލާ ގޮވައިގެން އޭނާ އުޅެމުން ދަނީ ވަރަށް ހާލުގަ އެވެ. މިހާރު އުޅޭ ގޭގެ ކުލި އެހާ ބޮޑެވެ. ވަކިން ހާއްސަކޮށް، ކޮވިޑާ ގުޅިގެން އޭނާގެ މުސާރައިގެ ބޮޑު ބައެއް ކަނޑާލާފައިވާތީ ދިރިއުޅުމުގެ ހަރަދުތައް ބެލެހެއްޓުމަކީ އޭނާ އަށް ފަސޭހަ ކަމެއް ނޫނެވެ. އެހެންވެ، މިކަހަލަ ދަތި ދުވަސްވަރެއްގައި މިވަރުގެ ތަންކޮޅެއް ލިބުން ވެސް، ހުސެއިން ސިފަ ކުރަނީ "ވަރަށް ބޮޑު ނަސީބެއް"ގެ ގޮތުގަ އެވެ.

އެކަމަކު ދެ ކޮޓަރީގެ ފްލެޓަކަށް އޭނާ ބަދަލުވާ އިރު، އެހެން މީހުންނަށް ދިމާ ނުވާ ކަހަލަ ނާދިރު ހާލަތެއް ހުސެއިން އަށް ވަނީ ކުރިމަތިވެފަ އެވެ. މިހާރު ތިން ކޮޓަރީގެ ތަނެއްގައި ތިން ކުދިންނާ އެކު ދިރިއުޅެމުން އަންނަ ހުސެއިން ބުނާ ގޮތުގައި ހިޔާ ފްލެޓްތަކަށް ބަދަލުވާން މި ޖެހެނީ އެންމެ ދޮށީ ދަރިފުޅު މާލޭގައި ބަހައްޓައިފަ އެވެ. ސަބަބަކީ، ހުސެއިން ބުނާ ގޮތުގައި އުމުރުން 22 އަހަރުގެ އަންހެން ދަރިފުޅަށް ވަކި ކޮޓަރިއެއް ނެތުމެވެ.

"އެންމެ ބޮޑު އިޝޫއަކީ އެއް ކުއްޖަކާ ވަކިވާން ޖެހުން. މިހާރު އުޅެމުން މި އަންނަނީ ދޮށީ ދަރިފުޅަށް ވަކި ކޮޓަރިއެއްގައި. ދެން ތިބި [10 އަހަރާއި 13 އަހަރު] ދެ ކުދިންނާއި އަޅުގަނޑުގެ މަންމަ އެއް ކޮޓަރީގައި. އަނެއް ކޮޓަރި އަޅުގަނޑުމެން ދެމަފިރިންނަށް. ބޮޑު ކުއްޖާ އަށް މިހާރު ވަކިން ކޮޓަރިއެއް ދެވެން ނެތީމަ، އޭނަ މަންމަ ކައިރީ ބަހައްޓައިފައި މި އަންނަނީ،" ހުސެއިން ބުންޏެވެ.

"ހިތް ނޭދުނަސް، މިވަގުތު މި ނޫން ގޮތެއް ނެތް."

މާލޭގައި ބޮޑު ކުލީގައި ހުންނަ ކޮންމެ ދުވަހަކީ ހުސެއިން އަށް އިތުރު ތަކުލީފުތަކެއް އުފުލަން ޖެހޭ ދުވަސްތަކެކެވެ. އެހެންވެ، ހިޔާ ފްލެޓްގެ ތަޅުގަނޑި ހަވާލުކުރުމާ އެކު ފްލެޓްގެ ފިނިޝިން ފަށަން އޭނާ ބޭނުންވެ އެވެ. އެކަމަކު އެއީ ވެސް އަތުން އިތުރު ހަރަދުތަކެއް ހިނގާނެ ކަމެކެވެ.

ތިން މަހުން ފިނިޝިން މަސައްކަތް ނިންމައި، އެތަނަށް ވަދެވޭނެ ކަމަށް އޭނާ ގަބޫލެއް ނުކުރެ އެވެ. އެކަމަށް އެންމެ އަވަސްވެގެން ވެސް ހަ މަސް ދުވަސް ހޭދަވާނެ ކަމަށް ހުސެއިން ދެކެ އެވެ.

"ބޭނުމީ ހަމަ ވީހާވެސް އަވަހަކަށް މިތަނަށް ބަދަލުވާން. އެކަމަކު އެނގޭ ކިތަންމެ އަވަހޭ ބުންޏަސް ކުރިއަށް އޮތް ތިން މަހުން އެކަން ނުވާނެކަން. ދިރުއުޅުމެއް ފަށާއިރު އުޅެން ކޮންފޮޓަބަލް ގޮތަކަށް މިތަން ހުންނަން ޖެހޭނީ."

ހިޔާގެ ފިނިޝިން މަސައްކަތުގެ އިތުރުން ތަނުގެ ފަރުނީޗަރަށް ވެސް އެތައް ހަރަދެއް ހިނގާނެ އެވެ. ހުސެއިން ބުނި ގޮތުގައި އޭނާ މިހާރު ދިރިއުޅެމުން އަންނަ ގޭގައި ހުރި އެއްވެސް ފަރުނީޗަރެއް އެ މީހުންނަށް ހިޔާ އިން ލިބުނު ފްލެޓަކަށް ނުވެއްދޭނެ އެވެ. އެއަށް ވުރެ ފްލެޓްގެ ޖާގަ މާ ކުޑަ އެވެ.

މިހާރު އުޅޭ ގޭގައި ހުރި ސާމާނު ފްލެޓަށް ނުވެއްދޭނެތީ ހުސެއިން ނިންމާފައި ވަނީ އެތަނުގެ މިން ބަލައި، އެ ފްލެޓްގެ ޖާގައަށް އެކަށޭނެ ވަރެއްގެ ސާމާނު އެތަނުގައި ބަހައްޓާށެވެ. އެނދާއި އަލަމާރި ވެސް ޖެހެނީ އެތަނަށް ފިޓްވާ ގޮތަށް އަމިއްލަ އަށް ޖަހާށެވެ.

"މިތަން ޑިޒައިން ކުރަން މީހަކު ހޯދަން ޖެހޭނީ ފުރަތަމަ. މިހާރު އަޅުގަނޑުމެން އުޅޭ ގެއަށް ވެސް ހުރިހާ އެއްޗެއް ގަނެފައި އެހެރީ. އެެކަމަކު އެއިން އެކައްޗެއް ވެސް މިތަނަކަށް ނުވެއްދޭނެ. އަލަމާރިއެއް ކަބަޑެއް، ހަމަ އެކައްޗެއް ވެސް ނުވެއްދޭނެ. އެހެންވީމަ ހުރިހާ އެއްޗެއް ދޫކޮށްލައިފައި މި އަންނަން ޖެހެނީ،" ހުސެއިން ބުންޏެވެ.

ހުސެއިންގެ އަނެއް ޝަކުވާއަކަށްވީ ސިޓީން ރޫމުގެ އެއްކޮޅެއްގައި ބަދިގެއަށް ވާ ގޮތަށް ބަހައްޓާފައި ހުރި ސިންކެވެ. އާދައިގެ ބަތްކާ ތައްޓެއް ލެވޭ ވަރަށް ހުރި މި ސިންކު ކުޑަކަމުން، އެތަން ވެސް ޖެހޭނީ ތަޅާލާފައި އާ އެއްޗެއް ހަރުކުރަން ހަމަ އޭނާ ބުންޏެވެ. އެކަމަކީ ވެސް އަތުން އިތުރު ހަރަދެއް ދާނެ ކަމެކެވެ. ހިޔާ ފްލެޓް ބަލަން ގޮސް، އޭނާގެ ބޯގޮވި އަނެއް ކަމަކީ، އެންމެ ކުޑަމިނުން ބޮކި، ފަންކާ ވެސް ސަރުކާރުން ހަރުކޮށް ނުލައި އެތަން ދޭތީ އެވެ.

ދެ ދަރިންނާއި މަންމަ ގޮވައިގެން ހުސެއިން ފްލެޓަށް ބަދަލުވާއިރު އޭނާގެ ދެ ކުދިން ވެސް މި ވަގުތު ކިޔަވަމުން އަންނަނީ މާލޭގެ ސްކޫލެއްގަ އެވެ. އެކަމަކު ހުޅުމާލެ އަށް ބަދަލުވާއިރު ފޭސް ދޭކަށް ބަސް ނުދާ ނަމަ، އިތުރު ބުރައެއް އަނެއްކާ ވެސް އުފުލަން ޖެހުނީ އެވެ.

ސާދަ ވަނަ ބުރިން ފްލެޓް ލިބުނު ހުސެއިން ވެސް ގަބޫލުކުރާ ގޮތުގައި އެތަނުގައި މީހުން ދިރިއުޅެން ފެށުމުން އެތައް މައްސަލަތަކެއް ނިކުންނާނެ އެވެ. ފަންސަވީސް ބުރީގެ އެންމެ ޓަވަރެއްގައި ވެސް ރަށެއްގެ އާބާދީ އަށް ވުރެ ގިނައިން މީހުން އުޅޭނެ އެވެ. އޮފީހާއި ސްކޫލަށް ދާ ވަގުތުތަކުގައި މީހުން "ތެޅި ފޮޅޭނެ" އެވެ. މި ތަކުލީފުތައް އުފުލަން ހުސެއިން ވެސް ހުރީ ތައްޔާރަށެވެ!

"އެހާ މައްސަލަތައް ނިކުންނަ ތަނަކަށް މި ތަން ވާނެ. އެކަމަކު ދެން ބަލަމާ ގިނަވެގެން ވެސް ދިހަ ވަރަކަށް އަހަރު މި ތަނުގައި އުޅެވޭނެ ކަމަށް. އަޅުގަނޑަކަށް ހިޔެއް ނުވޭ އެހާ ދުވަހު ކެތްވާނެ ހެނެއް،" ހުސެއިން ބުންޏެވެ.