އެތައް ބައެއްގެ ލޮލުން ކަރުނަ: ހާލިދު މަރާ ހަނގުރާމަކުރަނީ!

އޭނާ އަކީ ވަރަށް ގިނަ ބައެއްގެ ރަހުމަތްތެރިއެކެވެ. ވަރަށް ގިނަ ބައެއްގެ ލޯބި ލިބިފައިވާ މީހެކެވެ. ދެކެފަރިތަ އަދި އެހާ ހާލުގައި ވެސް އުޅޭ މީހެކެވެ. އޭނާގެ ނުކުޅެދުންތެރިކަން ބޮޑުކަމުން އަމިއްލަ ހާލައިގެން ނޫޅެވެ އެވެ. އެކަމަކު، ތިން ފުރޮޅުލީ ސައިކަލެއްގައި އޭނާ މާލޭގައި އުޅެމުން ދިޔައީ އުފަލުގަ އެވެ.

ހާލިދު އަބްދުﷲގެ އެ އުފާވެރިކަން ބަރުބާދުކޮށްލީ މިދިޔަ ހޯމަ ދުވަހު ހުޅުމާލެއިން ދެވަނަ ފިޔަވައްސަށް ދާން އޮންނަ ބްރިޖު ކައިރިން އޭނާގެ ސައިކަލުގެ ފަހަތުން އައި ކާރެއް އޭގައި ޖެހި ހިނގި ނުރައްކާތެރި އެކްސިޑެންޓުންނެވެ. މި އެކްސިޑެންޓްގައި ހާލިދަަށް ލިބުނު އަނިޔާތަކާ އެކު އޭނާ އަންނަނީ މަރާ ހަނގުރާމަ ކުރަމުންނެވެ.

ހާލިދުގެ އާއިލާ އިން "މިހާރު" އަށް ކިޔައިދިން ގޮތުގައި ހާލިދަކީ އާންމުކޮށް ހުޅުމާލެ އަށް ގޮސް އުޅޭ މީހެއް ނޫނެވެ. އެކަމަކު އެ ދުވަހު ކޮންމެވެސް ބޭނުމެއްގައި އޭނާ ހުޅުމާލެ އަށް ދިޔައީ އެވެ.

ހާލިދު އެކްސިޑެންޓުވެގެން އާއިލާ އަށް ގުޅައި އެކަން އެންގީ ފުލުހުންނެވެ. އޭރު އޭނާ އޮތީ ހުޅުމާލޭ ހޮސްޕިޓަލުގައި ނަމަވެސް އެ ދުވަހުގެ ހަވީރެއްހާއިރު އައިޖީއެމްއެޗަށް ބަދަލުކޮށް އޭނާ އަށް ފަރުވާ ދެމުން އަންނަނީ އައިސީޔޫގަ އެވެ. ހާލު ވަރަށް ކްރިޓިކަލް އެވެ.

ހާލިދަކީ، އޭނާގެ ދަންނަ ބައެއް މީހުން ބުނާ ގޮތުގައި ވަރަށް ހިތްހެޔޮ މީހެކެވެ. އޭނާއަކަށް ވާހަކައެއް ނުދެއްކެ އެވެ. ރަނގަޅަކަށް ނުހިނގެ އެވެ. އަދި އަތާއި ފައިގެ އިތުރުން ކަނދުރާ ވެސް ރަނގަޅަކަށް ހަރަކާތެއް ނުކުރެ އެވެ.

"ކައިބޮއެ ހަދާނީ ވެސް ވަރަށް ހާލުގައި. ހޮޓާތަކަށް ގޮސް އާންމުކޮށް ކައި އުޅޭނީ،" އޭނާ ދަންނަ މީހަކު ކިޔައިދިނެވެ.

"ސައިކަލްގައި އެކި ތަންތަނަށް އަމިއްލަ އަށް ގޮސް އުޅޭނީ. އޭނާ އަކީ މީހުންނަށް އުނދަގޫކޮށް އުޅޭ މީހެއް ނޫން."

އެކްސިޑެންޓްގައި އެންމެ ބޮޑު އަނިޔާއެއްވެގެން އައިސީޔޫ އަށް ހާލިދުކަން އެނގުމާ އެކު ވަރަށް ގިނަ ބަޔަކަށް ލިބުނީ ޝޮކެކެވެ. އާއިލާގެ އިތުރުން އޭނާ ދަންނަ ވަރަށް ގިނަ މީހުން ތިބީ ދެރަވެފަ އެވެ.

ހާލިދުގެ މޫނު މައްޗަށް ވަރަށް ބޮޑަށް ވަނީ އަނިޔާވެފަ އެވެ. މުޅި މޫނުގެ އެތައް ބައިވަރު ކަށިތައް ބިންދައިގެން ގޮސްފައި ހުރިއިރު އާއިލާ އިން ބުނީ ހާލިދުގެ ހާލު ކްރިޓިކަލް ކަމުން ކުރަން ޖެހޭ ސާޖަރީތައް ވެސް ވެސް ކުރެވިފައި ނުވާ ކަމަށެވެ.

"ޑޮކްޓަރުން އެންމެ ފަހުން ވެސް ބުނީ ވަރަށް ކްރިޓިކަލްއޭ. އެހެންވެ ސްޓޭބަލްވީމައޭ ސާޖަރީ ހެދޭނީ،" އާއިލާ އިން ވާހަކަ ދެއްކި މީހާ ބުންޏެވެ.

މަންޒަރު ދުށް ބައެއް މީހުން އާއިލާ އަށް ކިޔައިދޭ ގޮތުގައި ހާލިދުގެ ސައިކަލުގައި ޖެހި އެކްސިޑެންޓުވުމުން އެ ކާރު ވަނީ މަޑުނުކޮށް އެތަނުން ފިލައިފަ އެވެ. އެކަމަކު ތިން މީހަކަށް އެކި ވަރުގެ އަނިޔާތައް ލިބުނު މި އެކްސިޑެންޓުގައި ކާރު ޑްރައިވަރު އެތަނުން ފިލި ކަމަކަށް ފުލުހުން ނުބުނެ އެވެ.

ފުލުހުން ބުނިހާ ވެސް އެއްޗަކީ އެ މައްސަލަ ތަހުގީގުކުރަމުން އަންނަ ކަމަށެވެ.

މަގުމަތީގައި އުޅޭއިރު ގިނަ ބަޔަކު ހާލިދަށް އެހީތެރިކަންދޭއިރު އޭނާއަކީ ހާއްސަ އެހީއަށް ބޭނުންވި ނަމަވެސް އެ ހާލުގައި ވެސް މިސްކިތަށް ގޮސް ބަރާބަރަށް ނަމާދުކުރާ މީހެކެވެ. އެއީ، ވަރަށް ގިނަ ބަޔަކު ފާހަގަކުރާ ގޮތުގައި އޭނާގެ ވަރަށް ރަނގަޅު އަޚުލާގެކެވެ.

އާއިލާ އިން އެދެނީ އޭނާއަށް ހެޔޮ ދުއާކޮށްދިނުމެވެ.