މުނިސިޕަލް ހިދުމަތް ސިޓީ ކައުންސިލާ ހަވާލުނުކޮށްގެން އުޅެނީ ކީއްވެ؟

ހުޅުމާލޭގައި ޕީޕީއެމްގެ ޖަލްސާއެއް ބޭއްވުމުގެ ހުއްދަ ނުދީގެން މާލޭ ސިޓީ ކައުންސިލާއި ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ) އާ ދެމެދު ވަނީ ބޮޑު ކޯޅުމެއް ފެށިފަ އެވެ. ކުރީގެ ރައީސް އަބްދުﷲ ޔާމީން މިނިވަންވެ، ބާއްވަން އުޅުނު "ކޮތަރު ކޮށި" ޖަލްސާއަށް ހުރަސްއަޅާ ކަމަށް ބުނެ ފާޅުކުރި ކަންބޮޑުވުންތަކާ އެކު ސިޓީ ކައުންސިލުގެ ނިންމުމަކަށް ވީ ހުޅުމާލޭގެ ރަޖިސްޓްރީ ބާތިލްކުރުމެވެ. މިއީ، ގާނޫނާ ޚިލާފަށް ކުރި ކަމެއް ކަމަށް ބުނެ އެޗްޑީސީން ވަނީ ކޯޓަށް ދާން ނިންމައިފަ އެވެ.

މި ދެކޮޅުވެރިކަމުގެ ތެރެއިން، އުފައްދާ އަނެއް ކަންބޮޑުވުމަކީ ސިޓީ ކައުންސިލާ ހަވާލުކުރަން ޖެހޭ މުނިސިޕަލް ހިދުމަތްތައް އެޗްޑީސީން ހިފަހައްޓައިގެން ތިބުމެވެ.

ގާނޫނުގައިވާ ގޮތުން ހުޅުމާލޭގެ ބޮޑު އާބާދީގެ މުނިސިޕަލް ހިދުމަތްތައް ދޭން ޖެހޭނީ މާލެ ސިޓީ ކައުންސިލުންނެވެ. އެޗްޑީސީން ދެމުން އަންނަ އެ ހިދުމަތްތައް ކައުންސިލްގެ ދަށަށް ބަދަލުކުރުމަކީ، ކައުންސިލްތައް ބާރުވެރިކުރުވައި ހުޅުމާލެ ރައްޔިތުންނަށް އެކަށީގެންވާ ހިދުމަތްތައް ދޭން މި ސަރުކާރުގެ ވައުދެކެވެ.

އެކަމަކު މިހާތަނަށް ވެސް މުނިސިޕަލް ހިދުމަތް ސިޓީ ކައުންސިލްގެ ދަށަށް ބަދަލެއް ނުކުރެ އެވެ.

މާލޭގެ މޭޔަރު ޑރ. މުހައްމަދު މުއިއްޒު ވިދާޅުވެފައިވާ ގޮތުގައި މިކަން ހަމަޖައްސައިދޭން އެދި ތަކުރާރުކޮށް އެޗްޑީސީ އާއި ސަރުކާރުގައި ވެސް ވާނީ އެދިފަ އެވެ. އެކަމަކު މިހާތަނަށް ކުރިއެރުމެއް ނުލިބޭ ކަމަށް ވިދާޅުވެ ކަންބޮޑުވުންފާޅުކުރައްވާފައިވެ އެވެ.

ހުޅުމާލޭގެ މުނިސިޕަލް ހިދުމަތް ކައުންސިލުން ދޭން މިހާރު އޮތް ގޮންޖެހުމަކީ ބަޖެޓުގެ ދަތިކަމެވެ. މާލޭ ސިޓީ ކައުންސިލަށް ކަނޑައަޅާ ޖުމްލަ ބަޖެޓަށް ވުރެން ބޮޑު އަދަދެއް އެ ހިދުމަތަށް އެޗްޑީސީން ހޭދަކުރެ އެވެ. މިހާތަނަށް މަޝްވަރާކުރެވިފައި އޮތީ، ހުޅުމާލޭގެ މުނިސިޕަލް ހިދުމަތްތަކަށް އަހަރަކު ހޭދަވާ 70 މިލިއަން ރުފިޔާ އެޗްޑީސީން ސިޓީ ކައުންސިލަށް ދިނުމެވެ. އެކަމަކު މިކަން ހަމަޖައްސައި އަމަލުކުރުމާ މެދު ގޮތެއް ނުނިމެ އެވެ.

އެޗްޑީސީން ދޭންޖެހޭ ހިދުމަތްތައް ރަނގަޅަށް ނުދެވޭ ކަަމށް ބުނެ 1،800 އަށް ވުރެން ގިނަ މީހުން ސޮއިކޮށް ވަނީ ޕެޓިޝަނެއް ވެސް ހަދައިފަ އެވެ.

މެމްބަރު ދެކެވަޑައިގަންނަވަނީ ސިޓީ ކައުންސިލަށް ދޭންޖެހޭ ކަމަށް

މާލެ ސިޓީ ކައުންސިލާއި އެޗްޑީސީގައި އުފެދިފައިވާ ދެބަސްވުމާ ގުޅޭ ގޮތުން ރައްޔިތުންގެ މަޖިލީހުގެ ހުޅުމާލެ ދާއިރާގެ މެމްބަރު އަލީ ނިޔާޒް (ނިޔާ) ވިދާޅުވީ ބިން ވަކިކުރަން ސިޓީ ކައުންސިލްގެ ނިންމުން ގޯސް ކަމަށެވެ. މިލްކުވެރިކަން އެޗްޑީސީގެ ދަށުގައި ބާއްވާފައި، މުނިސިޕަލް ހިދުމަތް ދިނުން ސިޓީ ކައުންސިލަށް ކުރެވޭނެ ކަމަށް ވިދާޅުވި އެވެ.

ނިޔާޒް އަދިވެސް ގަބޫލުކުރައްވަނީ ކުރިން ވެސް ވިދާޅުވަމުން އައި ގޮތަށް ހުޅުމާލޭގެ މުނިސިޕަލް ހިދުމަތް ދޭން ޖެހޭނީ މާލޭ ސިޓީ ކައުންސިލުންނެވެ.

އެކަމަށް ވާހަކަ ދައްކައި، އެޗްޑީސީން ވެސް އައީ ހުށަހެޅުންތައް ހުށަހަޅަމުން ކަން ނިޔާޒް ވިދާޅުވި އެވެ.

"ހިދުމަތް ދިނުމުގައި ރައްޔިތުންގެ ޝަކުވާއަކީ އެޗްޑީސީން ހިދުމަތެއް ނުދެއޭ. މަޝްވަރާއެއް ނުކުރޭ. ކުންފުންޏެއް ވީމާ މަޝްވަރާކުރާނީ ބޯޑުގައި، އެކަމަކު ރައްޔިތުން އިންތިހާބު ކޮށްފައި ތިބި ކައުންސިލަރުންތަކެއް އެބަތިބި،" ނިޔާޒް ވިދާޅުވި އެވެ.

"މުނިސިޕަލް ހިދުމަތް ދިނުމަށް ރައްޔިތުންގެ ގާތުން އަހަންވާނެ، އެހެންވީމަ ކައުންސިލަރުންގެ ރޯލެއް އޮވެގެން މަޝްވަރާއާ އެކު ކުރެވޭނީ. އެ ސްޓޭންޑެއް އަޅުގަނޑު ބަދަލެއް ނުކުރާނަން."

މިއީ، ނިޔާޒް ވިދާޅުވި ގޮތުގައި، އެޗްޑީސީ އާއި ސަރުކާރު ވާހަކަ ދައްކައިގެން އަދިވެސް ސިޓީ ކައުންސިލްގެ ދަށަށް ބަދަލުކުރެވެން އޮތް ކަމެކެވެ.

"އެކަމުގައި އަޅުގަނޑު މިހުރީ އެހީތެރިވެދޭން ތައްޔާރަށް،"

ނިޔާޒް ދެކެވަޑައިގަންނަވާ ގޮތުގައި މިހާރު ކުރިމަތިވެގެން އުޅޭ ބިމުގެ މައްސަލައިގައި ވެސް ވާހަކަ ދައްކައިގެން ރަނގަޅު ހައްލެއް ހޯދެން އެބައޮތެވެ.

އެކަމަކު އެ ހިދުމަތްތައް ދެވޭނެ ކެޕޭސިޓީ ކައުންސިލްގައި ހުރިތޯ އޭނާއާ މަޝްވަރާކުރާ ބައެއް މީހުން ސުވާލުއުފައްދާ ކަމަށް ވިދާޅުވި އެވެ.

"ކޯޕަރޭޓް މޮޑެލްއަކުން ދާއިރު ހިދުމަތްތައް ކައުންސިލަށް ބަދަލުވީމަ އެ މީހުންނަށް ލިބެން ޖެހޭ މުސާރަ އާއި އިނާޔަތްތައް، ސިވިލް ސާވިސްގެ އޮނިގަނޑުގެ ތެރެއިން ހަމަޖެހޭނެތޯ. އެ ވެސް ކުރެވޭ ސުވާލެއް. ގާނޫނުން ސާފު، އޭގައި އޮންނަނީ މުނިސިޕަލް ހިދުމަތް ދިނުމުގައި ކައުންސިލްގެ ދައުރެއް އޮންނަން ޖެހޭ ކަަމަށް،" ނިޔާޒް ވިދާޅުވި އެވެ.

ބިމުގެ މިލްކުވެރިކަމާ ގުޅޭ ގޮތުން އެޗްޑީސީން ފާހަގަކުރާ ގޮތަށް، ހުޅުމާލެ އެޗްޑީސީގެ ދަށުގައި އޮތުމަކީ ލޯނުގެ ޝަރުތެއް ކަން ފާހަގަކުރައްވައި ނިޔާޒް ވިދާޅުވީ އެ ނޫން ކަންކަމުގައި ގޮތްތަކެއް ނިންމެން އެބައޮތް ކަމަށެވެ. އިހްތިސާސް މައްސަލައިގައި އެއްވެސް ބައެއްގެ ހިތްހަމަނުޖެހުން އޮތް ނަމަ ދެން އެކަން ހައްލުކުރެވެން އޮތީ ކޯޓުން ކަމަށް ދެކެވަޑައިގަންނަވާ ކަމަށް ވިދާޅުވި އެވެ.

ސިޓީ ކައުންސިލާއި އެޗްޑީސީއާ ދެމެދު އުފެދިފައިވާ ދެބަސްވުމުގައި ދެ ފަރާތުން އަދިވެސް އަންނަނީ ބަހުގެ ހަމަލާ ބަދަލުކުރަމުންނެވެ. ސިޓީ ކައުންސިލް ގޮވައިގެން ކޯޓަށް ދާނެ ކަމުގެ އިންޒާރު އެޗްޑީސީން ރޭ ދީފައި ވަނިކޮށް، މި މައްސަލައިގައި މިއަދު ސިޓީ ކައުންސިލުން ވަނީ ޚާއްސަ ޕްރެސް ކޮންފަރެންސެއް ބާއްވާނެ ކަން އިއުލާންކޮށްފަ އެވެ.