މިދިޔަ ރިޔާސީ އިންތިހާބު އޮޅުވާލާފައިވާ ކަމަށާއި އެކަމުގައި ފުލުހުން ވެސް ބައިވެރިވެފައިވާ ކަމަށް ޕީޕީއެމް/ޕީއެންސީން ތުހުމަތުކޮށްފި އެވެ.
އިދިކޮޅު ކޯލިޝަނުން މިހެން ބުނީ 2018 ގެ ރިޔާސީ އިންތިހާބާ ގުޅިގެން ފުލުހުން އޭރު ހިންގި ތަހުގީގަކަށް ނަގާފައިވާ ބަޔާންތަކުން ފާހަގަ ކުރެވޭ ކަންކަމުގެ މައްޗަށް ބިނާކޮށް އެ މުއައްސަސާއިން ތައްޔާރު ކުރި ކަމަށް ބުނާ ލިޔުމެއް ލީކުވުމާ ގުޅިގެންނެވެ.
ޕީޕީއެމް/ޕީއެންސީން މިއަދު ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން ޕީއެންސީގެ ރައީސް އަބްދުއްރަހީމް އަބްދުﷲ (އަދުރޭ) ވިދާޅުވީ އެ ރިޕޯޓް ލީކުވިތާ 24 ގަޑިއިރު ވީއިރު ފުލުހުން މިހާތަނަށް އެއްވެސް އެއްޗެއް ނުބުނުމަކީ އެއީ ހަގީގީ ރިޕޯޓެއް ކަން ހާމަވާ ކަމެއް ކަމަށެވެ.
މިއަދާ ހަމަޔަށް އައިއިރު އިންތިހާބު އޮޅުވާލި ކަމަށް ސާބިތުވާ ރިޕޯޓް ފުލުހުންގެ ތެރޭގައި ސިއްރުކޮށްފައި އޮތުމުން އެކަމުގައި ފުލުހުންގެ ބައިވެރިވުން ވެސް އޮތް ކަމަށް ބުނެވޭނެ ކަމަށް އަދުރޭ ވިދާޅުވި އެވެ.
"[ފުލުހުންގެ ނުފޫޒެއް] ނެތް ނަމަ އެ ދުވަސްވަރު އެ ހާލަތުގައި މިކަން ހާމަ ކުރައްވާނެ ކަމާބެހޭ ފަރާތްތަކަށް މިކަން ހުށަހަޅަން ވާނެ. ނުގެންގޮސް މިއަދާ ހަމަޔަށް އައިއިރު ސިއްރުކޮށްފައި އޮތުމަކީ ފުލުހުންގެ އިހުމާލު އޮތްކަން ހާމަވެގެން ދާ ކަމެއް،" އަދުރޭ ވިދާޅުވި އެވެ.
އިންތިހާބު ނާކާމިޔާބުވުމާ އެކު ވެސް ޕީޕީއެމް އިން ބުނަމުން އައި ގޮތަށް އަދުރޭ މިއަދު ވެސް ވިދާޅުވީ 2018 ވަނަ އަހަރު ބޭއްވީ މިނިވަން އިންސާފުވެރި އިންތިހާބެއް ނޫން ކަމަށެވެ. އަދި އެ އިންތިހާބު އޮޅުވާލަން ސަރުކާރު ކޯލިޝަންގައި ހިމެނޭ ހުރިހާ ޕާޓީތަކާއި އިންޑިޔާގެ އެހީތެރިކަން ވެސް ހޯދި ކަމަށް އަދުރޭ ތުހުމަތު ކުރި އެވެ.
"ޑިމޮކްރަސީއެއްގެ އެންމެ ވަރުގަދަ އެއް އަސާސަކީ މިނިވަން އިންސާފުވެރި އިންތިހާބެއް ބޭއްވުން. އެކަމަކު 2018 ވަނަ އަހަރު ބޭއްވި އިންތިހާބަކީ އެފަދަ އިންތިހާބެއް ނޫން ކަން މި ރިޕޯޓަށް ބަލައިލީމަ ހާމަވޭ،" އޭނާ ވިދާޅުވި އެވެ.
ކުރިން އިލެކްޝަންސް ކޮމިޝަން (އީސީ) ގެ ރައީސްގެ މަގާމުގައި ހުންނެވި އަހުމަދު ޝަރީފް ހައްޔަރު ކުރުމަށް ވެސް އަދުރޭ ގޮވާލެއްވި އެވެ. އޭނާއަކީ އިންތިހާބު އޮޅުވާލުމުގައި އެންމެ އިސްކޮށް ހުރި ފަރާތް ކަމަށް ވިދާޅުވެ ކުރީގެ ރައީސް އަބްދުﷲ ޔާމީން ވެސް ވަނީ ޝަރީފަށް ވަރަށް ބޮޑަށް ފާޑު ވިދާޅުވެފަ އެވެ.
ފުލުހުންގެ ތަހުގީގު ރިޕޯޓެއް ކަމަށް ބުނާ ލިޔުމުގައިވާ ގޮތުން އިންތިހާބު ކުރިޔަށް ދިޔަ ވަގުތާއި ވޯޓު ގުނުމާއި އޭގެ ފަހުން ވެސް އިންތިހާބުތަކާ ބެހޭ ގާނޫނާއި ގަވައިދުތަކާ ހިލާފަށް އެތައް ކަމެއް ހިނގި އެވެ. ޖުމުލަ 54 ނުކުތާ ފާހަގަކޮށްފައިވާ އެ ރިޕޯޓުގައި އީސީން އޮބްޒާވަރުންނަށް ބިރު ދެއްކުމާއި، ބައެއް ފޮށިތަކުގައި ވޯޓު ކަރުދާސް އިތުރުވުމާއި، އެކަކު ލައްވާ ދެފަހަރަށް ވޯޓުލި މައްސަލަތަކެއް ފާހަގަކޮށްފައިވެ އެވެ.
މި ރިޕޯޓާ ބެހޭ ގޮތުން ފުލުހުން ބުނީ އެކަމާ ބެހޭ ގޮތުން ފަހުން ކޮމެންޓެއް ކުރާނެ ކަމަށެވެ.
