މާލޭގެ މަގުތަކާއި ޕާކުތަކުގައި 100،000 ގަސް އިންދުމުގެ ޕްރޮގްރާމެއް ފަށަން މާލޭ ސިޓީ ކައުންސިލުން ނިންމައިފި އެވެ.
މިއަދު ބޭއްވި މާލޭ ސިޓީ ކައުންސިލުގެ ހަތަރު ވަނަ ދައުރުގެ 32 ވަނަ ރަސްމީ އާންމު ޖަލްސާގައި އެ ކައުންސިލްގެ ޕޮލިސީ ޕްރޮގްރާމްސް އެންޑް ޕްރޮޖެކްޓްސް ކޮމެޓީގެ ނައިބު މުގައްރިރު އަދި މާފަންނު ދެކުނު ދާއިރާގެ ކައުންސިލަރު އަބްދުﷲ ނާސިރު ވިދާޅުވީ މި ޕްރޮގްރާމްގެ ދަށުން، އަންނަ ހޮނިހިރު ދުވަހު މާލެ އާއި ވިލިމާލޭގެ މަގުތަކުގައި ގަސް އިންދަން ފަށާނެ ކަމަށެވެ.
މި ޕްރޮގްރާމުގެ ދަށުން ފުރަތަމަ އިންދާ 150 ގަސް، އަންނަ ހޮނިހިރު ދުވަހު އިންދަން ނިންމާފައި ވަނީ މަޖީދީމަގު ހިމެނޭ ގޮތަށް މާލޭގެ ބައެއް ބޮޑެތި މަގުތަކުގަ އެވެ. އޭގެ ތެރެއިން 65 ޕަސެންޓް ގަހަކީ އަނބުގަހެވެ. ބާކީ 33 ޕަސެންޓްގެ ތެރޭގައި ހިމެނެނީ ސައްކެޔޮގަހާއި ހިތިގަހާއި އަދި ދަނބުގަސް ފަދަ ގަސްތަކެވެ.
ކައުންސިލްގެ ސްޓްރެޓެޖިކް އެކްޝަން ޕްލޭންގައި ހިމެނިފައިވާ 100،000 ގަސް އިންދުމުގެ މި ޕްރޮގްރާމުގެ ދަށުން މަގުތަކާއި ޕާކުތަކުގައި މުޅި އަހަރަށް ބަލާއިގެން އެކި ދުވަސްތަކުގެ މަތިން ގަސްތައް އިންދާނެ އެވެ. އަދި މިހާރު މާލޭގައި އިންދާފައި ހުރި ގަސްތަކުގެ ތެރެއިން ނުހެދި ނުވަތަ މަރުވެފައި ހުރި ގަސްތައް ނެގުމަށް ފަހު އެ ތަންތަނުގައި ވެސް އާ ގަސްތައް އިންދާނެ އެވެ.
މި ޕްރޮގުރާމަށް ބޭނުންވާ ގަސްތައް ގެންނަނީ، ކައުންސިލުން މިކަމަށް ހާއްސަ ބަޖެޓެއް ހަދައިގެން، ރަށްރަށުންނާއި ރާއްޖެއިން ބޭރުންނެވެ. އަދި މި ގަސްތައް މާލެ ގެނެސް ބެހެއްޓުމަށް، އަލިމަސް ކާނިވަލުގައި ނާސަރީއެއް ހެދުމުގެ މަސައްކަތް ސިޓީ ކައުންސިލުން މިދިޔަ އާދިއްތަ ދުވަހު ވަނީ ފަށައިފަ އެވެ.
އައްޑޫ އާއި ފުވައްމުލަކު ކައުންސިލްގެ އެހީ ނުލިބުނު
ކައުންސިލްގެ ޖަލްސާގައި ޕޮލިސީ ޕްރޮގްރާމްސް އެންޑް ޕްރޮޖެކްޓްސް ކޮމެޓީގެ މުގައްރިރު އަދި މާފަންނު ހުޅަނގު ދާއިރާގެ ކައުންސިލަރު އިބްރާހިމް އަބޫބަކުރު ވިދާޅުވީ މި ގަސް އިންދުމުގެ ޕްރޮގްރާމަށް އައްޑޫ އަދި ފުވައްމުލަކު ސިޓީ ކައުންސިލްގެ އެހީތެރިކަމަށް އެދުނު ކަމަށާއި ނަމަވެސް އެއްބާރުލުން ލިބިފައިނުވާ ކަމަށެވެ.
"އައްޑޫ އަދި ފުވައްމުލަކަށް ޒިޔާރަތް ކުރުމުން އެ ދެ ސިޓީ ކައުންސިލުން ވެސް މި ކަމަށް ދެއްވަން ޖެހޭ އެއްބާރުލުން ދެއްވާފައިނުވޭ. ނަމަވެސް އިދިކޮޅު ޕީޕީއެމްގެ ކައުންސިލަރަކު ވަކިން މިކަމުގައި އެހީތެރިވެފައިވޭ، އެކަން އުފަލާ އެކު ފާހަގަކުރަން،" އޭނާ ވިދާޅުވި އެވެ.
މިއީ، ކުރިއަށް އޮތް ފަސް އަހަރަށް ކައުންސިލުން އެކުލަވާލައިފައިވާ ސްޓްރެޓެޖިކް އެކްޝަން ޕްލޭންގައިވާ ގަސް އިންދާ ހައްދާނެ ގޮތުގެ ޕްލޭން، ކަމާ ބެހޭ ފަންނީ ފަރާތް ތަކުގެ ލަފަ އާއި ރައްޔިތުންގެ ބައިވެރިވުމާއި އެއްގޮތަށް އެކުލަވާލުމުގެ މަސައްކަތުގެ ތެރެއިން ކުރިއަށްދާ މަޝްރޫއެކެވެ.
ތޮއްޖެހިފައިވާ މާލެ ފެހިތަނަކަށް ހަދަން ކުރީގެ ކައުންސިލުތަކުން ވެސް ގަސް އިންދުމުގެ ޕްރޮގުރާމްތައް ހިންގި އެވެ. ނަމަވެސް، ކޮންމެ ފަހަރަކު އެ މަސައްކަތް ފެށުމަށް ފަހު، ވަކި ހިސާބަކުން ވަނީ އަޅާނުލާ ދޫކޮށްލައިފަ އެވެ.