ވ. އާރަށް ކުއްޔަށް ދިނުމުގެ މުއާމަލާތާ ގުޅިގެން ކުރީގެ ރައީސް އަބްދުﷲ ޔާމީނަށް ކުރާ ދައުވާތަކުގެ ޝަރީއަތް ކްރިމިނަލް ކޯޓުން މިއަދު ފަށައިފި އެވެ.
މޯލްޑިވްސް މާކެޓިން އެންޑް ޕަބްލިކް ރިލޭޝަންސް ކޯޕަރޭޝަން (އެމްއެމްޕީއާރުސީ) މެދުވެރިކޮށް އާރަށުގައި ރިސޯޓެއް ތަރައްގީކުރަން ކުއްޔަށް ދޫކުރުމުގެ މުއާމަލާތާ ގުޅިގެން ޔާމީނަށް ދައުވާކުރަނީ އެ ރަށް ވަކި ބަޔަކަށް ދިނުމަށް ރިޝްވަތުގެ ގޮތުގައި އެއް މިލިއަން ޑޮލަރު ގަބޫލުކުރައްވައި، އެ ފައިސާ ލޯންޑާ ކުރެއްވި ކަމަށް ބުނެ އެވެ. އެ މަނިކުފާނުގެ މައްޗަށް ކުރަނީ ރިޝްވަތު ގަބޫލު ކުރުމުގެ ދައުވާ އާއި މަނީ ލޯންޑްރިންގެ ދައުވާ އެވެ. އަދި ރިޝްވަތު ދިނުމުގެ ދައުވާއެއް ވ. ފެލިދޫ ހަނދުވަރީގޭ، ޔޫސުފް ނައީމްގެ މައްޗަށް ވެސް ކުރެ އެވެ.
އެ މައްސަލައިގެ ޝަރީއަތް ފެށުމަށް ކްރިމިނަލް ކޯޓުގައި މިއަދު ބޭއްވި އަޑުއެހުމުގައި، އެ މައްސަލައިގެ ލިޔުންތައް ލިބިފައިވޭތޯ އެ މައްސަލަ ބައްލަވާ އިސް ގާޒީ އަހުމަދު ޝަކީލް ސުވާލު ކުރެއްވުމުން ޔާމީންގެ ވަކީލުން ވިދާޅުވީ ލިޔުންތަކެއް ލިބިފައި ވިޔަސް، އެ ލިޔުންތައް ބެލުމުގެ ފުރުސަތު ލިބިފައިނުވާ ކަމަށެވެ.
ދައުވާލިބޭ ޔޫސުފް ނައީމް ބުނީ ވަކީލަކު ހަމަޖައްސަން ބޭނުންވާތީ އެކަމަށް ތިން ހަފުތާގެ މުއްދަތެއް ބޭނުންވާ ކަމަށެވެ.
އިސް ގާޒީ ޝަކީލް ވިދާޅުވީ ވަކީލަކު ހަމަޖައްސަން ޔޫސުފް ނައީމަށް 10 ދުވަހުގެ މުއްދަތެއް ދެއްވާ ކަމަށެވެ. އަދި ދައުވާލިބޭ ފަރާތްތަކަށް ގާނޫނީ ގޮތުން ލިބިގެންވާ ހައްގުތަކަކީ ކޮބައިކަން ވެސް އިސް ގާޒީ ސާފުކޮށް ދެއްވި އެވެ.
އިސް ގާޒީ ޝަކީލް ވިދާޅުވީ އެ މައްސަލައިގެ އިތުރު އަޑުއެހުމެއް އަންނަ ހަފުތާ އާއި މިމަހުގެ 27 ވަނަ ދުވަހު ބާއްވާނެ ކަމަށެވެ. އަދި ދެން އޮންނަ އަޑުއެހުމުގައި ލިޔުންތައް ލިބިފައިވޭތޯ ކަށަވަރު ކުރުމަށް ފަހު 27 ވަނަ ދުވަހު އޮންނަ އަޑުއެހުމުގައި ޖަވާބުދާރީވުމުގެ ބައި ކުރިއަށް ގެންދެވޭނެ ކަމަށް ގާޒީ ވިދާޅުވި އެވެ.
ޔާމީންގެ މައްޗަށް ކުރާ މަނީ ލޯންޑްރިންގެ ދައުވާ ސާބިތުވެއްޖެ ނަމަ މަދުވެގެން ފަސް އަހަރުގެ ޖަލު ހުކުމެއް އެ މަނިކުފާނަށް އަންނާނެ އެވެ. އެ ދައުވާ ސާބިތުވެއްޖެ ނަމަ، ރިޔާސީ އިންތިޚާބުގައި ވާދަކުރުމުގެ ފުރުސަތު އެ މަނިކުފާނަށް ގެއްލޭނެ އެވެ.
އާރަށުގެ މައްސަލާގެ އިތުރުން ރ. ފުއްގިރި ކުއްޔަށް ދޫކުރުމުގެ މުއާމަލާތާ ގުޅިގެން ވެސް މަނީ ލޯންޑްރިންގެ އިތުރު ދައުވާއެއް ޔާމީންގެ މައްޗަށް ދައުލަތުން ކުރެ އެވެ. އެ މައްސަލާގެ އަޑުއެހުންތައް ކްރިމިނަލް ކޯޓުން ކުރިން އޮތީ ފަށައިފަ އެވެ.
އާރަށުގެ މައްސަލާގައި ޔާމީންގެ މައްޗަށް ކުރާ ދައުވާގެ އަޑުއެހުންތައް ފެށިއިރު، ގއ. ވޮޑަމުލާ ކުއްޔަށް ދިނުމުގެ މައްސަލާގައި އެ މަނިކުފާނުގެ މައްޗަށް އިއްވި ފަސް އަހަރުގެ ޖަލު ހުކުމް ސުޕްރީމް ކޯޓުން މިދިޔަ ނޮވެމްބަރު މަހު ވަނީ ބާތިލްކޮށް، އެމަނިކުފާނު މިނިވަންކޮށްފަ އެވެ.