އައިއެސް ޖަމާއަތް އޮތީ އުވިފައި ކަމަށް މައުލޫމާތު ލިބިފައިވާ ކަމަށާއި ވުޖޫދުގައި ނެތް ޖަމާއަތަކަށް ތާއީދުކުރާނީ ކިހިނެއްތޯ، ޓެރަރިސްޓް ޖަމާއަތަކަށް ތާއީދުކުރުމުގެ ކުށުގެ ދައުވާ ލިބޭ އަބްދުﷲ އަލިމަނިކު މިއަދު ކޯޓުގައި ބުނެފި އެވެ.
ރައްޔިތުންގެ މަޖިލީހުގެ ރައީސް މުހައްމަދު ނަޝީދު އަވަހާރަކޮށްލަން މިދިޔަ އަހަރު ދިން ބޮމުގެ ހަމަލާއަށް ފަހު ޓެރަރިޒަމާ ދެކޮޅަށް ހިންގި އޮޕަރޭޝަންތަކުގައި ހައްޔަރުކުރި އަބްދުﷲ އަލިމަނިކުގެ މައްޗަށް މިއަދު ދައުލަތުން ދައުވާ އިއްވުމުން އެ ދައުވާ ސާވެއްޖެތޯ އާއި ދައުވާއާ މެދު ބުނަނީ ކީކޭތޯ ގާޒީ ސުވާލުކުރެއްވުމުން އަބްދުﷲ އަލިމަނިކު ބުނީ ދައުވާ އަށް އިންކާރުކުރާ ކަމަށެވެ.
އިބްތިދާއީ ގޮތުން މިއަދު ބޭއްވި އަޑުއެހުމުގައި އަބްދުﷲ އަލިމަނިކު ބުނީ އޭނާ އަކީ ވަކިން ޖަމާއަތް ހަދައިގެން ނަމާދުކުރާ މީހެއް ކަމަށާއި ހުއްދަ ނެތި ދީނީ ނަސޭހަތްދޭ ކަމަށާއި އޭނާ އަކީ ފަނޑިޔާރެއްގެ ގޮތުގައި މަސައްކަތްކުރާ ކަމަށް ވެސް ދައުވާގައި އެބަ އޮތް ކަމަށެވެ.
އަބްދުﷲ އަލިމަނިކު ބުނީ އޭނާ އަކީ ޖަމާއަތަށް ހުކުރަށާއި އެހެން ނަމާދުތަކަށް ވެސް ދާ މީހެއް ކަމަށާއި އޭނާ ދަންނަ މީހުންނަށް އެނގޭނެ ކަމަށެވެ. ހުކުމް ކުރުމަކީ ރާއްޖޭގެ ޝަރުއީ ކޯޓުތަކަށް އޮންނަ ބާރެއް ކަމަށާއި އޭނާ އަކީ ދުވަހަކު ވެސް އެފަދަ ކަމެއް އަމިއްލައަށް ކޮށް އުޅުނު މީހެއް ނޫން ކަމަށް ވެސް ބުންޏެވެ. އަދި މިއީ ސަލާމަތް ބުއްދި ހުރި މީހަކު ގަބޫލުކުރާނެ މީހެއް ނޫން ކަމަށް ވެސް ބުންޏެވެ.
ދައުވާއަށް އިންކާރުކުރާ ސަބަބު ކިޔައިދެމުން އޭނާ ބުނީ ތަހުގީގު މަރުހަލާގައި ބައެއް މީހުންނަށް ވަނީ އޭނާއާ ދެކޮޅަށް ހެކިބަސް ދީފި ނަމަ ސަލާމަތްކޮށްދޭނެ ކަމަށް ބުނެ އެހެން މީހުން ގާތު ބުނެފައިވާކަން އެނގިފައިވާ ކަމަށެވެ. އަދި ވަގުތު ޖެހުމުން އެހެން ހިނގާފައި ހުރި ކަންކަން ހާމަކުރާނެ ކަމަށް ވެސް ބުންޏެވެ.
އަބްދުﷲ އަލިމަނިކު ބުނީ އޭނާއާ ދެކޮޅަށް ހުށަހަޅާފައިވާ ހެއްކާ ދެކޮޅަށް ހުށަހަޅާނެ ހެކި އެބަހުރި ކަމަށެވެ.
މެއި ހަ ވަނަ ދުވަހުގެ ރޭ ރައްޔިތުންގެ މަޖިލީހުގެ ރައީސް މުހައްމަދު ނަޝީދު އަވަހާރަކޮށްލަން ދިން ހަމަލާއަށް ފަހު ހައްޔަރުކުރި ހއ. މޮޅަދޫ ބަހާރުގޭ އަލިމަނިކުގެ އިތުރުން ހއ. ހޯރަފުށި، އަލަނާސިގޭ މުހައްމަދު ތަސްލީމްގެ މައްޗަށް ކުރާ ޓެރަރިސްޓް ޖަމާއަތަކަށް ތާއީދު ކުރުމުގެ ދައުވާގައި މިއަދު ޝަރީއަތުން ދެ މީހުންގެ މައްޗަށް ހުށަހަޅާފައިވާ ހެކި ރައްކާތެރިކުރުމުގެ އަމުރެއް ވެސް ނެރެފަ އެވެ.
އަލިމަނިކަކީ އަލިމަނިކަކީ 2007 ވަނަ އަހަރު އއ. ހިމަންދޫގައި ހަރުކަށި ފިކުރު ފަތުރައި ސަލާމަތީ ބާރުތަކާ ދެކޮޅަށް "ހަނގުރާމަ ކުރުމުގައި" އެންމެ އިސްކޮށް އުޅުނު މައްސަލާގައި އކުށް ސާބިތުވެ، 10 އަހަރަށް ޖަލަށް ލުމަށް މެއި 15، 2008 ގައި ހުކުމް އައި މީހެކެވެ. އޭނާގެ ހުކުމް ތަންފީޒުކޮށް ނިމެން ކުޑަ ދުވަސްކޮޅަކަށް ވެފައި ވަނިކޮށް ރައީސް މާފު ދެއްވީ އެވެ.
އެ މައްސަލާގައި މާފުށީ ޖަލުގައި ހުކުމް ތަންފީޒްކުރަމުން ދަނިކޮށް ދެ ފަހަރެއްގެ މަތިން އަލިމަނިކު ޖަލުން ފިލި އެވެ. ގދ. ތިނަދޫގައި އޭނާ ފިލައިގެން އުޅެނިކޮށް 2009 ވަނަ އަހަރު އޭނާ ހައްޔަރުކޮށްގެން ބޯޓެއްގައި ގެންދަނިކޮށް ކަނޑަށް ފުންމާލައިގެން ފިލަން ވެސް މަސައްކަތް ކުރި އެވެ. އޭގެ ފަހުން 2010 ވަނަ އަހަރު ޖަލުން ފިލައިގެން އުޅެނިކޮށް ތިލަފުށިން އޭނާ ހައްޔަރު ކުރީ އަހަރެއް ފަހުންނެވެ. އެ ދެ މައްސަލާގައި އަމުރަށް ނުކިޔަމަންތެރިވުމުގެ ހުކުމެއް ވެސް އޭނާ ތަންފީޒުކުރަން ޖެހުނެވެ.