ރައީސް އިބްރާހިމް މުހައްމަދު ސޯލިހު ކޮވިޑް-19 އަށް މިއަދު ޕޮޒިޓިވްވެއްޖެ އެވެ.
އެ މަނިކުފާނު ދެންމެ ކުރެއްވި ޓުވީޓެއްގައި ވިދާޅުވީ، ކޮވިޑަށް ޕޮޒިޓިވްވިކަން އެނގިވަޑައިގަތީ އަތޮޅުތެރެ އަށް ދަތުރުފުޅު ކުރެއްވުމަށްޓަކައި ރޭ ޕީސީއާރު ޓެސްޓް ހެއްދެވުމުން ކަމަށެވެ.
"މާތް ﷲގެ ރަހްމަތްފުޅުން ހާލު ރަނގަޅު. މިވަގުތު މިހިރީ ގޭގައި އެކަހެރިވެގެން،" ރައީސްގެ ޓުވީޓްގައި ވެ އެވެ.
ރައީސް ކޮވިޑަށް ޓެސްޓް ކުރެއްވީ ށ. ކޮމަންޑޫ ބައި-އިލެކްޝަންގެ އެމްޑީޕީގެ ކެމްޕެއިނަށް މިއަދު އެ ދާއިރާ އަށް އަދި މާދަމާ ހަވީރު ރ. އަލިފުށީގައި ބާއްވާ ޕްރެޒިޑެންޓްސް ކަޕް ފައިނަލް މެޗަށް ވަޑައިގަތުމަށް ޝެޑިއުލް ކުރައްވާފައިވާތީ އެވެ.
ރައީސް ވަނީ ކޮވިޑުން ދިފާއުވުމަށްޓަކައި ކޮވިޑް ވެކްސިންގެ ދެ ޑޯޒް ވެސް ފުރިހަމަ ކުރައްވައިފަ އެވެ.
ރައީސް އިބްރާހިމް މުހައްމަދު ސޯލިހު އެންމެ ފަހުން ދަތުރުފުޅެއް ކުރެއްވީ ދުބާއީ އަށެވެ. އަބޫދާބީގެ ވަލީއަހުދު ޝައިހް މުހައްމަދު ބިން ޒައިދު އަލް ނަޙްޔާންގެ ދައުވަތަކަށް ދުބާއީ އަށް ކުރެއްވި ދަތުރުފުޅަށް ފަހު ރައީސް ރާއްޖެ ވަޑައިގަތީ މިދިޔަ ބުދަ ދުވަހު އެވެ.
ރައީސްގެ އަނބިކަނބަލުން ފަސްޓް ލޭޑީ ފަޒްނާ އަހުމަދު ވެސް މިދިޔަ އަހަރުގެ އޭޕްރީލް މަހު ކޮވިޑަށް ޕޮޒިޓިވްވި އެވެ.
ރާއްޖޭގައި ކޮވިޑް ޖެހޭ މީހުންގެ އަދަދު ދުވަސްގަނޑަކަށް ފަހު މިހާރު ވަނީ މަތިވާން ފަށައިފަ އެވެ. ކޮންމެ ދުވަކު އެ ބައްޔަށް ޕޮޒިޓިވްވާ މީހުންގެ އަދަދު ހާހުން މައްޗަށް މިހާރު އަރާފައިވާއިރު މިދިޔަ ބުރާސްފަތި ދުވަހުގެ ހަވީރު 6 އިން އިއްޔެގެ ހަވީރު 6 އަށް ކޮވިޑަށް ޕޮޒިޓިވްވީ 1،697 މީހެކެވެ. އެކަމަކު، އޭގެ ކުރީ ދެ ދުވަހުގެ އަދަދުތައް ހުރީ 2،000 އިން މަތީގަ އެވެ.
ރާއްޖޭގައި މިވަގުތު ކޮވިޑް ޖެހިފައިވާ މީހުންގެ އަދަދު ވަނީ 11،000 އަށް ވުރެ މައްޗަށް އަރައިފަ އެވެ. ނަމަވެސް އެޑްމިޓް ކޮށްގެން ފަރުވާ ހޯދަނީ އިއްޔެގެ ހަވީރު 6 އާ ހަމައަށް 49 މީހެކެވެ.
ރާއްޖެ އިން މިހާތަނަށް 112،528 މީހަކަށް ކޮވިޑް ޖެހިފައިވާއިރު، 100،811 މީހަކު ވަނީ ބަލިން ރަނގަޅުވެފަ އެވެ. މިހާތަނަށް އެ ބަ ބަލީގައި ނިޔާވީ 269 މީހެކެވެ.
