ހުޅުމާލޭގައި ހަދަމުން އަންނަ އޮރެންޖް ހިޔާ ކޮވިޑް ފެސިލިޓީ އަންނަ މަހު ބޭނުންކުރަން ފަށާނެ ކަމަށް ހެލްތު އިމަޖެންސީ އޮޕަރޭޝަން ސެންޓަރު (އެޗްއީއޯސީ)ން މިއަދު ބުނެފި އެވެ.
ކޮވިޑަށް ޕޮޒިޓިވްވާ މީހުންނަށް ފަރުވާދޭނެ ރަނގަޅު ނިޒާމެއް ގާއިމްކުރުމާއި ބެޑް ކެޕޭސިޓީ އިތުރުކުރުމުގެ ބޭނުމުގައި އެޗްޑީސީގެ ޑިސްޓްރިބިއުޝަން ސެންޓަރެއްގެ ގޮތުގައި ބޭނުންކުރަމުން ދިޔަ އިމާރާތް ވަނީ ކޮވިޑް ފެސިލިޓީއަކަށް ހަދަން ނިންމައިފަ އެވެ.
އެޗްއީއޯސީގެ ކޮމިއުނިކޭޝަން އޮފިޝަލަކު ވިދާޅުވީ އޮރެންޖު ހިޔާގައި ކޮވިޑު ބަލީގެ 200 އަށްވުރެ ގިނަ މީހުންނަށް އެއްފަހަރާ ފަރުވާދެވޭނެ ކަމަށެވެ. އެ ތަނުގައި އައިސީޔޫ ބެޑާއި ހާލު ދެރަ މީހުންނަށް ފަރުވާދެވޭނެ ގޮތްތައް ހަމަޖައްސާނެ ކަމަށް އޭނާ ވިދާޅުވި އެވެ.
އޮރެންޖު ހިޔާގެ ސެޓަޕް ހަދަމުން އަންނަނީ ހުޅުމާލެ ހޮސްޕިޓަލުންނެވެ. އަންނަ މަހުގެ 10 ގައި އެ ފެސިލިޓީ ބޭނުންކުރެވޭ ވަރަށް ތައްޔާރުވަމުން އަންނަކަމަށް ވެސް އޮފިޝަލް ވިދާޅުވި އެވެ.
"ޑެލްޓާ ވޭރިއެންޓުގެ ޕީކަށް އެރިއިރު ހޮސްޕިޓަލް އޮތީ ފުރިފައި. މި ފަހަރު ކޭސްތައް 2،000 އިން މައްޗަށް އެރިއިރު ވެސް ހޮސްޕިޓަލައިޒޭޝަން މި އުޅެނީ 49 ގައި. އެ ހުރިހާ ކަމަކަށް ބަލާފައި މި ތައްޔާރުވަނީ،" އޭނާ ވިދާޅުވި އެވެ.
ރާއްޖެއިން ކޮވިޑްގެ ފުރަތަމަ ކޭސް ފެނުނުއިރު އޭރު ކޮވިޑަށް ފަރުވާދޭން ފެސިލިޓީއެއް ހެދީ ފަރުކޮޅުފުށީގަ އެވެ. އެކަމަކު ޖޫން، 2020 ގައި ހުޅުމާލޭ މެޑިކަލް ފެސިލިޓީގެ ހިދުމަތް ފެށި ފަހުން ހައި ރިސްކް މީހުންނަށް ފަރުވާ ދެމުން އަންނަނީ އެ ފެސިލިޓީގަ އެވެ.
އޮމިކްރޮން ވޭރިއެންޓާއެކު، ރާއްޖޭގައި ކޮވިޑުގެ ހާލަތު ވަނީ ވަރަށް ބޮޑަށް ގޯސްވެފަ އެވެ. އިތުރު ފިޔަވަޅުތައް ނާޅައިފި ނަމަ މިއަށްވުރެ ހާލަތު ގޯސްވެދާނެ ކަމަށް އެޗްޕީއޭއިން ބުނެ އެވެ.