ޕީޕީއެމްގެ ކުރީގެ ކެމްޕެއިން ޖަގަހަ "ރުމާލު 2" ހިންގައި ފަހުން ފްލޫ ކްލިނިކަކަށް ބޭނުންކޮށް ދޫކޮށްލި ފަހުން، ޑްރަގް އައްޑާއަކަށް ވެފައިވާ ތަނުގައި އަލިފާން ރޯވެއްޖެ އެވެ.
މާލެ ހިޔާ ފްލެޓްތަކުގެ ފުރަގަހުގައި ފްލޫ ކްލިނިކަކަށް ވެސް ބޭނުންކުރި މި ތަނުގައި ރޯވި ސަބަބެއް އަދި ނޭނގެ އެވެ.
ދަގަނޑު ހޮޅި އާއި ޓިނާއި ފިލާ ފަދަ ތަކެތި ބޭނުންކޮށްގެން ހަދާފައިވާ މި ތަނުގައި 2:30 ހާއިރު ރޯވެ ހުޅުގަނޑު ވަރަށް މައްޗަށް ހުއްޓެވެ. މާގިނައިރެއް ނުވެ ސިފައިން ގޮސް އަލިފާން ނިއްވުމުގެ މަސައްކަތް ފަށައި އަލިފާން ނިއްވާލައިފަ އެވެ. އެކަމަކު އޭރު ވަނީ މުޅި ތަން އަނދައިފަ އެވެ.
އެމްއެންޑީއެފުން ބުނީ މާލެހިޔާ ފްލެޓް ސަރަހައްދުގައި ފުލޫ ކްލިނިކް ހިންގި އިމާރާތުގައި އަލިފާނުގެ ހާދިސާއެއް ހިނގައިގެން އަލިފާން ނިއްވުމުގެ މަސައްކަތް ކުރަމުން އަންނަ ކަމަށާއި ހާދިސާ ރިޕޯޓްކޮށްފައި ވަނީ މެންދުރު ފަހު 2:47 ހާއިރު ކަމަށެވެ. އަދި 3:15 ހާއިރު އަލިފާން ނިއްވާލި އިރު އިމާރާތުގެ އެތެރެއަށް ބޮޑެތި ގެއްލުންތަކެއް ވެފައިވާ ކަމަށް ބުންޏެވެ.
ފުލުހުން ބުނީ އަލިފާނުގެ މި ހާދިސާ ތަހުގީގުކުރަމުން އަންނަ ކަމަށެވެ.
އެންމެ ފަހުން ފްލޫ ކުލިނިކަކަށް ބޭނުންކުރުމަށް ފަހު މިތަން ދޫކޮށްލި ފަހުން އެތަނުގައި އުޅެނީ މަސްތުވާތަކެތި ބޭނުންކުރާ މީހުންނެވެ. މީގެ ދެ ދުވަސް ކުރިން މިހާރުގެ ފޮޓޯގްރާފަރުން އެތަނަށް ގޮސް ނަގާފައިވާ ފޮޓޯތަކުން ފެންނަ ގޮތުގައި ރަލާއި މަސްތުވާ އެކި ބާވަތްތައް އެތަނު ތެރޭގައި ބޭނުންކުރެ އެވެ. އަދި އެކަމުގައި އުޅޭ މީހުން ނިދައި ދިރިއުޅެނީ ވެސް އެތަނުގަ އެވެ.