ލ. ގަމުގައި އަޅާ ކެންސަރު ހޮސްޕިޓަލުން، ރޭޑިއޭޝަން ތެރަޕީއާ އެކު ރާއްޖެއިން ބޭރަށް ދާން ނުޖެހޭ ވަރަށް ބަލީގެ ހުރިހާ ފަރުވާއެއް ލިބޭނެ ކަމަށް ހެލްތު މިނިސްޓްރީން މިއަދު ބުނެފި އެވެ.
ކެންސަރަށް ފަރުވާ ދޭން ޖެހޭ މީހުންގެ އަދަދު އެއް ދުވަހުން އަނެއް ދުވަހަށް އިތުރުވަމުންދާއިރު، ގިނަ ބައެއްގެ އެންމެ ބޮޑު ކަންބޮޑުވުމަކީ ފަރުވާގެ ވަކި ހިސާބަކުން ބޭރަށް ދާން ޖެހުމެވެ. ރާއްޖޭގައި ރޭޑިއޭޝަން ފަރުވާ ނުލިބޭތީ ކެންސަރަށް ފަރުވާ ހޯދާ މީހުން މުޅިން ވެސް ޖެހެނީ ރާއްޖެ އިން ބޭރަށް ދާށެވެ.
ހެލްތު މިނިސްޓްރީގެ ކޮލިޓީ އެޝުއަރެންސް ކޮމިޝަނާ ތަސްލީމާ އުސްމާން "މިހާރު" އަށް ވިދާޅުވީ، ވަކި ބައްޔަކަށް ހާއްސަކޮށްގެން ރާއްޖޭގައި އަޅާ ފުރަތަމަ ހޮސްޕިޓަލުން ރޭޑިއޭޝަން ތެރަޕީއާ އެކު ކެންސަރަށް ހަދާ ތަފާތު ޓެސްޓުތައް ހެދޭނެ ސެޓަޕް ގާއިމްކުރާނެ ކަމަށެވެ.
"ކެންސަރު ބަލީގެ ހުރިހާ ކަމަކަށް ފަރުވާ ލިބޭނެ ގޮތަށް ކޮންސެޕްޓް ޑިޒައިން ކުރަނީ،" ތަސްލީމާ ވިދާޅުވި އެވެ.
ހެލްތު މިނިސްޓްރީން އިއްޔެ ނެރުނު ތަފާސްހިސާބު ފޮތުގައިވާ ގޮތުން، ގައިންގަޔަށް ނާރާ ބަލިތަކުގެ ތެރެއިން 2020 ވަނަ އަހަރު ތިން ވަނައަށް އެންމެ ގިނަ މީހުން މަރުވީ ކެންސަރުގަ އެވެ. އެ އަހަރު އެކަނި ވެސް ކެންސަރުގައި 125 މީހުން މަރުވި އެވެ. އަދި އެއީ، މާލެ ސަރަހައްދާއި ރާއްޖެއިން ބޭރުގައި ފަރުވާ ހޯދާ މީހުން ފިޔަވައި ކެންސަރުގައި ދެން އެންމެ ގިނަ މީހުން މަރުވީ ހދ، ށ، އަދި ގދ. އަތޮޅުގަ އެވެ.
އެ އަހަރު ކެންސަރުގައި އެންމެ ގިނައިން މަރުވީ 72-89 އަހަރާ ދެމެދުގެ މީހުންނެވެ. ޒުވާން އުމުރުގެ ތިން މީހުން 2020 ވަނަ އަހަރު ކެންސަރުގައި މަރުވި އެވެ.
ކެންސަރު ހޮސްޕިޓަލް އިމާރާތްކުރުމުގެ ކަންކަން ބަލަހައްޓަނީ ޕްލޭނިން މިނިސްޓްރީންނެވެ. ނަމަވެސް އެ މަސައްކަތް ގޮސްފައިވާ ހިސާބެއް އަދި ސާފެއް ނުވެ އެވެ.
ކެންސަރަށް ފަރުވާ ދިނުމަށް ހާއްސަ ސެންޓަރެއް ހުޅުމާލެ ހޮސްޕިޓަލުގައި ވެސް އެބަހުއްޓެވެ. ނަމަވެސް ބާރުގަދަ ކެމިކަލްތައް ބޭނުންކުރާނެ ތަނެއް ނެތުމުން އެ ހޮސްޕިޓަލްގައި ވެސް ވެސް ރޭޑިއޭޝަން ތެރަޕީ ނުފެށެ އެވެ.
އެ ސެންޓަރުން "މިހާރު" އަށް ހިއްސާކުރި މައުލޫމާތުތަކަށް ބަލާއިރު، ކެންސަރަށް ފަރުވާ ހޯދުމަށް 769 މީހުން ރަޖިސްޓްރީވެފައިވެ އެވެ. އެ މީހުންގެ އުމުރު އުޅެނީ 1-80 އަހަރާ ދެމެދުގަ އެވެ. ނަމަވެސް ފަރުވާ ހޯދާ މީހުންގެ އެވްރެޖް އުމުރަކީ 30-60 އަހަރެވެ.
