ބޭނުންހިފޭ އެއްޗެހި އުކާނުލައި "އެއްގެއިން އަނެއް ގެއަށް"

އެއް ފަހަރު ބޭނުންކޮށްފައިވާ ތަކެތި އުކާލުމުގެ ބަދަލުގައި އޭގެ ބޭނުންހިފިދާނެ އެހެން މީހަކަށް ދިނުމުގެ ގޮތުން "އެއްގެއިން އަނެއް ގެއަށް" ކިޔާ ކެމްޕެއިނެއް އެޗްޑީސީން ފަށައިފި އެވެ.

އެޗްޑީސީން މިއަދު ބުނީ އެއީ "ވޯލްޑް ރިސައިކަލް ޑޭ" އާ ދިމާކޮށް، އެއްފަހަރު ބޭނުންކޮށްފައިވާ ތަކެތި އުކާލުމުގެ ބަދަލުގައި ދެވަނަ ފަހަރަށް ބޭނުންކުރުމުގެ އާދަ ދިވެހިންގެ މެދުގައި އަލާކުރުމަށް އެ ކުންފުނިން ތައާރަފުކުރި ކެމްޕެއިނެއް ކަމަށެވެ.

ގޭތެރޭގައި ބޭނުންކުރާ ތަކެއްޗާއި ފަރުނީޗަރު އުކާލުމުގެ ބަދަލުގައި ބޭނުންޖެހިފައިވާ މީހުންނަށް އެ ތަކެތި ލިބޭނެ ގޮތް ހަމަޖެއްސުމުގެ ގޮތުން އަންނަ ބުރާސްފަތި ދުވަހުގެ މެންދުރު ފަހު 2 އިން އަންނަ ހޮނިހިރު ދުވަހުގެ 2 އަށް ހުޅުމާލެ ރުއްގަނޑު 1 އަދި 2 ގައި ގޭގެއިން ގެންދާ ތަކެތި ބެހެއްޓުމާ އަދި އެ ތަކެތި ބަލާ އަންނަ މީހުންނަށް ހަވާލުކުރުމުގެ އިންތިޒާމު ހަމަޖައްސާނެ ކަމަށް އެޗްޑީސީން ބުންޏެވެ.

ދެވަނަ ފަހަރަށް ވެސް ބޭނުންކުރެވިދާނެ ތަކެތި ގެންދިއުމުގައި ސަމާލުކަންދޭންވީ ބައެއް ކަންކަން ވެސް އެ ކުންފުނިން އާއްމުކޮށްފައިވެ އެވެ. އެއީ؛

- އެ ކެމްޕެންގައި ބަލައިގަންނާނީ އިލެކްޓްރޯނިކް ސާމާނާއި ފަރުނީޗަރާ އަދި ބަދިގޭގައި ބޭނުންކުރެވޭ ތަކެތި.

- އެ ތަކެތި ގެނައުމާއި ގެންދިއުމުގެ އިންތިޒާމު ހަމަޖައްސާނީ އެ ގެންދާ ފަރާތަކުން.

- ކާބޯތަކެއްޗާއި ކުނިވާ ޒާތުގެ ތަކެތި ގެންދިއުން މަނާ.

- އެ ތަކެތި ބޭނުންކޮށްގެން ވިޔަފާރީކުރުން މަނާ.

އެ ހުރިހާ އެއްޗެއް ދޭން ޖެހޭނީ "ގިވްއަވޭ" އެއް ގޮތަށް އެއްވެސް އަގަކާ ނުލައި.

ރޯދަ މަހު ގޭތެރޭގައި ހިފާ ގެންގުޅޭ ތަކެތި އާކުރުމަކީ ދިވެހިން އާންމުކޮށް ކުރަމުން އަންނަ ކަމެކެވެ. އަދި ތަކެތި އާ ކުރާއިރު، އަދިވެސް ބޭނުންހިފިދާނެ ރަނގަޅު ބައެއް އެއްޗެހި ވަރަށް ގިނައިން އުކާލަ އެވެ. އެޗްޑީސީގެ އެ ކެމްޕެއިނަކީ އެގޮތަށް އުކާލެވޭ، ބޭނުންހިފޭނެ ރަނގަޅު އެއްޗެހި، އެ ބޭނުންވެފައިވާ މީހަކަށް ލިބޭ ގޮތް ހަދައިދިނުމެވެ.