ބޭސްފަރުވާ އަށް ފަހު، ގަލޮޅު ދެކުނު ދާއިރާގެ މެމްބަރު އަހްމަދު މަހްލޫފް މިރޭ އެނބުރި ރާއްޖެ ވަޑައިގެންފި އެވެ.
ޖަލަށްލާފައިވާ، މަހްލޫފް މީގެ ހަފުތާއެއްހާ ދުވަސް ކުރިން އިންޑިއާ އަށް ވަޑައިގަތީ، މޯލްޑިވްސް ކަރެކްޝަނަލް ސާވިސް އިން ދިން 10 ދުވަހުގެ ހުއްދައެއްގެ ދަށުންނެވެ. ފަރުވާގެ މުއްދަތު އިތުރުކުރަން ބޭނުން ނަމަ، އެ ފުރުސަތު ވެސް ކަރެކްޝަނަލް ސާވިސް އިން މަހްލޫފަށް ދިނެވެ.
މަހްލޫފްގެ އަނބިކަނބަލުން ނަޒްރާ ނަސީމް (ނަޒޫ) މިރޭ ވިދާޅުވީ މަހްލޫފްގެ ހާލު ކުރިއަށް ވުރެ ވަރަށް ބޮޑުތަން މިހާރު ރަނގަޅު ކަމަށެވެ. އޭނާގެ ހާލު ސީރިއަސްވީ، އެލާޖިކްވުމުގެ މައްސަލަ ކުރިމަތިވެ، އެކަށީގެންވާ ފަރުވާ ނުދިނުމުން ކަމަށް އާއިލާ އިން ވަނީ ބުނެފަ އެވެ.
އެލާޖިކްވުމުގެ އިތުރުން ލޮލުގެ ބައްޔަކަށް ބޭސްކޮށް، ކަރުގެ މައްސަލައެއްގައި މަހްލޫފް ގެންދަވަނީ ފިޒިއޯތެރަޕީ ވެސް ހައްދަވަމުންނެވެ.
މުޒާހަރާއެއްގައި ފުލުހުން ބަންދުކޮށްފައިވާ ސަރަހައްދަކަށް ވެންނެވި ކަމާއި ފުލުހުންގެ ބަންދުގައި ހުރިއިރު، ފުލުހުންގެ ވެހިކަލަށް އަރަން ދެކޮޅު ހައްދަވައި، ފިލަން އުޅުއްވި ކަން ސާބިތުވެ، ވަކިވަކިން އިއްވި ދެ ހުކުމުގައި، މަހްލޫފް ޖަލަށް ލީ 10 މަހާއި 24 ދުވަހަށެވެ. މަހުލޫފްގެ މައްޗަށް ކްރިމިނަލް ކޯޓުން އިއްވި ދެ ހުކުމް ހައި ކޯޓުގައި އިސްތިއުނާފްކޮށްފައިވާއިރު، އެ މައްސަލައިގެ ޝަރީއަތް އަދި ނުފަށަ އެވެ.
