މާލޭގައި ރޭ މެންދަމު ފުލުހުން ހިންގި ހާއްސަ ޑްރަގް ސާޗު އޮޕަރޭޝަނެއްގައި ގެއެއްގެ ތެރޭގައި ވަޅުލާފައި ހުރި 42 ކިލޯގެ ހެރޮއިން އަތުލައިގެންފި އެވެ.
ޕޮލިސް ކޮމިޝަނަރު މުހައްމަދު ހަމީދު ކުރެއްވި ޓުވީޓެއްގައި ވިދާޅުވީ އިއްޔެއިން ފެށިގެން ފުލުހުންގެ ޑްރަގް އެންފޯސްމަންޓް އެންޑް ކައުންޓާ ނާކޮޓިސް އިންޓެލިޖެންސް އިން މާލޭގައި ސާޗު އޮޕަރޭޝަނެއް ފަށާފައިވާ ކަމަށެވެ. މާފަންނު ގެއެއްގެ ތެރޭގައި ވަޅުލާފައި ހުރި ގިނަ އަދަދެއްގެ މަސްތުވާތަކެތި ފެނުނީ އެ އޮޕަރޭޝަންގެ ތެރެއިން ކަމަށް ވިދާޅުވި އެވެ.
ފުޅާދާއިރާއެއްގައި މަސްތުވާތަކެތީގެ ތެރޭގައި އުޅޭ ބައަކާ ގުޅުން އޮތް ކަމަށް ބެލެވޭ އެ މަސްތުވާތަކެތި ހުރީ ތަޅުންގަނޑުގެ އަޑީގައި ވަޅުލައިފަ އެވެ. އެ ތަކެތި ފެނުނީ އައިޖީއެމްއެޗް ކައިރީގައި ހުންނަ ފުލުހުންގެ ކުޑަކުދިންގެ މައްސަލަތައް ބަލާ ޔުނިޓްގެ އޮފީސް ކުރިމަތީގައި ހުރި ގެއަކުންނެވެ. ދެ ބުރިއަށް ހަދާފައިވާ އެ ތަނުގައި މީހުން ދިރިއެއްނޫޅެ އެވެ.
ފުލުހުން ބުނީ އެ މައްސަލައިގައި މިހާރު އެކަކު ހައްޔަރުކޮށް، މައްސަލަ ތަހުގީގުކުރަމުން އަންނަ ކަމަށެވެ.
ޕިކަޕެއްގައި ޑްރަގްސް އުފުލަނިކޮށް މިދިޔަ އާދީއްތަ ދުވަހުގެ ރޭ ވެސް ފުލުހުން ވަނީ އެ މީހުން ހުއްޓުވައި މަސްތުވާތަކެތި އަތުލައިގެންފަ އެވެ. އެ ޕިކަޕުން ފެނުނު 17 ކިލޯގެ މަސްތުވާތަކެތީގެ މައްސަލާގައި ހަތަރު ފިރިހެނަކު ހައްޔަރުކޮށްފައިވެ އެވެ. އެއީ 27-37 އަހަރުގެ ދެ ދިވެހިންނާއި ބަންގްލަދޭޝްގެ ދެ މީހަކެވެ.
ފުލުހުން ބުނި ގޮތުގައި އެއީ ވައިގެ މަގުން މަސްތުވާތަކެތި އެތެރެކޮށްފައިވާ ކަމަށް ކަސްޓަމްސް އިން ދިން މައުލޫމާތާ ގުޅިގެން ހިންގި އޮޕަރޭޝަނެކެވެ.
މަސްތުވާތަކެތީގެ މައްސަލަ ރާއްޖޭގައި ވަރަށް ބޮޑުވެފައިވާއިރު، ފާއިތުވި އަހަރެއްހާ ދުވަހުގެ ތެރޭގައި ފުލުހުން ވަނީ ބޮޑެތި އޮޕަރޭޝަންތައް ހިންގައި އެކި ތަންތަނުން ގިނަ އަދަދެއްގެ މަސްތުވާތަކެތި އަތުލައިގެންފަ އެވެ. މަސްތުވާތަކެއްޗާ ދެކޮޅަށް ފުލުހުން ހިންގާ އޮޕަރޭޝަން ނިންމާލާނީ ކާމިޔާބުކޮށްފައި ކަމަށް ފުލުހުންނާއި ހޯމް މިނިސްޓްރީން ވެސް ވަނީ ބުނެފަ އެވެ.