އިންޑިއާގެ އެކްސްޓާނަލް އެފެއާޒް މިނިސްޓަރު ޑރ. އެސް. ޖައިޝަންކަރު ރަސްމީ ދަތުރެއްގައި މިރޭ އައްޑު އަށް ވަޑައިގެންފި އެވެ.
އިންޑިއާ އިން ސީދާ އައްޑު އަށް ޖައިޝަންކަރު ވަޑައިގެންނެވިއިރު މިއީ ފަހުގެ ތާރީހެއްގައި ބޭރުގެ ވަޒީރަކު ރަސްމީ ދަތުރެއްގައި މާލެ ނޫން އެހެން ރަށަކަށް ސީދާ ވަޑައިގެންނެވި ފުރަތަމަ ފަހަރެވެ.
އައްޑޫން އޭނާ އަށް ހޫނު މަރުހަބާއެއް ދެންނެވީ ރާއްޖޭގެ ފޮރިން މިނިސްޓަރު އަދި އދ. 76 ވަނަ ސެޝަންގެ ރައީސް އަބްދުﷲ ޝާހިދު އެވެ.
ފޮރިން މިނިސްޓްރީން ބުނި ގޮތުގައި ޖައިޝަންކަރުގެ މި ދަތުރުގައި ދެ ގައުމުގެ ފޮރިން މިނިސްޓްރީން ރަސްމީ މަޝްވަރާތައް ކުރުމަށް ފަހު، ދެ އެއްބަސްވުމެއްގައި ސޮއިކުރައްވާނެ އެވެ.
އެއީ ރާއްޖޭގެ ހަޔާ އެޑިއުކޭޝަން ނެޓްވޯކާއި އިންޑިއާގެ ނޭޝަނަލް ނޮލެޖް ނެޓްވޯކާ ދެމެދު ގާއިމްކުރެވޭ އެއްބަސްވުމަކާއި ދެ ގައުމުގެ ވެކްސިނޭޝަން ސެޓްފިކެޓްތައް އަނެއް ގައުމުގައި ބޭނުންކުރެވޭނެ އިންތިޒާމް ހަމަޖެއްސުމާ ބެހޭ އެއްބަސްވުމެކެވެ.
ބޮޑުބެރުގެ ހަރަކާތަކުން ޖެއިޝަންކަރަށް ހޫނު މަރުހަބާއެއް އައްޑޫން ދެންނެވިއިރު މިއަދު ހަވީރުގެ ވަގުތެއްގައި ރައީސް އިބްރާހިމް މުހައްމަދު ސޯލިހާއި އަނބިކަނބަލުން ފަޒްނާ އަހުމަދު ވެސް ވަނީ އެ ރަށަށް ވަޑައިގެންފަ އެވެ.
އެ ދަތުރުގައި އިންޑިއާގެ އެހީގައި ހަދާފައިވާ ޕޮލިސް އެކަޑަމީ ރަސްމީކޮށް ހުޅުވުން އޮންނާނެ އެވެ. އަދި ރައީސްގެ އަރިހަށް އިހުތިރާމުގެ ޒިޔާރާތެއް ކުރައްވާ ގޮތަށް ހަމަޖެހިފައިވާ ކަމަށް ފޮރިން މިނިސްޓްރީން ބުނެ އެވެ.
މިއީ ޑރ. ޖައިޝަންކަރު އިންޑިއާގެ އެކްސްޓާނަލް އެފެއާޒް މިނިސްޓަރުގެ ހައިސިއްޔަތުން ރާއްޖެއަށް ކުރައްވާ ތިން ވަނަ ދަތުރެވެ. އަދި އައްޑުއަށް ކުރައްވާ ފުރަތަމަ ދަތުރެވެ. ޑރ ޖައިޝަންކަރު އެންމެ ފަހުން ރާއްޖެއަށް ވަޑައިގެންނެވީ މިދިޔަ އަހަރުގެ ފެބްރުއަރީ މަހުގެ ތެރޭގަ އެވެ.
މިހާރު ކުރައްވަމުންގެންދަވާ ދަތުރު ނިންމަވާލައްވައި، އިންޑިއާގެ ފޮރިން މިނިސްޓަރު އެނބުރި ގައުމަށް ވަޑައިގަންނަވާނީ މާދަމާގެ ވަގުތެއްގަ އެވެ.
