އެމެރިކާގެ މަޝްހޫރު އެކްޓަރު ކްރިސް އެވަންސްގެ ނަމުގައި އޭނާގެ ފޭނުންނަށް މެސެޖުކޮށް މަކަރާއި ހާލަތުން ފައިސާ ހޯދަމުންދާ މައްސަލަ ބޮޑުވެ، އެކަމަށް ސަމާލުވާން ފޭނުންގެ ކިބައިން އޭނާ އިއްޔެ އެދިއްޖެ އެވެ.
އުމުރުން 40 އަހަރުގެ އެވަންސް އަށް ޓުވިޓާގައި 15 މިލިއަން މީހުން ފޮލޯކުރާއިރު، އިންސްޓަގްރާމްގައި 14 މިލިއަން ފޮލޮވާސް ތިބެ އެވެ. އޭނާގެ ނަމުގައި ފޭކް އެކައުންޓްތައް ހަދައި، ފޭނުންގެ ފަރާތުން ފައިސާ ހޯދަން މެސެޖުކުރާ މައްސަލަ ވަނީ ވަރަށް ބޮޑުވެފަ އެވެ.
އެވަނަސް އިއްޔެ ކުރި ޓުވީޓެއްގައި ބުނީ އޭނާ ޓުވިޓާ އާއި އިންސްޓަގްރާމްގައި ބޭނުންކުރަނީ އެންމެ އެކައުންޓެއް ކަމަށާއި އެ އެކައުންޓައް ވާނީ ވެރިފައި ވެސް ކޮށްފައި ކަމަށެވެ.
"ފައިސާ ހޯދަން އަހަރެން އެއްވެސް ފޭނަކަށް މެސެޖެއް ނުކުރާނަން. އެހެން އެކަން ވަންޏާ އެއީ އޮޅުވާލުމެއް،" މާވެލްގެ "ކެޕްޓަމް އެމެރިކާގެ" ރޯލު ކުޅުނު އެކްޓަރު ބުންޏެވެ.
އޭނާ ބުނީ ފޭކް އެކައުންޓްތަކުން ކުރާ މެސެޖުތައް ގަބޫލުނުކުރުމަށާއި އެއީ ދޮގާއި މަކަރުން އުޅޭ ބައެއް ކަމަށެވެ.
އެވަންސްގެ ޓުވީޓަށް ރިޕްލައި ކުރި ބައެއް ފޭނުން ވަނީ އޭނާގެ ނަމުގައި ފައިސާ ހޯދަން ފޭކް އެކައުންޓްތަކުން ކޮށްފައިވާ މެސެޖުތަކުގެ ސްކްރީންޝޮޓްތައް ހިއްސާކޮށްފަ އެވެ.