ޓެރަރިޒަމްގެ އަމަލެއް ހިންގަން އުޅުނު ކަމުގެ ތުހުމަތުގައި އައްޑޫން ނުވަ މީހުން މިއަދު ހައްޔަރުކޮށްފި އެވެ.
ފުލުހުންގެ މީޑިއާ އޮފިޝަލަކު ވިދާޅުވީ ޓެރަރިޒަމްގެ އަމަލެއް ހިންގަން އުޅުނު ކަމުގެ ތުހުމަތުގައި ބަޔަކު ހައްޔަރުކޮށް، އެކަމާ ގުޅިގެން ބަލަންޖެހޭ ކަންކަން ބަލަމުން އަންނަ ކަމަށެވެ. ނަމަވެސް އިތުރު ތަފްސީލެއް ނުދެއްވަ އެވެ.
އެކަމަކު "މިހާރު" އަށް އެނގިފައިވާ ގޮތުގައި ޓެރަރިޒަމްގެ އޮޕަރޭޝަންގައި ނުވަ މީހަކު ހައްޔަރުކޮށްފައިވެ އެވެ. އެ މީހުން ހައްޔަރުކުރީ ކޮން ރަށަކުން ކަމެއް ސާފެއް ނުވެ އެވެ.
ޓެރަރިޒަމްގެ ތުހުމަތުގައި އައްޑޫން ބަޔަކު ހައްޔަރުކުރިއިރު، ރައީސް އިބްރާހިމް މުހައްމަދު ސޯލިހު ގެންދަވަނީ އެ ސިޓީގެ ހުރިހާ ރަށަކަށް ކުރައްވާ ދަތުރުފުޅެއް އިއްޔެ ފައްޓަވައިފަ އެވެ.
ހިތަދޫގައި މިއަދު ބޭއްވި ރަސްމިއްޔާތުގައި ޕޮލިސް އެކަޑެމީ ހުޅުުވާފައިވެ އެވެ. އެ ރަސްމިއްޔާތުގައި އިންޑިއާގެ ފޮރިން މިނިސްޓަރު ޑރ. ޖައިޝަންކަރު ވެސް ބައިވެރިވެވަޑައިގެންނެވި އެވެ.
