އިދިކޮޅު ޕީޕީއެމްގެ 5،000 މެމްބަރުން، އޮޅުވާލައިގެން އެހެން ޕާޓީތަކަށް ވަގަށް ވައްދާފައިވާ ކަމުގެ ތުހުމަތު އެ ޕާޓީން ކޮށްފި އެވެ.

ޕީޕީއެމްގެ ސެކްރެޓަރީ ޖެނަރަލް މުހައްމަދު ތޮލާލް، "މިހާރު" އަށް ވިދާޅުވީ އެ ޕާޓީގެ މެމްބަރުންގެ އަދަދު މަދުވުމާ ގުޅިގެން އެކަން ހިނގައިދިޔަ ގޮތް އެ މެމްބަރުންނަށް ގުޅައިގެން ބަލާފައިވާ ކަމަށެވެ. އޭގެތެރެއިން 90 ޕަސެންޓް މީހުން އެހެން ޕާޓީއަކަށް ސޮއިނުކުރާ ކަމަށް ބުނެފައިވާ ކަމަށް ތޮލާލް ވިދާޅުވި އެވެ.

"މެމްބަރުން މަދުވީމަ އަޅުގަނޑުމެން ސީދާ އެ މީހުންނަށް ގުޅައިގެން މި ބެލީ ވީ ގޮތެއް. އެގޮތަށް ބެލިއިރު އެމީހުން އެބަ ބުނޭ ތިމަންނަމެން އެެހެން ޕާޓީއަކަށް ސޮޔެއް ނުކުރަމޭ. އޮންނަންވާނީ ޕީޕީއެމްގައޭ،" އޭނާ ވިދާޅުވި އެވެ.

އޭނާ ވިދާޅުވި ގޮތުގައި ވަގު ފޯމު ހުށަހަޅައިގެން އެ ޕާޓީގެ މެމްބަރުން އެހެން ޕާޓީތަކަށް ގެންދިޔަ މައްސަލަ ބަލައިދޭން މިހާރު ވާނީ އިލެކްޝަންސް ކޮމިޝަނުގައި އެދިފަ އެވެ.

"އަޅުގަނޑުމެން ވާނީ ވަގަށް ގެންގޮސްފައިވާ މެމްބަރުން އަނބުރާ ޕާޓީއަށް ގެނައުމަށް އީސީގައި އެދިފައި،" އޭނާ ވިދާޅުވި އެވެ.

މީގެ ކުރިން ވެސް މީހުންނަށް ނޭނގި އެކި ޕާޓީތަކަށް ވައްދާފައިވާ ކަމުގެ މައްސަލަ ސޯޝަލް މީޑިއާގައި ފެންމަތިވި އެވެ.

އެކަން ބޮޑުވެ މި ފަހުން އީސީން ވަނީ މި މަހުން ފެށިގެން ޕާޓީތަކަށް ވަންނަ މީހުންގެ މައުލޫމާތުތައް އެ ކޮމިޝަނުގެ ވެބްސައިޓުގައި އާއްމުކޮށް، ޕާޓީއަކަށް ވަންނަން އެދޭ މީހާއަށް މެސެޖަކުން އެކަން އަންގަން ވެސް ނިންމައިފަ އެވެ.

ސިޔާސީ ޕާޓީތަކާ އެކު އިއްޔެ އިލެކްޝަން ކޮމިޝަނުން ބޭއްވި ބައްދަލުވުމުގައި ވެސް ޕީޕީއެމުން ވަނީ ވަގު ފޯމުތައް އެ ކޮމިޝަނަށް ހުށަހަޅައިގެން މީހުން ސިޔާސީ ޕާޓީތަކަށް ވައްދާ މައްސަލަ ނަގައިފަ އެވެ. އެކަމުގެ ކަންބޮޑުވުން ޕީޕީއެމެކޭ އެއްގޮތަށް އެމްޑީޕީން ވެސް ފާޅުކުރި ކަމަށް ތޮލާލް ވިދާޅުވެ އެވެ.

އޭނާ ވިދާޅުވި ގޮތުގައި އޮޅުވާލައިގެން މީހުން ސިޔާސީ ޕާޓީތަކަށް ވައްދާ މައްސަލަ ހުއްޓުވޭނީ އެފަދަ ޕާޓީތައް ޖޫރިމަނާކޮށް ފިޔަވަޅު އަޅައިގެންނެވެ.

ތޮލާލް ވިދާޅުވީ ޕާޓީތަކަށް މީހުން ވައްދާއިރު ފިންގާ ޕްރިންޓް ސާފު ނަމަ، އީސީން ފޯމު ބަލައިގަންނަ ކަމަށެވެ. އެކަމަކު ފިންގާ ޕްރިންޓް ވެރިފައި ކުރެވޭނެ އިންތިޒާމު އީސީގައި ނޯންނާތީ އެ ނިޒާމު ހޯދައިގެން ވިޔަސް ޕާޓީއަށް މީހުން އިތުރުކުރަނީ ސައްހަ ގޮތަކަށްތޯ ކަށަަވަރުކުރަން ޖެހޭ ކަމަށް އޭނާ ވިދާޅުވި އެވެ. ޕީޕީއެމަކީ ދެ ވަނަ އަށް އެންމެ މެމްބަރުން ގިނަ ޕާޓީ އެވެ. މިދިޔަ ފެބުރުއަރީ މަހުގެ ނިޔަލަށް އެ ޕާޓީގެ މެމްބަރުންގެ ގޮތުގައި އީސީގައި ރަޖިސްޓްރީވެފައި ވަނީ 34،368 މެމްބަރުން ކަމަށް ވެބްސައިޓުގައިވެ އެވެ. އެންމެ މެމްބަރުން ގިނަ އެމްޑީޕީގެ އަދަދަކީ 54،782 ކަމަށް އީސީގެ ހިސާބުތަކުގައިވެ އެވެ.