ރާއްޖެ އަށް މީހުން ޓްރެފިކްކޮށް، އެ މީހުން ލައްވާ ހަށިވިއްކުވި ބިދޭސީއަކު 15 އަހަރަށް ޖަލަށް ލުމަށް ކްރިމިނަލް ކޯޓުން ހުކުމްކޮށްފި އެވެ.

ބަޔަކު ލައްވާއި ހަށިވިއްކުވި މައްސަލައިގައި ކްރިމިނަލް ކޯޓުން މިދިޔަ ބުދަ ދުވަހު ހުކުމް އިއްވީ، 2019 ވަނަ އަހަރު ހައްޔަރުކުރި، މޮނީރު ކިޔާ ބަންގްލަދޭޝްގެ މީހަކަށެވެ. އޭނާއާ އެކު އެ ކުށްކުރުމުގައި ބައިވެރިވި ބަންގުލަދޭޝްގެ ސިއްދީކް ކިޔާ މީހަކަށް ވެސް އެ ދުވަހު ކޯޓުން ހުކުމް އިއްވި އެވެ.

މޮނީރުގެ މައްޗަށް ދައުލަތުން ދެ ދައުވާއެއް އުފުލި އެވެ. އެއީ މީހުން ޓްރެފިކްކުރުމުގެ ކުށުގެ ދައުވާ އާއި ރާއްޖޭގައި މީހަކު ލައްވާ ހަށިވިއްކުމުގެ ކުށުގެ ދައުވާ އެވެ؛

- ހަށިވިއްކުވި މައްސަލައިގައި އޭނާ އަށް 15 އަހަރުގެ ޖަލު ހުކުމެއް އިއްވި.

- މީހުން ޓްރެފިކްކުރި މައްސަލައިގައި ވެސް އޭނާ އަށް 15 އަހަރުގެ ޖަލު ހުކުމެއް އިއްވި.

އޭނާ ޖަލުގައި އޮންނަތާ ދެ އަހަރާއި 10 މަސް ދުވަސްވެފައި ވާތީ އެ ހުކުމުން ތަންފީޒުކުރާނީ އެ މުއްދަތު އުނިކުރުމަށް ފަހު އެވެ.

ސިއްދީކުގެ މައްޗަށް ވެސް ދައުލަތުން ދެ ދައުވާއެއް އުފުލި އެވެ. އެއީ ރާއްޖޭގައި މީހަކު ލައްވާ ހަށިވިއްކުމުގައި ބައިވެރިވުމުގެ ކުށުގެ ދައުވާ އާއި މީހުން ޓްރެފިކްކުރުމުގައި އެއްވެސް ސިފައެއްގައި ބައިވެރިވުމުގެ ކުށުގެ ދައުވާ އެވެ؛

- ހަށި ވިއްކުމުގައި ބައިވެރިވުމުގެ މައްސަލައިގައި އޭނާ އަށް 11 އަހަރުގެ ޖަލު ހުކުމެއް އިއްވި.

- މީހުން ޓްރެފިކްކުރުމުގައި ބައިވެރިވުމުގެ މައްސަލައިގައި ވެސް އޭނާ އަށް ހަތް އަހަރުގެ ޖަލު ހުކުމެއް އިއްވި.

އޭނާ ވެސް ޖަލުގައި އޮންނަތާ ދެ އަހަރާއި 10 މަސް ދުވަސްވެފައި ވާތީ، ހުކުމުން ތަންފީޒުކުރާނީ އެ މުއްދަތު އުނިކުރުމަށް ފަހު އެވެ.