އެމްޑީޕީގެ ޗެއާޕާސަން ކަމަށް ވާދަކުރެއްވި އިކޮނޮމިކް މިނިސްޓަރު ފައްޔާޒް އިސްމާއިލަށް މި އިންތިހާބުގައި ނ. ހެނބަދޫން ވޯޓުލީ މީހުންގެ 100 ޕަސެންޓް ދީފައިވާކަން ވަގުތީ ނަތީޖާ އިން ދައްކައިފި އެވެ.
މިއީ، އޭނާ އަށް 100 ޕަސެންޓް އަދި ވާދަވެރިޔާ މާފަންނު އުތުރު ދާއިރާގެ މެމްބަރު އިމްތިޔާޒް ފަހުމީއަށް އެންމެ ވޯޓެއް ވެސް ނުލިބުނު ހަމައެކަނި ރަށެވެ.
ހެނބަދޫގެ ޖުމްލަ އާބާދީއަކީ ގާތްގަނޑަކަށް 700 އެވެ. މީގެތެރެއިން އެމްޑީޕީގެ ރަޖިސްޓްރީގައި ތިބި ކަމަށް އެ ޕާޓީގެ ވެބްސައިޓުން ދައްކަނީ 157 މީހުންނެވެ. ކެމްޕޭނުގައި ފައްޔާޒާއި އިންތި ވެސް ވަޑައިގަތް އެ ރަށުގެ ވޯޓުގައި އިއްޔެ ބައިވެރިވި 111 މީހުން ވެސް ވޯޓު ދިނީ ފައްޔާޒަށެވެ.
އާބާދީ މަދު، ނ. ހެނބަދޫން މި ލިބުނީ ކެމްޕޭން، މެނޭޖަރު އިބްރާހިމް ވަހީދަށް، ހައިރާންކުރުވަނިވި ނަތީޖާއެއް ނޫނެވެ. އެއީ، ރަށުން ދިމާވި އެމްޑީޕީގެ ހުރިހާ މެމްބަރުން ވެސް ފެށުނީއްސުރެން ޔަގީންކަމެއް ދެމުން އައި ގޮތް ކަމަށް ވިދާޅުވި އެވެ.
"ދިމާވި ހަމަ ކޮންމެ މީހަކު ވެސް ބުނޭ މި ރަށުން އެންމެ ވޯޓެއް ވެސް ފަޔާ ނޫން މީހަކަށް ނުލިބޭނެއޭ. ވަރަށް ހޫނު މަރުހަބާއެއް ކީ ރަށެއް އެ ވެސް. އެ މީހުންނަށް ވަރަށް ކަމުދާ މީހަކަށް ފަޔާ ވެފައި އޮތީ ވޯޓުގެ ކުރިން ވެސް،" އޭނާ ވިދާޅުވި އެވެ.
އިބުރޭ ލަފާކުރައްވާ ގޮތުގައި، އޭގައި ސަބަބުތަކެއް އެބަހުއްޓެވެ. އެއް ކަމަކަށް ޒަމާނުއްސުރެން އަޅާނުލައި އޮތް އެ ރަށަށް މި ސަރުކާރުން ކޮށްދެމުން އަންނަ ކަންކަމެވެ. އަދި އެކަންކަމުގެ ފަހަތުގައި، އެ ރަށް ހިމެނޭ ކެނދިކުޅުދޫ ދާއިރާގެ މެމްބަރު އަހްމަދު އީސަ، މިނިސްޓަރު ފައްޔާޒްގެ އެހީތެރިކަމާ އެކު ސަރުކާރާ ގުޅިގެން ހިންގަމުން އަންނަ މަޝްރޫއުތަކާއި ކޮށްދެއްވަމުން ގެންދަވާ ހިދުމަތް ބަލައިގަންނަކަން ދައްކުވައިދިނީ ކަމަށް ވިދާޅުވި އެވެ.
އޭނާ ވިދާޅުވި ގޮތުގައި އެމްޑީޕީއަށް ފައްޔާޒް ހޮވަން ޖެހޭ މައިގަނޑު ސަބަބަކީ ރައީސް ސޯލިހާ އެކު އެމްޑީޕީއަށް ދެ ވަނަ ދައުރެއް ކަށަވަރުކުރުމުގެ މެސެޖު ވެސް ވީ އެ މެމްބަރުންނަށް ހިތްހަމަޖެހުން ގެނުވި ކަމަކަށެވެ.
"ވަރަށް ހިތްހަމަޖެހޭ ނަތީޖާއެއް، ޔަގީންކަމާ އެކު ހޯދައި އެދިނީ،" އިބުރޭ ވިދާޅުވި އެވެ.
ކުރެންދޫ ދާއިރާގެ މެމްބަރު އަބްދުލްޣަނީ މަޖިލީހުގައި ތަމްސީލްކުރައްވާ އޮޅުވެލިފުށިން ވެސް ފައްޔާޒް ފުރިހަމަ ކާމިޔާބީއެއް ހޯއްދެވި އެވެ. އެ ރަށުގައި 94 މީހުން ވޯޓުލާފައިވާ އިރު 91 ވޯޓު ލިބިވަޑައިގަތެވެ. އިންތިއަށް ލިބިވަޑައިގަތީ ދެ ވޯޓެވެ. އެއް ވޯޓު ގުނާފައި ވަނީ ބާތިލްގެ ގޮތުގަ އެވެ.
ފައްޔާޒަށް ދެން އެންމެ ބޮޑު ޕަސެންޓެއް އެއް ރަށަކުން ލިބިވަޑައިގަތީ، ރައީސް އިބްރާހިމް މުހައްމަދު ސޯލިހް ނިސްބަތްވެވަޑައިގަންނަވާ ޅ. ހިންނަވަރުންނެވެ. އެ ރަށުން ފައްޔާޒަށް 600 ވޯޓު ލިބިވަޑައިގަތް އިރު އިންތި އަށް ލިބިވަޑައިގަތީ ނުވަ ވޯޓެވެ.
ޗެއާޕާސަން އިންތިހާބުގައި 50،000 އާ ގާތް ކުރާ އަދަދަކަށް އެމްޑީޕީގެ އާންމު މެމްބަރުން ވޯޓުލާން ނިކުތް އިރު އޭނާ ހޮވިވަޑައިގަތީ 58 ޕަސެންޓުންނެވެ.
މި ވޯޓުގައި ތިން އަތޮޅެއް ފިޔަވައި އެހެން އަތޮޅުތަކުން މެޖޯރިޓީ ވެސް ހޯއްދެވީ ފައްޔާޒެވެ. އަތޮޅުތަކަށް ބަލާއިރު ތަފާތު ބޮޑުކޮށް ކާމިޔާބު ކުރެއްވި އަތޮޅުތަކުގެ ތެރޭގައި، ހއ. އަތޮޅާއި ހދ. އަތޮޅާއި ށ. އަތޮޅާއި ނ. އަތޮޅާއި ޅ. އަތޮޅާއި މާލެ އަތޮޅު ހިމެނެ އެވެ.