އެއްފަސްގަނޑެއްގެ ގޮތުގައި އޮންނަ ލ. އިސްދޫގައި ދެ ކައުންސިލެއް ހިންގާތީ، އެކަމާ ހިތްހަމަ ނުޖެހިގެން އިސްދޫގެ ގިނަ އަންހެނުންތަކެއް، އެ ރަށު ކައުންސިލް އިދާރާގެ ކައިރިއަށް އެއްވެ މުޒާހަރާ ކުރަން ފަށައިފި އެވެ.
ކައުންސިލްގެ ރައީސް އިބްރާހިމް ހަލީލް "މިހާރު" އަށް މިއަދު ވިދާޅުވީ މިހާރު ވެސް ގިނަ ބަޔަކު ދަނީ އެ އިދާރާގެ ކައިރީގައި އަޑުއުފުލަމުން ކަމަށެވެ.
"އަޅުގަނޑުމެންނަށް ވެސް ނުނިކުމެވިފައި މި ތިބީ. މިހާރު ފުލުހުންގެ އެހީތެރިކަމަށް ވެސް އެދިގެން މި އުޅެނީ،" ހަލީލް ވިދާޅުވި އެވެ.
އޭނާ ވިދާޅުވި ގޮތުގައި، އަންހެންވެރިން މުޒާހަރާ ކުރަނީ އެ ރަށުގެ ބިމުގެ މައްސަލައިގަ އެވެ. އެއް ފަސްގަނޑެއްގައި ދެ ކައުންސިލެއް އޮތުމުގެ ކަންބޮޑުވުން މުޒާހަރާގެ ބައިވެރިން ފާޅުކުރަމުންދާ ކަމަށް ހަލީލް ވިދާލުވިއެވެ.
އިސްދޫގައި އަދި ކަލައިދޫގައި ވެސް އަންނަނީ ވަކިވަކި ކައުންސިލެއް ހިންގަމުންނެވެ.
"ސަރުކާރުން ވަކި ތަނެއް ނެތް އަޅުގަނޑުމެންގެ އިހުތިސޯސްގެ ގޮތުގައި ދައްކާފައެއް. ދެން ދެ ރަށް ވަކިކުރަން ލައިނެއް ކުރައްސަވާލެއްވި އިރުގައި އިސްދޫ ކޮޅަށް މާ ކުޑަކަމަށް ރައްޔިތުން ބުނަނީ،" ހަލީލް ވިދާޅުވި އެވެ.
މުޒާހަރާގެ ބައިވެރިން އަޑުއުފުލަނީ އިސްދޫ، ދެ ބަޔަށް އެއް ވަރަށް ބެހުމަށް ގޮވައިލަ އެވެ. ނުވަތަ ދެ ކައުންސިލްގެ ބަދަލުގައި އިސްދޫގައި އެއް ކައުންސިލެއް އޮތުމަކީ ވެސް މުޒާހަރާގެ ބައިވެރިންގެ އެދުމެކެވެ.
"އަސްލު މި މައްސަލަ ހޫނުވެގެން މި އުޅެނީ މިދިޔަ ހުކުރު ދުވަހު ދެ އަވަށް ގުޅޭ ބޮޑުމަގު ކުނިކަހަން އިސްދޫގެ އަންހެނުން ނުކުތުމުން ކަލައިދޫ ކައުންސިލުން ހުއްޓުވުމުގެ ސަބަބުން،" ހަލީލް ވިދާޅުވި އެވެ.
އެ މައްސަލަތައް ހައްލުކުރުމަށްޓަކައި އިސްދޫ ކައުންސިލުން މީގެ ކުރިން ލޯކަލް ގަވަމެންޓް އޮތޯރިޓީ (އެލްޖީއޭ) އާ ވެސް ވަނީ މަޝްވަރާ ކޮށްފަ އެވެ.
