ސަރުކާރާ ދެކޮޅަށް އަަޑު އުފުލުމަށް، އިދިކޮޅު ޕާޓީތަކުން މާދަމާ މާލޭގައި ބޮޑު އެއްވުމެއް ބާއްވަން ތައްޔާރު ވަމުން ދަނިކޮށް، ގާނޫނާ ޚިލާފު އެއްވެސް ހަރަކާތެއްގައި ކައުންސިލަރުން ބައިވެރި ނުވުމަށް ލޯކަލް ގަވަމެންޓް އޮތޯރިޓީ (އެލްޖީއޭ) އިން މިއަދު އިލްތިމާސްކޮށްފި އެވެ.
އެތަނުން ނެރުނު ނޫސް ބަޔާނެއްގައި ބުނީ ކައުންސިލަރުންނަކީ ރައްޔިތުން އިންތިޚާބު ކޮށްފައިވާ ބޭފުޅުންނަށް ވާތީ، ގާނޫނަށް ފުރިހަމަ އަށް ބޯލަނބައި ގާނޫނުއަސާސީން ކަށަވަރުކޮށް ދީފައިވާ ޔުނިޓަރީ ދައުލަތުގެ ސިފަ ދެމެހެއްޓުމަކީ ކައުންސިލަރުންގެ ޒިންމާއެއް ކަމަށެވެ.
"...އަދި އެއީ އަމަލީ ގޮތުން ނަމޫނާ ދައްކަވަން ޖެހޭ ފަރާތްތަކަށްވާ ހިނދު ގާނޫނާ ހިލާފަށް ބޭއްވޭ އެއްވެސް ހަރަކާތެއްގައި ބައިވެރިވުމާއި އެފަދަ އެއްވެސް ކަމަކަށް ހިތްވަރު ލިބޭ އަމަލެއް ނުކުރުމަށް އެންމެހައި ކައުންސިލްތަކަށާއި ކައުންސިލަރުންނަށް އިލްތިމާސް ކުރަމެވެ." އެލްޖީއޭގެ ބަޔާނުގައި ވެ އެވެ.
އެލްޖީއޭ އިން ބުނެފައިވާ ގޮތުގައި ގާނޫނާ ހިލާފަށް ބާއްވާ އެއްވުންތަކުގައި ބައެއް ކައުންސިލަރުން ބައިވެރިވާކަމުގެ ޝަކުވާތައް ވެސް އެ އިދާރާ އަށް އަށް ދަނީ ލިބެމުންނެވެ.