އާންމުންނަށް ހުޅުވާލި 100 ކޯޓާގައި ހައްޖަށް ދެވޭނީ 76,960ރ. އަށް

މި އަހަރުގެ ހައްޖުގެ އަޅުކަމަށް ދިއުމަށް މޯލްޑިވްސް ހައްޖު ކޯޕަރޭޝަންގެ ކިއުގައި ޖެހިފައިވާ މީހުން ފިޔަވައި، އާންމުކޮށް ހުޅުވާލައިގެން ދޫކުރަން ނިންމި 100 ކޯޓާގައި ދެވޭނީ 76،960ރ. އަށް ކަމަށް ހައްޖު ކޯޕަރޭޝަނުން ބުނެފި އެވެ.

ރާއްޖެ އިން ހައްޖުގެ އަޅުކަން އަދާކުރުމަށް ސައުދީ އަރަބިއްޔާ އަށް މީހުން ގެންދިއުމުގެ ފުރުސަތު ހައްޖު ކޯޕަރޭޝަނަށް އެކަނި މި އަހަރު ދޭން އިސްލާމިކް މިނިސްޓްރީން ވަނީ ނިންމައިފަ އެވެ. މި އަހަރު ރާއްޖެ އަށް 453 ކޯޓާ ލިބިފައިވާއިރު އޭގެ ތެރެއިން 100 ކޯޓާ އާންމުކޮށް ހުޅުވައިލި ނަމަވެސް ބާކީ ކޯޓާތައް ހާއްސަ ކޮށްފަައި ވަނީ ހައްޖަށް ދިއުމަށް ފައިސާ ދައްކައި، ހައްޖު ކޯޕަރޭޝަންގައި ކިއުގައި ޖެހިފައިވާ މީހުންނަށެވެ.

ހައްޖު ކޯޕަރޭޝަންގެ ކިއުގައި ޖެހިފައިވާ މީހުންނަށް އެހެން އަހަރުތަކެކޭ އެއްގޮތަށް 69،965 ރުފިޔާއަށް ހައްޖަށް ދެވުނު ނަމަވެސް ބާކީ 100 ކޯޓާގައި ހައްޖަށް ގެންދާ މީހުންގެ ދަތުރުގެ އަގު އުޅެނީ 76،960 ރުފިޔާ އެވެ.

އެ އަގު ނަގަން ނިންމި ސަބަބު ވިދާޅުނުވި ނަމަވެސް އެ ކޯޕަރޭޝަންގެ އޮފިޝަލަކު ވިދާޅުވީ މިއީ އާންމުކޮށް ހުޅުވާލައިގެން ހައްޖު ކޯޕަރޭޝަނުން ބަޔަކު ހައްޖަށް ގެންދާ ފުރަތަމަ ފަހަރު ކަމަށެވެ. މީގެ ކުރިން އަބަދުވެސް އަމަލުކުރަމުން ދިޔައީ ހައްޖަށް ދިއުމަށް ފައިސާ ދައްކާ ނިންމާ ތަރުތީބުން ފުރުސަތު ދިނުމަށް ކަމަށް ވިދާޅުވި އެވެ.

އެ ކޯޕަރޭޝަނުން ކުރި އިއުލާނެއްގައި ބުނީ 100 ކޯޓާ އާއްމުންނަށް ދިނުމަށް އިސްލާމިކް މިނިސްޓްރީން އެ ކުންފުންޏާ ހަވާލުކޮށްފައިވާތީ، އެ ކޯޓާގައި ހައްޖަށް ދާނެ މީހުން ކަނޑައަޅާނީ އެ ކަމަށް ކުރިމަތިލާ މީހުންގެ ތެރެއިން ޝަރުތު ފުރިހަމަވާ މީހުންގެ މެދުގައި ގުރު ނަގައިގެން ކަމަށެވެ.

އެ ގުރުގައި 100 މީހުންގެ އިތުރުން "ވެއިޓިން ކިއު" ގެ ގޮތުގައި އިތުރު 25 މީހުން ނަގާނެ ކަމަށް އެ ކޯޕަރޭޝަންގެ އިއުލާނުގައިވެ އެވެ. އަދި ގުރުއަތުން ހޮވޭ މީހާގެ ޖާގަ އެހެން މީހަކަށް ބަދަލު ނުކުރެވޭނެ ކަމަށް ވެސް ބުންޏެވެ.

"ފުރަތަމަ 100 ޖާގަ އަށް ނެގޭ ފަރާތްތަކުގެ ތެރެއިން ފަރާތަކަށް އެއްވެސް ސަބަބަކާ ހުރެ ހައްޖަށް ދިއުމަށް އުޒުރުވެރިވެއްޖެ ނަމަ ވެއިޓިން ކިއޫ ތަރުތީބުން ޖާގަދެމުން ގެންދެވޭނެ އެވެ،" އިއުލާނުގައިވެ އެވެ.

އެ މީހުން، ހައްޖަށް ދިއުމަށް ގުރުއަތުން ހޮވުނުކަން އަންގާ ތާރީހުން ފެށިގެން ގިނަވެގެން ތިން ދުވަހުގެ ތެރޭގައި ފައިސާ ދައްކަން ޖެހެ އެވެ. އެ މުއްދަތަށް ފައިސާ ނުދެއްކިއްޖެ ނަމަ އެ މީހެއްގެ ޖާގަ ގެއްލޭނެ އެވެ.

- ކުރިން ހައްޖު އަދާކޮށްފައިވާ މީހަކަށް ނުވުން.

- ޖޫން 15، 2022 އަށް އުމުރުން 65 އަހަރު ފުރިފައިވާ މީހަކަށް ނުވުން. - ކޮވިޑް ވެކްޝިންގެ ދެ ޑޯޒު ފުރިހަމަކޮށްފައިވާ މީހަކަށް ވުން.

- އެންމެ މީހެއްގެ ކެޓަގަރީ.

- ދެ މީހެއްގެ ކެޓަގަރީ: އެ ކެޓަގަރީ އަށް ކުރިމަތިލެވޭނީ އުމުރުން 45 އަހަރު ނުފުރޭ އަންހެނުންނާއި ދެމަފިރިންނާއި ބަލި ހާލަތު ހުރި ގޮތުން އެކަނި ހައްޖުގެ އަޅުކަން އަދާ ނުކުރެވޭ މީހުންނަށް.

އެ 100 ކޯޓާގައި ހައްޖަށް ދާން ބޭނުންވާ މީހުންގެ ފޯމު ބަލައިގަތުމަށް ހަމަޖެހިފައި ވަނީ މާދަމާގެ ހަވީރު 6 އާ ހަމައަށް.