ދަރަނި ދެއްކުމުގައި ބޮޑު ގޮންޖެހުމެއް ނެތް: ރައީސް

ރާއްޖޭގެ ދަރަނި ބޮޑުވެ 100 ބިިލިއަން ރުފިޔާއާ ގާތަށް ގޮސްފައި ވިޔަސް ދަރަނި އަދާކުރުމުގައި މި ވަގުތު ބޮޑު ގޮންޖެހުމެއް ނެތް ކަމަށް ރައީސް އިބްރާހިމް މުހައްމަދު ސޯލިހް މިއަދު ވިދާޅުވެއްޖެ އެވެ.

ގިނަ ދުވަސްތަކަކަށް ފަހު ރައީސް މީޑިއާއާ ބައްދަލުކުރައްވައި ވިދާޅުވީ އިގްތިސާދީ ގޮތުން މިވަގުތު ދަތިކަމެއް ކުރިމަތިވެފައި ވިޔަސް ބައެއް ފަރާތްތަކުން އިގްތިސާދާ ބެހޭ ގޮތުން ދައްކަނީ ހަގީގަތާ މާ ދުރު ވާހަކަތަކެއް ކަމަށާއި އެކަމުގެ ސަބަބުން ރައްޔިތުންނަށް ހާސްކަން ކުރިމަތިވާ ކަމަށެވެ.

"ދުނިޔޭގެ އިގްތިސާދަށް ކުރިމަތިވެފައިވާ ދަތި އުނދަލުގެ އަސަރު ރާއްޖެއަށް ވެސް ކުރާނެ. އެއީ އޮޅުމެއް ނެތި އެނގެން އޮތް ކަމެއް،" ރައީސް ވިދާޅުވި އެވެ.

އިގްތިސާދާ ބެހޭ ގޮތުން ބައެއް މީހުން ވާހަކަ ދައްކަނީ ސިޔާސީ ބޭނުމުގައި ކަމަށް ރައީސް ވިދާޅުވި އެވެ.

ރައީސް ވިދާޅުވީ އިގްތިސާދީ ހާލަތު މިހާރު އޮތް ގޮތަށް ބަލައި ބައެއް މަޝްރޫއުތައް މެދުކަނޑާލާފައިވާ ކަމަށާއި މި ވަގުތު ލޯނު ނަގައިގެން ބޮޑު އާ މަޝްރޫއެއް ފެށުމުގެ ވިސްނުމެއް ނެތް ކަމަށެވެ. މިވަގުތު ހާލަތު އޮތް ގޮތުން ކޮންމެހެން ކުރަންޖެހޭ ކަންކަން ހުންނާނެ ކަމަށާއި ބައެއް މަޝްރޫއުތައް، އިގްތިސާދަށް އަންނަ ބަދަލަށް ބަލާފައި ނޫނީ ކުރިއަށް ނުގެންދާނެ ކަމަށް ރައީސް ވިދާޅުވި އެވެ. އެކަމަކު މިހާރު ކުރިއަށްދާ މަޝްރޫއުތަކަކީ ފައިސާ ހަމަޖެހިފައި ހުރި މަޝްރޫއުތައް ކަމަށާއި އެ ކަންކަން ކުރިއަށް ގެންދިއުމުގައި ދަތިކަމެއް ނެތް ކަމަށް ވިދާޅުވި އެވެ.

ރައީސް އިބްރާހިމް މުހައްމަދު ސޯލިހު މިއަދު ނޫސްވެރިންނާ ބައްދަލު ކުރައްވަނީ -- ފޮޓޯ: ރައީސް އޮފީސް

ރައީސް ވިދާޅުވީ ޔޫސަބްލް ރިޒާވްގައި ރަނގަޅު އަދަދަކަށް ފައިސާ އެބަހުރި ކަމަށާއި ތެލާއި ކާޑާއި ބޭސް ފަދަ ތަކެތި ގަތުމަށް މި އަހަރު ނިމެންދެން ވެސް ދަތިކަމެއް ނެތި ހޭދަކުރެވޭނެ ކަމުގެ ޔަގީންކަން އެބަ އޮތް ކަމަށެވެ. އެކަމަކު ރައީސް ވިދާޅުވި ގޮތުގައި މި ވަގުތު މުޅި ދުނިޔޭގެ އިގްތިސާދަށް އައިސްފައިވާ ބަދަލުން ތަކެތީގެ އަގު ބޮޑުވާނެ ކަމަށެވެ.

މިވަގުތު ތިލަމާލެ ބްރިޖްގެ މަސައްކަތް ހުއްޓާލަން ނުޖެހޭނެތޯ ކުރި ސުވާލުގެ ޖަވާބުގައި ރައީސް ވިދާޅުވީ ބްރިޖަށް ފައިސާ ދައްކަން ފަށަން ޖެހެނީ އަދި މާ ފަހުން ކަމަށް ވާތީ މިވަގުތު އެ މަޝްރޫއު ހުއްޓާލަންނުޖެހޭ ކަމަށް ލަފާ ލިބިވަޑައިގެންފައިވާ ކަމަށެވެ. އެމަނިކުފާނު ވިދާޅުވީ ބްރިޖާ އެކު ތިލަފުށީ ބަނދަރާއި އިތުރު އެތައް ކަމެއް އަންނާނެ ކަމަށާއި އެކަމުގެ ސަބަބުން ފައިދާތައް ކުރާނެ ކަމަށެވެ.

އިގްތިސާދީ ވާހަކައަށް ފަހު ރައީސް ވިދާޅުވީ ރިޔާސީ ބަޔާނުގައި ވައުދުވެ ވަޑައިގަތް ފަދައިން މާލޭ ސަރަހައްދުން ދޫކުރަން ނިންމާފައިވާ ގޯތިތަކުގެ ތެރެއިން ފުރަތަމަ 3،000 ގޯތި މި މަހު އިއުލާނުކުރާނެ ކަމަށާއި އެކަމުގެ ތައްޔާރީތައް ކުރިއަށްދާ ކަމަށެވެ.