މިއަދު ފާހަގަކުރާ މި އަހަރުގެ ބައިނަލްއަގްވާމީ ދުވަހާ ގުޅިގެން ގަލޮޅު ދަނޑުގައި ޔޯގާ ހެދުން ކުރިއަށް ގެންދަނިކޮށް ބަޔަކު އެ ތަނަށް ވަދެ، އެ ހަރަކާތް ހުއްޓުވައިފި އެވެ.
ޔޫތު މިނިސްޓްރީއާ ގުޅިގެން، ރާއްޖޭގައި ހުންނަ އިންޑިއަން ކަލްޗަރަލް ސެންޓަރުން ހެނދުނު 6:30 ގައި ބޭއްވި ޔޯގާ ހަރަކާތް ކުރިއަށް ގެންދަނިކޮށް، ބަޔަކު އަރައިގަނެ، އަޑުގަދަ ކުރަން ފެށުމުން، ޔޯގާ ހަދަން ތިބި މީހުން ބިރު އެ ތަން ދޫކޮށް ދުއްވައިގަތީ އެވެ.
ޝަހާދަތުގެ ދެ ކަލިމަ ލިޔެފައިވާ ދިދަ ހިފައިގެން ތިބި އެ މީހުން ދަނޑަށް ވަދެގަނެ، "ﷲ އަކްބަރު" އޭ ގޮވައި، ޔޯގާ ހަދަން ތިބި މީހުން އެ ތަނުން ނުކުތުމަށް ހަރުކަށި އިންޒާރު ދިނެވެ. ޔޯގާ ހަދަން ތިބި މީހުން ބިރުން އެހެންވެ، އަވަހަށް ދަނޑުން ނުކުތީ އެވެ.
"މި ތަނުން ނުކުމޭ"، "ﷲ އަކްބަރު" ގޮވަމުން އެ މީހުން ވަނީ ޔޯގާ ހަދަން ތިބި ބައެއް މީހުންގެ ކައިރި އަށް ގޮސް އިންޒާރު ވެސް ދީފަ އެވެ.
ދަނޑަށް ވަދެގަތް މީހުން މައިތިރިކުރީ ފުލުހުން ގޮސް ޓިއާ ގޭސް ޖަހައިގެންނެވެ. ނަމަވެސް ދަނޑަށް ވަން މީހުން ވަދެގަތް ގަޑީގައި އެ ސަރަހައްދުގައި ތިބީ ހައެއްކަ ފުލުހުންނެވެ. ދަނޑަށް ވަން މީހުން ހުއްޓުވަން ފުލުހުންގެ ފައުޖެއް ދިޔައީ ފަހުންނެވެ.
މަންޒަރު ދުށް ބައެއް މީހުން ބުނި ގޮތުގައި ދިދަތަކެއް ހިފައިގެން ބަޔަކު ދުވެފައި ވަނީ، އެ ހަރަކާތް ފެށުމަށް ޔޫތު މިނިސްޓަރު އަހުމަދު މަހުލޫފު ވާހަކަ ދައްކަވަން ހުންނަވަނިކޮށެވެ. އޭރު އެތާނގައި އިންޑިއާގެ ހައިކޮމިޝަނަރު ވެސް ހުންނެވި އެވެ. އަދި ޔޫތު މިނިސްޓްރީ އާއި އިންޑިއާ ހައިކޮމިޝަންގެ ބައެއް ބޭފުޅުން ވެސް ތިއްބެވި އެވެ.
"އެ މީހުން ވަން ގޮތަށް ވަދެ ހަޅޭއްލަވަމުން ޔޯގާ މެޓްތައް ހަލާކުކޮށް ބިރު ދައްކައި މިތަނުން ހަމަ މިހާރު ނުކުމެގެން ދާށޭ ކިޔާފައި ގޮވަމުން ދިޔައީ. ކުޑައިރުކޮޅެއް ފަހުން ފުލުހުން ވަދެ އެ މީހުން މައިތިރި ކުރީ،" އޭނާ ކިޔައިދިނެވެ.
ޔޯގާ ދުވަސް ފާހަގަކުރަން ނިންމުމުން ސޯޝަލް މީޑިއާ އާއި އެހެނިހެން ގޮތްގޮތުން، އެ ކަން ނުކުރަން ގޮވާލައި މިދިޔަ ދެ ދުވަހެއްގެ ތެރޭގައި ބަޔަކު ދިޔައީ އިންޒާރު ދެމުންނެވެ. އަދި އެ ހަރަކާތް ބާއްވަން ރަސްފަންނު ދޫކޮށް ދިނުމަށް ޔޫތު މިނިސްޓްރީން އެދުނަސް މާލޭ ސިޓީ ކައުންސިލުން ހުއްދައެއް ނުދިނެވެ. ގަލޮޅު ދަނޑުގައި އެ ހަރަކާތް ބޭއްވީ އެހެންވެގެންނެވެ.
ސިޓީ ކައުންސިލުން ބުނީ، ޔޯގާ ދުވަސް ފާހަގަކުރަން ރަސްފަންނު ދޫނުކުރީ އެގޮތަށް ކައުންސިލްގައި އާއްމުންގެ ގިނަ ބަޔަކު އެދެމުންދާތީ ކަމަށެވެ.
ޔޯގާ ހެދުމަކީ ދީނީ އިލްމުވެރިންގެ މެދުގައި ހިޔާލު ތަފާތުވެފައިވާ ކަމެކެވެ. ކަންބޮޑުވުން ފާޅުކުރާ ބޭފުޅުން ވިދާޅުވާ ގޮތުގައި ޔޯގާ ހެދުމަކީ އިރަށް އަޅުކަން ކުރުމުގައި ހިމެނޭ ކަމެކެވެ.
ޔޯގާ އަކީ އިންޑިއާގެ ސާގާފީ އަދާކާދަތަކުގެ ތެރޭގައި ހިމެނޭ ހަރަކާތެކެވެ. އދ. އިން ވަނީ 2014 ވަނަ އަހަރުން ފެށިގެން ކޮންމެ އަހަރެއްގެ ޖޫން 21 ވަނަ ދުވަހަކީ ބައިނަލްއަގްވާމީ ޔޯގާ ދުވަހުގެ ގޮތުގައި ފާހަގަކުރަން ނިންމައިފަ އެވެ. ޔޯގާ ދުވަސް ފާހަގަކުރަން އޭރު އދ. އަށް ހުށަހެޅި ގަރާރު ކޯ-ސްޕޮންސާ ކުރަން ވޯޓު ދިން 177 ގައުމުގެ ތެރޭގައި ރާއްޖެ ވެސް ހިމެނެ އެވެ.
އޭގެ ފަހުން ރާއްޖޭގައި ވެސް ކޮންމެ އަހަރަކު ކަހަލަ ގޮތަކަށް ޔޯގާ ހަރަކާތެއް ބޭއްވި އެވެ.