މާލެ، ވިލިމާލެ، ތިލަފުށި އަދި ގުޅިފަޅު ގުޅުވާލާ ތިލަމާލެ ބްރިޖުގެ ފުރަތަމަ ތަނބުގެ ބިންގާ، ރައީސް އިބްރާހިމް މުހައްމަދު ސޯލިހާއި އިންޑިއާގެ ބޮޑުވަޒީރު ނަރެންދުރަ މޯދީ މިއަދު އަޅުއްވައިދެއްވައިފި އެވެ.
އިންޑިއާގެ އެފްކޮންސް ކުންފުނިން ރާއްޖޭގައި މަސައްކަތް ފަށާފައިވާ ތިލަމާލެ ބްރިޖުގެ ބިންގާ ރަސްމީކޮށް އަޅުއްވައިދެއްވީ، ރައީސް މިހާރު އިންޑިއާ އަށް ކުރައްވަމުން ގެންދަވާ ރަސްމީ ދަތުރުފުޅުގައި ނިއުދިއްލީގައި ހުންނަވާ ވާޗުއަލްކޮށް ބޭއްވި ރަސްމިއްޔާތެއްގަ އެވެ.
އެ ރަސްމިއްޔާތުގައި މާލޭގައި ތިބި ސަރުކާރުގެ ބައެއް އިސްވެރިން ބައިވެރިވެވަޑައިގަތީ، ބްރިޖުގެ މަސައްކަތް ކުރިއަށް ގެންދާ މާލެ އިންޑަސްޓްރިއަލް ވިލެޖުގައި ތިއްބަވައިގެންނެވެ. ނައިބު ރައީސް ފައިސަލް ނަސީމާއި ހައުސިން މިނިސްޓަރު މުހައްމަދު އަސްލަމާއި ބައެއް ވަޒީރުން އެ ރަސްމިއްޔާތުގައި ބައިވެރިވެވަޑައިގަތެވެ.
ބިންގާ އަޅުއްވައިދެއްވުމަށް ފަހު އެ ރަސްމިއްޔާތުގައި ވާހަކަދައްކަވަމުން ރައީސް ވިދާޅުވީ އިންޑިއާގެ އެހީގައި ރާއްޖޭގައި ހަދާ ބްރިޖާއި ހުޅުމާލޭގައި އިމާރާތްކުރާ 4،000 ހައުސިން ޔުނިޓްގެ މަޝްރޫއު އަކީ އަކީ ދެ ގައުމުގެ ދެމެދުގައި އޮތް ގާތްގުޅުމުގެ ރަމްޒެއް ކަމަށެވެ.
"އަދި އަޅުގަނޑުމެންނަށް މިއަދުގެ މި ވަގުތުކޮޅު އިތުރަށް ހާއްސަވަނީ އިންޑިއާގެ އެގްޒިމް ބޭންކުގެ ބަޔާސް ކްރެޑިޓްގެ ދަށުން މާލެ ސަރަހައްދުގައި އިތުރު 2،000 ހައުސިން ޔުނިޓް އެޅުމަށް އެހީތެރިކަން ދިނުމަށް އެއްބަސްވުމުން،" ރައީސް ވިދާޅުވި އެވެ.
ރާއްޖެއިން ބާއްވާ ގާތްގުޅުމަށް ޝުކުރު އަދާކުރައްވައި، ބޮޑުވަޒީރު މޯދީ ވަނީ އަބަދުވެސް ރާއްޖޭގެ ތަރައްގީ އަށް އިންޑިއާގެ އެހީތެރިކަން ލިބޭނެ ކަމުގެ ޔަގީންކަން ދެއްވައިފަ އެވެ.
"ތިލަމާލެ ބްރިޖުގެ ޕްރޮޖެކްޓުވާނީ ރާއްޖޭގެ މިހާތަނަށް ހިންގާ އުމްރާނީ ތަރައްގީގެ އެންމެ ބިޔަ މަޝްރޫއު އަށް،" މޯދީ ވިދާޅުވި އެވެ.
މިއަދުގެ ރަސްމިއްޔާތުގައި ސަރުކާރުން ވަނީ އިންޑިއާއާ އެކު މުޅިން އާ ހަ އެއްބަސްވުމުގެއްގައި ވެސް ސޮއިކޮށްފަ އެވެ. އޭގެ ތެރޭގައި އަންހެނުންގެ ތަރައްގީ އާއި މީހުން ބިނާކުރުމާއި މަސްވެރިކަމާއި ސައިބާ ސެކިއުރިޓީ އާއި ކާރިސާތަކުގައި އެހީތެރިކަން ދިނުމާއި ފުލުހުންނަށް ބޭނުންވާ އުމްރާނީ ތަރައްގީގެ އެހީތެރިކަން ދިނުމާ ގުޅޭ އެއްބަސްވުންތައް ހިމެނެ އެވެ.
މި ސަރުކާރުގެ އަމާޒަކީ އަންނަ އަހަރުގެ މެދު ތެރެއަށް މާލެ އާއި ވިލިމާލެ ގުޅާލުމެވެ.
މާލެ ސަރަހައްދު ގުޅާލާ ބްރިޖް މަޝްރޫ އަށް 500 މިލިއަން ޑޮލަރު (7.7 ބިލިއަން ރުފިޔާ) ހޭދަކުރަން ވަނީ ނިންމައިފަ އެވެ. އެ މަޝްރޫއު އަށް ދިވެހި ސަރުކާރުން ވަނީ އިންޑިއާގެ އެގްޒިމް ބޭންކުން 400 މިލިއަން ޑޮލަރުގެ ލޯނެއް ނަގައިފަ އެވެ. އަދި އިންޑިއާ ސަރުކާރުގެ ހިލޭ އެހީގެ ގޮތުގައި 100 މިލިއަން ޑޮލަރު އެ މަޝްރޫއު އަށް ދީފައިވެ އެވެ.
އެއީ މަޝްރޫއު ނިމޭތާ ފަސް އަހަރު ފަހުން އަނބުރާ ދައްކަން ފަށަންޖެހޭ ލޯނެކެވެ.
ބްރިޖް މަޝްރޫއާ ގުޅޭ ގޮތުން އެފްކޮންސް އިން ބުނެފައިވާ ގޮތުގައި، މާލެ އިން ވިލިމާލެ އަށް ގުޅާލުން އަންނަ އަހަރުގެ ޖުލައި 23 އަށް ނިންމައި، މާލެ އާއި ވިލިމާލެއާ ދެމެދުގައި އާންމު ދަތުރުތައް ކުރަން އަންނަ އަހަރު އޮގަސްޓް 15 ގައި ފަށާނެ އެވެ.
ގުޅިފަޅާއި ތިލަފުށި އަންނަ އަހަރު ޑިސެމްބަރުގައި ގުޅާލަން ނިންމާފައިވާ އިރު، އެ މަޝްރޫއުގެ ދަށުން މާލެ ސަރަހައްދު ގުޅާލުމަށް 6.7 ކިލޯމީޓަރުގެ ބްރިޖެއް ހަދާނެ އެވެ.