ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ) ގެ މެނޭޖިން ޑިރެކްޓަރުކަމުން ސުހައިލް އަހުމަދު ރިޓަޔާ ކުރައްވަން ނިންމައިފި އެވެ.
ރައީސް އިބްރާހިމް މުހައްމަދު ސޯލިހުގެ ވެރިކަން ފެށުނުތަނާހެން އެ ކުންފުނި ހިންގުމާ ހަވާލުވެވަޑައިގަތް ސުހައިލް ސަރުކާރުގެ ވަޒީފާ އިން މާދަމާ އިން ފެށިގެން ރިޓަޔާ ކުރައްވަން ނިންމެވީ އުމުރުން 55 އަހަރު ވުމުން، އެޗްޑީސީގައި އޮންނަ ރިޓަޔާމެންޓް އުސޫލުގެ ތެރެއިންނެވެ.
ހުޅުމާލޭގެ ހުރިހާ ކަމެއް ބަލަހައްޓާ އެޗްޑީސީ ހިންގުމާ އޭގެ ފަހުން ހަވާލުވާނީ ޑެޕިއުޓީ މެނޭޖިން ޑިރެކްޓަރު އަހުމަދު އާތިފެވެ.
ކުރީގެ ރައީސް އަބްދުﷲ ޔާމީންގެ ސަރުކާރުގައި ވެސް އެޗްޑީސީގެ އެމްޑީކަން ކުރެއްވި ސުހައިލް މި ސަރުކާރުގައި އެ މަގާމަށް އައްޔަން ކުރީ ޑިސެމްބަރު 30، 2018 ގަ އެވެ. އޭގެ ކުރިން ވެސް 2012 އިން 2015 އަށް އޭނާ ވަނީ އެ ކުންފުނީގެ އެމްޑީގެ މަގާމު ފުރުއްވައިފަ އެވެ.
އެޗްޑީސީގައި 21 އަހަރު މަސައްކަތް ކުރެއްވި ސުހައިލް ވަނީ އެ ކުންފުނީގެ އެމްޑީ ކަމުގެ އިތުރުން ޑެޕިއުޓީ މެނޭޖިން ޑިރެކްޓަރުކަން އަދި ޑިރެކްޓަ އޮފް ޕްލޭނިން އެންޑް އެސްޓޭޓްގެ މަގާމު އަދާކުރައްވައިފި އެވެ.
އުމުރުން އެންމެ 19 އަހަރުގައި ސަރުކާރުގެ ވަޒީފާ އަށް ވެންނެވި ސުހައިލް އެޗްޑީސީއާ ގުޅިވަޑައިގަތީ 2001 ގަ އެވެ. އެއީ ހުޅުމާލޭގެ ބިން ހިއްކުމާއި ތަރައްގީ ކުރުމުގެ މަސައްކަތް ކުރުމަށް ސަރުކާރުން ވަކި އިދާރާއެއް އުފެއްދުމުންނެވެ. ހުޅުމާލެ ހިއްކައި ނިމި، ފުރަތަމަ 200 އާއިލާ އެ ރަށުގައި ދިރިއުޅެން ފެށިއިރު ވެސް ސުހައިލް ވަޒީފާ އަދާކުރެއްވީ އެޗްޑީސީގަ އެވެ.
ހުޅުމާލެ ހިއްކައި އާބާދުކުރުމުގައި ސުހައިލް ވަނީ މިދިޔަ ދުވަސްތަކުގައި ވަރަށް ގިނަ މަސައްކަތްތަކެއް ކުރައްވައިފަ އެވެ.